ប្រទេសចិន ៖ ទីក្រុងហ្សិនចិន (Shenzhen) បានណែនាំសេចក្តីព្រាងបទបញ្ញត្តិ ដើម្បីហាមឃាត់ការបរិភោគសត្វឆ្មា និងសត្វឆ្កែ ដែលជាផ្នែកមួយនៃការជំរុញទូទាំងប្រទេស ដើម្បីអនុវត្ត «ការហាមឃាត់សរុប» លើការប្រើប្រាស់សត្វព្រៃ បន្ទាប់ពីការផ្ទុះឡើងនៃវីរុស Covid-19 ។
បទប្បញ្ញត្តិថ្មីនេះ ត្រូវបានចេញផ្សាយដោយគណៈកម្មាធិការអចិន្ត្រៃយ៍នៃសភាប្រជាជនហ្សិនចិន ដែលជាសមាជិកសភាក្រុង កាលពីថ្ងៃអង្គារ៍ ហើយសាធារណជននឹងអាចបញ្ចេញមតិផ្ទាល់ខ្លួន រហូតដល់ថ្ងៃព្រហស្បតិ៍សប្តាហ៍ក្រោយ។
សេចក្តីព្រាងច្បាប់នេះ រួមមាន «បញ្ជីស» ក្នុងចំណោមប្រភេទអាហារចំនួន៩ប្រភេទ ដែលត្រូវបានអនុញ្ញាត ប៉ុន្តែរដ្ឋាភិបាលមិនបាននិយាយថា នឹងសម្រេចជាផ្លូវការនៅពេលណានោះទេ។ បញ្ជីរួមមាន សាច់ជ្រូក សាច់គោ និងសាច់មាន់ រួមជាមួយទន្សាយ ត្រី និង អាហារសមុទ្រ។ ប៉ុន្តែវាមិនរាប់បញ្ចូលសត្វចិញ្ចឹមដូចជា ឆ្មា និងឆ្កែ ក៏ដូចជាមុខម្ហូបដ៏ពេញនិយមដទៃទៀតនៅភាគខាងត្បូងប្រទេសចិនដូចជា ពស់ អណ្តើក និងកង្កែបជាដើម។
ការផ្លាស់ប្តូររបស់ទីក្រុង Shenzhen ធ្វើឡើង បន្ទាប់ពីមានដំណោះស្រាយមួយ ដែលត្រូវបានអនុម័តដោយគណៈកម្មាធិការអចិន្ត្រៃយ៍នៃសភាប្រជាជនជាតិកាលពីថ្ងៃច័ន្ទ ដើម្បីហាមឃាត់ការធ្វើពាណិជ្ជកម្ម និងការប្រើប្រាស់សត្វព្រៃដែលជាការអនុវត្តមួយដែលត្រូវបានគេស្តីបន្ទោសថា បានជួយជម្រុញល្បឿននៃការចម្លង Covid-19។
ហ្សិនចិន ដែលជាមជ្ឈមណ្ឌលបច្ចេកវិទ្យានៅព្រំដែនហុងកុង បាននិយាយថា អ្នកដែលរំលោភបទប្បញ្ញត្តិនឹងត្រូវពិន័យជាទឹកប្រាក់រហូតដល់ ២០,០០០ យ័ន (ជាង ២៩០០ដុល្លារអាមេរិក)។ បទប្បញ្ញត្តិថ្មីនៅតែអនុញ្ញាតឱ្យប្រើប្រាស់សត្វព្រៃសម្រាប់គោលបំណងវិទ្យាសាស្ត្រនិងវេជ្ជសាស្ត្រ ប៉ុន្តែគឺធ្វើឡើងក្នុងការគ្រប់គ្រងយ៉ាងត្រឹមត្រូវ៕ ដកស្រង់ចេញពីវេបសាយ ៖ bangkokpost (កែសម្រួលដោយ ៖ បុប្ផា)
ចែករំលែកព័តមាននេះ