រាជធានីភ្នំពេញ ៖ បងប្អូនមូស្លីមនៅកម្ពុជាដែលជាទូទៅតែងសម្គាល់ថា ជាខ្មែរអ៊ិស្លាមនោះ បានសំណូមពរដល់គណៈកម្មការរៀបចំកម្មវិធីជួបជុំសូត្រធម៌របស់សាសនិកអ៊ិស្លាម អុីជទីម៉ាក ដែលគ្រោងនឹងធ្វើឡើងនៅថ្ងៃទី១៣ ដល់ថ្ងៃទី១៥ ខែមីនា ឆ្នាំ២០២០ខាងមុខនេះ…
រាជធានីភ្នំពេញ ៖ បងប្អូនមូស្លីមនៅកម្ពុជាដែលជាទូទៅតែងសម្គាល់ថា ជាខ្មែរអ៊ិស្លាមនោះ បានសំណូមពរដល់គណៈកម្មការរៀបចំកម្មវិធីជួបជុំសូត្រធម៌របស់សាសនិកអ៊ិស្លាម អុីជទីម៉ាក ដែលគ្រោងនឹងធ្វើឡើងនៅថ្ងៃទី១៣ ដល់ថ្ងៃទី១៥ ខែមីនា ឆ្នាំ២០២០ខាងមុខនេះ ស្ថិតនៅវិហារអ៊ិស្លាមក្នុងភូមិទ្រា ឃុំទ្រា ស្រុកក្រូចឆ្មារ ខេត្តត្បូងឃ្មុំ មេត្តាផ្អាកជាបណ្តោះអាសន្ន ខណៈកម្ពុជារកឃើញពលរដ្ឋខ្មែរម្នាក់នៅខេត្តសៀមរាបបានឆ្លងវីរុសកូវីដ-១៩ ពីជនជាតិជប៉ុន ។ ការរកឃើញនោះ ប្រមុខរាជរដ្ឋាភិបាលកម្ពុជាបានប្រកាសឱ្យបិទសាលារៀនក្នុងក្រុងសៀមរាបនិងលុបចោលគម្រោងអង្គរសង្ក្រាន្តផងដែរ ដោយបារម្ភថាការប្រមូលផ្តុំនោះអាចមានការឆ្លងវីរុសនេះរីករាលដាល ។
ការអំពាវនាវរបស់បងប្អូនខ្មែរអ៊ិស្លាមនេះ ដើម្បីចូលរួមទប់ស្កាត់នៃការរីករាលដាលវីរុសកូវីដ-១៩ ។ ចំពោះការជួបជុំនេះវិញ មិនមែនជាកម្មវិធីដែលយើងមិនអាចផ្អាកបាន ឬ លើកពេលមិនបាននោះឡើយ ពោលកម្មវិធីនេះ គឺមិនទាមទារជាដាច់ខាត់ត្រូវតែធ្វើ ឬចូលរួមនោះទេ លើកលែងការទៅបំពេញធម្មយាត្រាហាជ្ជី នៅប្រទេសអារ៉ាប៊ីសាអ៊ូឌីតដែលជាកាតព្វកិច្ចរបស់ជនមូស្លីមគ្រប់រូបដែលមានលទ្ធភាព ។
ប៉ុន្តែសម្រាប់ឆ្នាំនេះធម្មយាត្រានៅក្រុងឡាមិុចក៏ត្រូវបានផ្អាកដែរ ។ ទន្ទឹមនឹងនេះផងដែរ ប្រជាពលរដ្ឋមូស្លីមជាច្រើន បានទទូចដល់គណៈកម្មការរៀបចំកម្មវិធី អុិជទីម៉ាកនេះ ពិចារណាឡើងវិញ និងចូលរួមជាមួយរាជរដ្ឋាភិបាលកម្ពុជា ក៏ដូចអង្គការសុខភាពពិភពលោក ក្នុងការទប់ស្កាត់ការរីករាលដាលនៃវីរុសកូរ៉ូណា ឬ វីរុសកូវីដ-១៩ ដែលបាននឹងកំពុងរីករាលដាលទូទាំងពិភពលោក ខណៈកម្មវិធីនេះមានការប្រមូលផ្តុំគ្នាដោយចម្រុះជាតិសាសន៍ទាំងក្នុង និងក្រៅប្រទេសរាប់ម៉ឺននាក់ផងដែរ ។
ជុំវិញបញ្ហានេះដែរ អ្នកអប់រំក្នុងសាសនាអ៊ិស្លាម លោកគ្រូ លី ហ្សះរី ផ្តល់ជាទស្សនទានថា «ខ្ញុំសូមចូលរួមគាំទ្រចំពោះការដែលមិនចាំបាច់ក្នុងការជួបជុំណាមួយដែលអ្នកជំនាញបញ្ជាក់ប្រាប់ថា ការជួបជុំនោះអាចនឹងនាំមកនូវហានិភ័យខ្ពស់ក្នុងការឆ្លងជំងឺពីម្នាក់ទៅម្នាក់» ។ លោកគ្រូបន្តថា ការផ្អាក ឬពន្យារ ឬបញ្ឈប់ពីការជួបជុំនោះវាជាការល្អដែលយើងត្រូវអនុវត្តតាម ពីព្រោះក្នុងច្បាប់របស់សាសនាអ៊ិស្លាមក៏អនុញ្ញាតឱ្យយើងជ្រើសរើសយកប្រការ ឬវិធីណាដែលប្រសើរជាង បើសិនជាយើងមិនយល់ មិនដឹងនូវបញ្ហាអ្វីមួយ យើងត្រូវសួរអ្នកដែលមានចំណេះដឹងផ្នែកបញ្ហានោះ ។
ទាក់ទងនឹងបញ្ហានេះដែរ អង្គភាពព័ត៌មានអ៊ិស្លាមកម្ពុជា(IIC) នៅមិនទាន់សុំការបញ្ជាក់បន្ថែមពីគណៈកម្មការរៀបចំកម្មវិធី អុិជទីម៉ាកនេះនៅឡើយទេព្រោះគ្មានលេខទំនាក់ទំនង ។ ប៉ុន្តែបើយោងតាមការចុះផ្សាយដោយសារព័ត៌មានក្នុងស្រុកមួយឲ្យដឹងកាលពីថ្ងៃទី៧ ខែមីនាកន្លងមកនេះថា ការជួបជុំនេះគ្រោងនឹងប្រារព្ធឡើងតាមការគ្រោងទុកដដែល មិនមានការផ្អាកឡើយ នេះបើតាមការឲ្យដឹងពីគណៈកម្មការរៀបចំកម្មវិធីអុិជទីម៉ាក ៕
ចែករំលែកព័តមាននេះ