ប្រទេសបារាំង ៖ បណ្ដាសារព័ត៌មានបារាំងរាយការណ៍ថា រដ្ឋមន្ត្រីវប្បធម៌បារាំងលោក FRANCK RIESTER ត្រូវបានធ្វើតេស្ត ឃើញលទ្ធផលវិជ្ជមាននៃវីរុស COVID-19។ នេះជាការអះអាងកាលពីយប់ថ្ងៃទី៩ ខែមីនា ឆ្នាំ២០២០ របស់ខុន្ទកាល័យលោក។
តាមទូរទស្សន៍ BFMTV រដ្ឋមន្ត្រីអាយុ៤៤ឆ្នាំរូបនោះ ធ្វើតេស្តមានលទ្ធផលវិជ្ជមាន នៃការឆ្លងវីរុសក្រោយពីមានរោគសញ្ញានានាមក។ ខុន្ទកាល័យលោកបញ្ជាក់ថា លោក FRANCK RIESTER កាលពីសប្ដាហ៍មុន មានវត្តមានក្នុងសភាជាច្រើនថ្ងៃ ខណៈក្នុងសភាមានអ្នកឆ្លងវីរុសច្រើននាក់រួមទាំងសមាជិកសភាមួយចំនួនផង។
កាលពីយប់ថ្ងៃទី៩ ខែមីនា នាយកផ្នែកសុខភាពរបស់បារាំង លោក JEROME SALOMON ក្នុងសន្និសីទសារព័ត៌មានប្រចាំថ្ងៃមួយប្រកាសថា នៅបារាំងមានមនុស្ស២៥នាក់បានបាត់បង់ជីវិត និងអ្នកឆ្លងវីរុស១.៤១២នាក់ ចាប់តាំងពីមានការឆ្លងក្នុងប្រទេសមក គឹ២៨៦នាក់ច្រើនជាងពេលមុននេះ។
ម្យ៉ាងវិញទៀតសមាជិកសភាបារាំង៥រូបនិងបុគ្គលិកសភា២នាក់ក៏ឆ្លងវីរុសដែរ។ ខណៈជិតដល់ថ្ងៃបោះឆ្នោតក្រុមប្រឹក្សាក្រុង រដ្ឋមន្ត្រីមហាផៃ្ទបារាំង លោកCHRISTOPHE CASTANERគូសបញ្ជាក់ថា ការបោះឆ្នោត២ជុំនាថ្ងៃទី១៥និងទី២២មីនា នឹងប្រព្រឹត្តទៅដូចការគ្រោងទុកជាមួយបណ្ដាវិធានការពិសេស៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