ខេត្តកណ្ដាល ៖ ជនសង្ស័យម្នាក់ដែលនគរបាលអះអាងថា ជាចោរជើងចាស់ធ្លាប់ជាប់ពន្ធនាគារដោយសារតែលួចគោអ្នកស្រុកផងនោះ បានធ្វើសកម្មភាពគាស់តូបលក់ទូរស័ព្ទមួយកន្លែងយកបានទូរស័ព្ទនិងសម្ភារៈមួយចំនួន ខណៈដែលម្ចាស់មិននៅបិទទ្វារតូបចោល ។ លុះពេលលួចបានគេចខ្លួនទៅបាត់ស្រមោល ប៉ុន្តែក្នុងចំណោមទូរស័ព្ទដែលជនសង្ស័យលួចយកទៅនោះក៏មានអាខោនហ្វេសប៊ុកប្អូនស្រីម្ចាស់តូបផងដែរ។
ក្រោយពេលដឹងថា តូបត្រូវចោរគាស់បែបនេះ ម្ចាស់តូបក៏បានប្ដឹងនគរបាលព្រហ្មទណ្ឌស្រុកអង្គស្នួល បន្ទាប់មកបានឲ្យប្អូនស្រីរបស់ខ្លួនប្រើល្បិចទាក់ទងប្រលោមស្នេហ៍ក្លែងក្លាយតាមរយៈឆាតហ្វេសប៊ុកជាមួយជនសង្ស័យនិងបានណាត់ជួបគ្នា ។ ចំណែកជនសង្ស័យមានចិត្តត្រេកអរយ៉ាងខ្លាំងណាស់ កាលបើនៅសុខៗមានស្រីស្អាតទាក់ទងស្នេហ៍បែបនេះ ហើយក៏ប្រញាប់ប្រញាល់ទៅជួបតាមការណាត់ រួចក៏ជាប់អន្ទាក់នគរបាលនិងម្ចាស់តូបតែម្ដង។
ការចាប់ខ្លួនជនសង្ស័យខាងលើនោះបានធ្វើឡើងកាលពីវេលាម៉ោង១១ព្រឹកថ្ងៃទី៨ ខែមិនា ឆ្នាំ២០២០ នៅតាមផ្លូវជាតិលេខ៤ មុខផ្សារបែកចាន ស្ថិតនៅក្នុងភូមិបែកចាន ឃុំបែកចាន ស្រុកអង្គស្នួល ខេត្តកណ្ដាល។
ជនសង្ស័យខាងលើនោះឈ្មោះសេម វឹត ភេទប្រុស អាយុ៣៤ឆ្នាំ មានទីលំនៅក្នុងភូមិព្រៃកុដិ សង្កាត់កំបូល ខណ្ឌកំបូល រាជធានីភ្នំពេញ ។ ចំណែកម្ចាស់តូបលក់ទូរស័ព្ទឈ្មោះ ក្រាញ់ វណ្ណះ ហៅសល ភេទប្រុស អាយុ៣២ឆ្នាំ មានទីលំនៅក្នុងភូមិព្រៃក្រាយ ឃុំព្រៃពួច ស្រុកអង្គស្នួល ខេត្តកណ្តាល ។ រីឯទូរស័ព្ទដែលបាត់ចំនួនមានចំនួន៥គ្រឿង,កុំព្យូទ័រ LED មួយគ្រឿង, អាគុយទប់ភ្លើងមួយគ្រឿង, កាសប្លូធូចំនួន២គ្រឿង ។ ប៉ុន្តែសម្ភារៈទាំងនោះត្រូវបាននគរបាលធ្វើការដកហូតបានមកវិញស្ទើរតែទាំងអស់ ដោយបាត់តែទូរស័ព្ទម៉ាកណូគាអិនចុចពិលចំនួន៤គ្រឿង និងសុីមមួយចំនួនតែប៉ុណ្ណោះ។
