រាជធានីភ្នំពេញ ៖ ប្រមុខរាជរដ្ឋាភិបាលកម្ពុជាបានបញ្ជាក់កាលពីថ្ងៃ ០៩ ខែមីនាម្សិលមិញនេះថា មហាមិត្តចិនកំពុងរៀបចំនាវាចំនួន៧គ្រឿងដឹកវត្ថុធាតុដើមមកផ្គត់ផ្គង់ដល់រោងចក្រនៅកម្ពុជា ហើយក្នុងចំណោមនាវាទាំង៧គ្រឿងនេះ គឺ៥គ្រឿងចូលមកកំពង់ស្វយ័តព្រះសីហនុនិង២គ្រឿងផ្សេងទៀតចូលចតនៅកំពុងផែហូជីមិញនៃប្រទេសវៀតណាម។ ទន្ទឹមនោះផងដែរខាងសមាគមមីក្រូហិរញ្ញវត្ថុកម្ពុជានឹងជួបប្រជុំជាមួយក្រសួងសេដ្ឋកិច្ចលើបញ្ហាដែលសម្តេចស្នើឲ្យពន្យាការសង ឬការមិនយកការប្រាក់ដល់កម្មករ-កម្មការិនីដែលបានជំពាក់លុយនៅមីក្រូហិរញ្ញវត្ថុនោះ។
សម្តេចតេជោ ហ៊ុនសែន នាយករដ្ឋមន្ត្រីកម្ពុជាមានប្រសាសន៍បង្ហើបឱ្យដឹងក្នុងឱកាសពិធីសម្ពោធបើកឱ្យប្រើប្រាស់ជាផ្លូវការផ្លូវជាតិលេខ៥៥ ខេត្តពោធិ៍សាត់ ថាសម្តេចសូមជូនព័ត៌មានរីករាយសម្រាប់កម្មករ-កម្មការិនីកម្ពុជា មិត្តចិនបានរៀបចំនាវា៧គ្រឿងសម្រាប់ដឹកវត្ថុធាតុដើមផ្គត់ផ្គង់ឱ្យរោងចក្រ។ សម្តេចតេជោបានមានប្រសាសន៍បញ្ជាក់ថា «ថ្ងៃនេះនឹងចាប់ផ្តើមចូលជើងទីមួយ ស្អែកចូលជើងទីពីរ ។ នាវាចំនួន៧គ្រឿងក្នុងនោះ ៥គ្រឿងចូលនៅកំពង់ផែស្វយ័ត្នក្រុងព្រះសីហុននិង២គ្រឿងចូលនៅក្រុងហូជីមិញ។ ហេតុអ្វីចាំបាច់ចូលទៅហូរជីមិញ? គឺក្រុមហ៊ុនដែលផលិតនៅក្នុងតំបន់សេដ្ឋកិច្ចពិសេសខេត្តស្វាយរៀងដឹងមកពីហូរជីមិញមានចម្ងាយជិតជាងប្រើប្រៀបធៀបដឹកមកពីកំពង់សោម»។
សម្តេចតេជោបានបន្ថែមថា «បើតាមព័ត៌មានដែលមិត្តចិនឱ្យដឹងនាវាចំនួន៧គ្រឿងនេះ មិនមែនដឹងវត្ថុធាតុដើមត្រឹមតែ៣ខែនេះទេ គឺដឹករហូតដល់ខែ៥ ទល់សភាពការធូរស្រាល ។ ប៉ុន្តែទោះជាយ៉ាងណាក៏ដោយនៅប៉ុន្មានថ្ងៃនេះមានការព្យួរការងារនៅរោងចក្រនៅកន្លែងនេះកន្លែងនោះ។ ខ្ញុំសូមអំពាវនាវកុំឱ្យរោងចក្រឆ្លៀតពេលវាបញ្ឈប់ការងារ, លុបចោលនូវកិច្ចសន្យាជាមួយកម្មករ។នេះជាសំណុចដាច់ខាតដែលមិនត្រូវធ្វើរឿងនេះក្នុងពេលវេលាដែលកម្មករកំពុងជួបការលំបាក។ អីចឹងកុំឱ្យឆ្លៀតពេលថា ព្យួរការងារ ផ្អាកការងាររួចហើយលុបកិច្ចសន្យាចោលហើយចំណុចនេះកុំឱ្យមានឱ្យសោះ»។
