ខេត្តព្រៃវែង ៖ ជារឿងដែលគេមិនធ្លាប់នឹកគិត ហើយក៏មិនជឿ បើមិនឃើញនឹងភ្នែកដែលព្រះសង្ឃ១អង្គមានឋានៈជាព្រះគ្រូចៅអធិការវត្តស្តីទីត្រូវសមត្ថកិច្ចចាប់ខ្លួន បន្ទាប់ពីពិនិត្យឃើញមានសារធាតុញៀននៅក្នុងខ្លួន ហើយឆែកឆេររកឃើញថ្នាំញៀន និងឧបករណ៍សម្រាប់ជក់ថ្នាំញៀននៅក្នុងកុដិថែមទៀត ។
រឿងដ៏ហួស និងថ្លែងមួយនេះបានកើតឡើង កាលពីរសៀលថ្ងៃទី៧ មិនានេះ នៅក្នុងបរិវេណវត្តក្រាំងស្លា ដែលស្ថិតក្នុងភូមិវល្លិយាវ ឃុំរោងដំរី ស្រុកបាភ្នំ ខេត្តព្រៃវែង ព្រះសង្ឃដែលត្រូវបានចាប់ខ្លួននោះមានព្រះនាម ខុន ម៉ាក់ ព្រះជន្ម៣២វស្សា និងមានតួនាទីជាព្រះគ្រូចៅអធិការវត្តស្តីទី វត្តក្រាំងស្លា ។
ប្រភពព័ត៌មានពីសមត្ថកិច្ចមូលដ្ឋានបានអោយដឹងថា មុនពេលឈានដល់ការចុះទៅត្រួតពិនិត្យ និងឆែកឆេរក្នុងកុដិព្រះសង្ឃខាងលើ សមត្ថកិច្ចធ្លាប់បានទទួលព័ត៌មានពីយាយជី តាជីក្នុងវត្តក៏ដូចជា ពុទ្ធបរិស័ទចំណុះជើងវត្ត២ ទៅ៣ដងរួចមកហើយ ប៉ុន្តែដោយពុំមានភស្តុតាងច្បាស់លាស់ និងមិនចង់អោយសាមីខ្លួនដឹងខ្លួនទើបសមត្ថកិច្ចនៅរក្សាភាពស្ងប់ស្ងៀមសិន ប៉ុន្តែបានដាក់កម្លាំងតាមឃ្លាំមើលជាប្រចាំរហូតមកដល់រសៀលថ្ងៃទី៧ មិនា ពេលដែលទទួលបានព័ត៌មានច្បាស់ការណ៍ហើយទើបស្នើសុំការសហការពីមន្ត្រីធម្មការស្រុក មន្ត្រីសង្ឃស្រុក និងអាជ្ញាធរដែនដីចុះទៅធ្វើការពិនិត្យទឹកនោមព្រះសង្ឃនាម ខុន ម៉ាក់ នៅក្នុងវត្តក្រាំងស្លា ហើយជាលទ្ធផលបញ្ជាក់ថា មានសារធាតុញៀនពិតប្រាកដមែន ទើបបន្តឆែកឆេរក្នុងកុដិថែមទៀតក៏ប្រទះឃើញវត្តុតាងថ្នាំញៀនប្រភេទម្សៅក្រាមពណ៌ស១កញ្ចប់ទៀត រួមទាំងឧបករណ៍សម្រាប់ជក់ថ្នាំមួយចំនួនផងដែរ ។
ក្រោយពីពិនិត្យ និងឆែកឆេរឃើញបែបនេះ មន្ត្រីធម្មការស្រុក និងព្រះអនុគណស្រុកក៏សម្រេចផ្សឹកសង្ឃនាម ខុន ម៉ាក់ រួចប្រគល់ទៅអោយសមត្ថកិច្ចចាត់ការទៅតាមនីតិវិធីនៅល្ងាចថ្ងៃដដែលនោះតែម្តង ហើយសមត្ថកិច្ចក៏បន្តកសាងសំណុំរឿងបញ្ជូនអន្ទិត ខុន ម៉ាក់ រួមទាំងវត្ថុតាងទៅតុលាការ និងត្រូវបានតុលាការសម្រេចឃុំខ្លួនជាបណ្តោះអាសន្ននៅក្នុងពន្ធនាគារខេត្ត នៅថ្ងៃបន្ទាប់នោះផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