តាមប្រភពពីនគរបាលបាននិយាយថា ជនសង្ស័យខាងលើបានធ្វើសកម្មភាពគាស់តូបលក់ទូរស័ព្ទខាងលើតាំងពីវេលាម៉ោង១២និង៣០នាទីយប់រំលងអាធ្រាត្រឈានចូលថ្ងៃទី៧ ខែមិនា ឆ្នាំ២០២០ ខណៈដែលម្ចាស់ជាប់រវល់ទៅធ្វើពិធីខួនកំណើតឲ្យកូននៅឯផ្ទះម្ដាយ ។ លុះព្រឹកឡើងថ្ងៃដដែលទើបប្អូនប្រុសរបស់គាត់ម្នាក់ទូរស័ព្ទប្រាប់ថា «ចោរគាស់តូបយកអីវ៉ាន់អស់ហើយ» ។ ឮដូច្នេះទើបបុរសម្ចាស់តូបជិះម៉ូតូមកមើលឃើញមានស្នាមចោះជញ្ជាំងស័ង្កសីលួចអីវ៉ាន់ខាងលើ ។ ប៉ុន្តែមុននឹងទៅធ្វើខួបកំណើតកូន គាត់បានយកទូរស័ព្ទល្អៗនិងមានតម្លៃថ្លៃៗទៅទុកនៅកន្លែងផ្សេង ក្រោយមកបុរសនេះក៏បានទៅដាក់ពាក្យបណ្តឹងសុំឲ្យនគរបាលប៉ុស្តិ៍ព្រៃពួចនិងនគរបាលព្រហ្មទណ្ឌស្រុកអង្គស្នួលជួយស្រាវជ្រាវ។
តាមប្រភពខាងលើបានបន្តថា នៅក្នុងចំណោមទូរស័ព្ទដែលបាត់បង់នោះ គឺមានទូរស័ព្ទមួយគ្រឿងជារបស់ប្អូនស្រីម្ចាស់តូប និងមានអាខោនហ្វេសប៊ុកផងដែរ ទើបខណៈនោះគាត់បានឲ្យប្អូនស្រីប្រើល្បិចទាក់ទងប្រលោមស្នេហ៍ក្លែងក្លាយតាមរយៈឆាតហ្វេសប៊ុក រហូតជនសង្ស័យទន់ចិត្ត ។ បន្ទាប់មកប្អូនស្រីរបស់គាត់ក៏បានណាត់ជួប ហើយធ្វើឱ្យជនសង្ស័យមានចិត្តត្រេកអរខ្លាំងណាស់ ដោយគិតថាបានជួបស្រីស្អាត ក៏ប្រញាប់ប្រញាល់ទៅជួបតាមការណាត់ ។ ចំណែកនគរបាលក៏បានរាយអន្ទាក់រង់ចាំរួចជាស្រេច លុះពេលឃើញជនសង្ស័យទៅដល់មុខផ្សារបែកចានក៏ចាប់ខ្លួននាំយកទៅសាកសួរនិងចាត់ការតាមច្បាប់ ដែលនេះគឺជាការដើរចូលអន្ទាក់ដោយខ្លួនតែម្ដង។
ក្រោយពេលចាប់ខ្លួន សង្ស័យបានសារភាពថា ខ្លួនពិតជាបានគាស់ទម្លុះទម្លាយជញ្ជាំងតូបលក់ទូរស័ព្ទខាងលើនោះមែន ហើយក្រោយពេលលួចបានខ្លួនបានយកទូរស័ព្ទម៉ាកណូគាចុចពិល២គ្រឿងទៅលក់នៅផ្សារចោមចៅបានប្រាក់២ម៉ឺនរៀល និងកុំព្យូទ័រ១គ្រឿងលក់នៅផ្សារកំពង់ស្ពឺបានចំនួន២០ដុល្លារ ហើយទូរស័ព្ទម៉ាកសាំស៊ុងខ្លួនទុកប្រើ ។
ជនសង្ស័យបានសារភាពបន្តថា ដោយឡែកកាលពីក្នុងឆ្នាំ២០១១ ខ្លួនធ្លាប់លួចបានគោចេញពីភូមិសាស្ត្រខេត្តកំពង់ស្ពឺ លុះដឹកយកមកលក់នៅក្នុងស្រុកអង្គស្នួលក៏ត្រូវបាននគរបាលព្រហ្មទណ្ឌស្រុកអង្គស្នួលឃាត់ខ្លួនបាន។ បន្ទាប់មកបានប្រគល់ខ្លួនទៅឲ្យនគរបាលខេត្តកំពង់ស្ពឺចាត់ការបញ្ជូនទៅតុលាការនិងបានជាប់គុករយៈពេល៦ខែ ក៏រួចខ្លួន រហូតដល់មកដល់ពេលនេះក៏ត្រូវសមត្ថកិច្ចឃាត់ខ្លួនជាថ្មីទៀត ៕ (កែសម្រួលដោយ ៖ ធីតា)
ចែករំលែកព័តមាននេះ