រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានបញ្ជាក់ថា នៅលើពិភពលោកហាក់បានធ្លាក់ចុះផ្នែកសីលធម៌ និងចរិតមនុស្សធម៌ខ្វះការទទួលខុសត្រូវចំពោះបញ្ហាសិទ្ធិមនុស្សចាប់ផ្តើមពីសិទ្ធិរស់រានមានជីវិត ។ ការលើកឡើងរបស់ប្រមុខរាជរដ្ឋាភិបាលនេះ បន្ទាប់ពីបណ្តាប្រទេសមួយចំនួនមិនបានអនុញ្ញាតឲ្យនាវា Westherdam ដែលផ្ទុកមនុស្សជិត២ពាន់នាក់កន្លងមកចូលចតនៅក្នុងប្រទេសខ្លួន តែកម្ពុជាអនុញ្ញាតឲ្យចូលចត ។
ថ្លែងក្នុងពិធីប្រគល់សញ្ញាបត្រដល់និស្សិតនៅសាកលវិទ្យាល័យវ៉ាន់ដា នាព្រឹកថ្ងៃទី១០ ខែមីនានេះ សម្តេចតេជោ បានបញ្ជាក់យ៉ាងដូច្នេះថា ៖«អីញ្ចឹងឥឡូវនេះពិភពលោកហាក់ដូចជា បានធ្លាក់ចុះនូវផ្នែកសីលធម៌ និងចរិតមនុស្សធម៌ ខ្វះការទទួលខុសត្រូវចំពោះបញ្ហាសិទ្ធិមនុស្សតែម្តង ។ ប៉ុន្តែមិនមែនបានសេចក្តីថា យើងមិនបានបណ្តុះបង្អាប់អ្នកណាទេ ក៏ប៉ុន្តែរហូតដល់នាវាអត់ស្បៀងអាហារគេមិនឲ្យចូល ។ ដល់ពេលកម្ពុជាឲ្យចូលចតកម្ពុជាត្រូវបានគេរើសអើង» ។
សម្តេចតេជោបានប្រកាសថា រហូតមកដល់ពេលនេះអ្នកដែលនៅលើនាវា Westerdam បានទៅដល់ស្រុកកំណើតអស់ហើយ និងគ្មានអ្នកបាត់បង់ជីវិតដោយសារជំងឺកូវីដ១៩នោះទេ ។ ជាមួយគ្នានោះដែរ សម្តេចក៏បានអះអាងថា បញ្ហាសេដ្ឋកិច្ចនៅលើពិភពកលោកបានកំពុងតែមានការពិបាកព្រោះថា ចិនកំពុងតែជួបបញ្ហាជំងឺកូវីដ១៩នេះ ខណៈដែរប្រទេសនេះបាននាំចេញវត្ថុធាតុដើមទៅកាន់ប្រទេសលើពិភពលោកក្នុងនោះកម្ពុជាមាន៦០ភាគរយ ។ សម្តេចបញ្ជាក់ថា ៖«មិនថា កម្ពុជានោះទេ គឺប្រទេសច្រើនណាស់ ដែលពឹងពាក់លើវត្ថុធាតិដើមពីចិន ។ ក្រៅពីនោះមានរោងចក្រគ្រឿងបង្គុំរថយន្តរហូតដល់គ្រឿងទូរស័ព្ទទំនើបៗផងដែរ ។ អីញ្ចឹងទេ ធ្វើឲ្យខ្សែចង្វាក់ផលិតកម្មបានជាប់គាំងផ្នែកសេដ្ឋកិច្ច» ។
សម្តេចក៏បានលើកឡើងថា ដោយសារមានការស្នើសុំពីកម្ពុជាមិត្តចិនបានសម្រេចផ្តល់នាវា៧គ្រឿងដឹកវត្ថុធាតុដើមមកម្ពុជា ។ ស្តេចតេជោបានបញ្ជាក់ប្រាប់ថា នាវាដឹកជញ្ជូនចំនួន៧គ្រឿង ដែលដឹកវត្ថុធាតុដើមសម្រាប់ផ្គត់ផ្គង់រោងចក្រនៅកម្ពុជាកំពុងដឹកចូលមកផែកម្ពុជាជាបន្តបន្ទាប់ក្នុងនោះ គឺមាន៥គ្រឿងបានចូលចតនៅកំពង់ផែក្រុងព្រះសីហនុ ហើយនិង២គ្រឿងទៀតចតនៅកំពង់ផែវៀតណាម សម្រាប់ផ្គត់ផ្គង់រោងចក្រនៅទីតាំងក្រុងបាវិត ខេត្តស្វាយរៀង ។
សម្តេចតេជោ ហ៊ុន សែន បានសុំឲ្យអាជ្ញាធរពាក់ព័ន្ធទាំងអស់ ជាពិសេសខាងកំពង់ផែ និងគយត្រូវធ្វើយ៉ាងណាសម្រួលដល់ការដឹកជញ្ជូននេះឲ្យដល់រោងចក្របានឆាប់រហ័សបំផុត ។ សម្តេចសូមអរគុណមិត្តចិន រួមទាំងអ្នកវិនិយោគគិន និងក្រុមហ៊ុនចិនទាំងអស់ដែលបានខិតខំចូលរួមជំរុញការដឹកនាំវត្ថុធាតុដើមមកផ្គត់ផ្គង់តម្រូវការរោងចក្រនានា នៅក្នុងប្រទេសកម្ពុជាអោយបានទាន់ពេលវេលា ៕
ចែករំលែកព័តមាននេះ