ទន្ទឹមនឹងនេះ សម្តេចតេជោបានអំពាវនាវ ០៤ចំនុចសំខាន់ ដែលក្នុងនោះគឺ ៖ ១)-សូមរោងចក្រនានាមេត្តាកុំលុបចោលកិច្ចសន្យាការងារជាមួយកម្មករ កម្មការិនី។ ២) – ចំពោះមីក្រូហិញ្ញវត្ថុទាំងអស់ ត្រូវពន្យាការសង ឬការមិនយកការប្រាក់ដល់កម្មករ-កម្មការិនីដែលបានជំពាក់លុយនៅមីក្រូហិរញ្ញវត្ថុនោះ។ ៣) – សុំអោយម្ចាស់បុរីលំនៅដ្ឋានទាំងអស់ ដែលរំលួសផ្ទះជាមួយបងប្អូនកម្មករ ត្រូវពន្យាការបង់ និងកុំផ្តាច់កុងត្រានោះអី។ ៤)-សូមអោយអគ្គិសនីកម្ពុជា អនុញ្ញាតអោយកម្មករកម្មការិនីជំពាក់ថ្លៃភ្លើងសិនក្នុងអំឡុងពេលនេះ។
ពាក់ព័ន្ធនឹងការស្នើរបស់សម្តេចតេជោ សមាគមមីក្រូហិរញ្ញវត្ថុកម្ពុជាបានឱ្យដឹងថា កន្លងមកខាងសមាគមបានធ្វើការរាជរដ្ឋាភិបាល ពិសេសជាមួយខាងក្រសួងសេដ្ឋកិច្ចនិងធនាគារជាតិនៃកម្ពុជា ហើយការពាក់ព័ន្ធការអំពាវនាវរបស់រាជរដ្ឋាភិបាលទៅលើការពន្យាការបង់ប្រាក់ឬមិនយកការប្រាក់នៅពេលកម្មករត្រូវបានព្យួរការងារខាងសមាគមនឹងបើកកិច្ចប្រជុំជជែកពិភាក្សានៅក្នុងសប្តាហ៍នេះ។
លោក ផលវ៉ាន់ឌី នាយកប្រតិបត្តិសមាគមមីក្រូហិរញ្ញវត្ថុកម្ពុជាបានមានប្រសាសន៍ថា «ជារួម កិច្ចការនេះយើងកំពុងបន្តធ្វើរួមគ្នាជាមួយក្រសួងសេដ្ឋកិច្ចនិងហិរញ្ញវត្ថុនិងធនាគារជាតិនៃកម្ពុជា ហើយពួកយើងនឹងមានកិច្ចប្រជុំរបស់ខ្លួននៅក្នុងសប្តាហ៍នេះដើម្បីជជែកឆ្លុះបញ្ចាំងបន្ថែមទៀតដើម្បីរិះរកលទ្ធភាពសម្រួលដល់ស្ថានការនេះ»។លោកបានបន្តថា« ក្នុងកិច្ចការនេះជារួមយើងនឹងធ្វើសេចក្តីថ្លែងការណ៍រួមអំពាវនាវឱ្យសមាជិកចូលរួមអនុវត្តគាំំទ្រចំណាត់ការរបស់រាជរដ្ឋាភិបាល តើគាត់អនុវត្តយ៉ាងម៉េចដែរ។តើយើងត្រូវធ្វើរួមគ្នាយ៉ាងម៉េចទៀតដើម្បីចូលរួមចំណែកជាមួយរាជរដ្ឋាភិបាល។កិច្ចការនេះខាងសមាគមត្រូវការជជែកគ្នាដើម្បីរិះរកមធ្យោបាយដើម្បីសម្រួលដល់ស្ថានការនេះ។យើងខ្ញុំចូលរួមគាំទ្រដល់រាជរដ្ឋាភិបាល»៕ កែសម្រួលដោយ ៖ សុឃាក់
ចែករំលែកព័តមាននេះ