បុរសកម្ពុជាដំបូងគេ ត្រូវបានរកឃើញថា មានផ្ទុកមេរោគកូវីដ១៩ ។ ការរកឃើញនោះ បានជំរុញអោយ រដ្ឋាភិបាលកាន់តែបង្កើនកិច្ចប្រឹងប្រែងរបស់ខ្លួន ដើម្បីទប់ស្កាត់ការរាលដាលនៃមេរោគនេះដោយបានអំពាវនាវដល់ប្រជាជនកម្ពុជាទាំងអស់ ឱ្យបង្កើនការប្រុងប្រយ័ត្នហើយមានអនាម័យល្អនៅក្នុងការរស់នៅដើម្បីប្រឆាំងនឹងមេរោគនេះ។
យោងតាមក្រសូងសុខាភិបាល និងអង្គការសុខភាពពិភពលោកនោះ ការរស់នៅប្រកបដោយអនាម័យ ល្អពិសេស ការលាងសម្អាតដៃ គឺជាវិធានការដ៏សំខាន់ជាងគេ នៅក្នុងនៅក្នុងការទប់ស្កាត់ការឆ្លងមេរោគកូវីដ១៩។ ដូច្នេះ ការអប់រំប្រជាជនអោយដឹងពីសារសំខាន់នៃការលាងដៃនិងវិធីលាងដៃត្រឹមត្រូវនឹងជួយអោយមនុស្សម្នាក់ៗអាចទប់ស្កាត់ការឆ្លងមេរោគកូវីដ១៩ ក៏ដូចជាមេរោគផ្សេងទៀតផងដែរ។
ប៉ុន្តែទោះបីជាយ៉ាងក្តី មានប្រជាជនជាច្រើននៅកម្ពុជា ក៏ដូចជាប្រទេសផ្សេងទៀតជាច្រើននៅក្នុងពិភពលោកមិនទាន់យល់ច្បាស់នៅឡើុយ អំពីរបៀបលាងដៃអោយបានត្រឹមត្រូវ ។ ដូច្នេះប្រជាជនកម្ពុជា ត្រូវតែយល់ដឹងអំពីរបៀបនៃការលាងដៃអោយ បានត្រឹមត្រូវដើម្បីអាចទប់ស្កាត់ការឆ្លងមេរោគកូវីដ១៩និងមេរោគផ្សេងទៀត។
ការលាងដៃដែលត្រឹមត្រូវត្រូវធ្វើតាមលំដាប់លំដោយមានដូចតទៅនេះ ៖
-ចូរលាងដៃជាមួយនឹងទឹកចេញពីក្បាលរ៉ូមីណេ
-ចូរប្រើប្រាស់សាប៊ូឲ្យបានគ្រប់គ្រាន់ ក្នុងការលាងសម្អាតដៃដែលសើម
-ចូរដុសផ្ទៃនៃបាតដៃទាំងអស់ រួមទាំងខ្នងដៃចន្លោះម្រាមដៃ និងក្រោមក្រចកយ៉ាងហោចណាស់២០វិនាទី
-ចូរលាងសម្អាតសាប៊ូវិញ ដោយប្រើទឹកចេញពីក្បាលរ៉ូមីណេ
-ចូរជូតដៃអោយស្ងួតជាមួយនឹងក្រដាសស្អាត ឬកន្សែងស្អាត ដែលប្រើតែម្តងហើយចោល
អ្វីដែលបានយើងបាននិយាយនេះ គឺផ្តោតទៅលើការបង្កើនអនាម័យផ្ទាល់ខ្លូួនរបស់មនុស្សម្នាក់ៗដើម្បីបង្កើនការទប់ស្កាត់មេរោគកូវីដ១៩ ។ ក្រៅពីការបង្ការខ្លួនឯងនោះ ប្រជាជនម្នាក់ៗក៏ត្រូវប្រយ័ត្នផង ដែរក្នុងការបញ្ចៀសការចម្លងមេរោគទៅកាន់អ្នកដទៃ ដោយត្រូវពាក់ម៉ាស ឬប្រើក្រមា បើសិនជា ពួកគេមាន រោគសញ្ញា ដែលនាំសង្ស័យដល់ការមានការឆ្លង មេរោគកូវីដ១៩ ។ រោគសញ្ញានៃជំងឺបង្កដោយកូវីដ១៩ រួមមាន ក្តៅខ្លួន ក្អក និងថប់ដង្ហើម ។ ដូច្នេះ បើសិនជាមានរោគសញ្ញាទាំងនេះ គេត្រូវតែពាក់ម៉ាសមុខ ឬ ប្រើក្រមា ដើម្បីកុំអោយមានការចម្លងមេរោគទៅកាន់អ្នកដទៃ។
នេះគឺជាអនាម័យផ្ទាល់ខ្លួន ដែលប្រជាជនកម្ពុជាម្នាក់ៗត្រូវប្រកាន់យកដើម្បីបង្ការឆ្លង និងចម្លងមេរោគ។ ប៉ុន្តែទោះបីជាយ៉ាងក្តី ការធ្វើអនាម័យ វាត្រូវតែធ្វើយ៉ាងទូលំទូលាយទូទាំងប្រទេសនិង ត្រូវពាក់ព័ន្ធលើគ្រប់ផ្នែក និងស្ថាប័ន ដោយពិចារណាទៅ លើសារសំខាន់នៃអនាម័យនៅក្នុងការបង្ការជំងឺ។
សម្តេចតេជោ ហ៊ុន សែន បានមានប្រសាសន៍នៅខេត្តសៀមរាប នាថ្ងៃទី៩ មីនា ថា នេះជាពេលវេលាដែលយើងត្រូវ រួមគ្នាដើម្បីទប់ស្កាត់នៃការឆ្លងមេរោគកូវីដ១៩។ ដូច្នេះ ការបង្កើនអនាម័យផ្ទាល់ខ្លួន អនាម័យនៅតាមទីកន្លែង ផ្សេងៗដូចជាកន្លែងធ្វើការងារ មជ្ឈមណ្ឌលលក់ទំនិញ ភោជនីយដ្ឋានជាដើមត្រូវបង្កើនអនាម័យឬក៏ផ្តល់មធ្យោបាយ ដើម្បីអោយមនុស្សគ្រប់គ្នាធ្វើអនាម័យបានល្អ។
នៅពេលដែលគ្រប់ទីកន្លែងនៅក្នុងប្រទេសកម្ពុជា មានអនាម័យល្អនោះ វានឹងអាចកាត់បន្ថយមួយកម្រិតនៃការឆ្លងមេរោគកូវីដ១៩ ដោយហេតុថាមេរោគនេះ ក៏អាចមាននៅលើផ្ទៃតុឬក៏កន្លែងណាមួយផងដែរហើយពេលដែលនរណាម្នាក់ យកដៃទៅប៉ះកន្លែងដែលមានមេរោគនោះ ពេលនោះ វានឹងមានលទ្ធភាពដែលថាមេរោគនោះ អាចចម្លងមកមនុស្សផងដែរ។
ទន្ទឹមជាមួយគ្នានេះ នៅតាមបន្ទប់ទឹកគ្រប់ ទីកន្លែងទាំងអស់ក៏គួរតែមានដាក់សាប៊ូលាងដៃ ដើម្បីអោយអ្នកចូលប្រើប្រាស់បន្ទប់ ទឹកអាចសម្អាតដៃរបស់ពួកគេបានជាមួយទឹកនិងសាប៊ូ។ ការរស់នៅស្អាត និងមានអនាម័យត្រូវតែក្លាយជារបៀបរស់នៅប្រចាំថ្ងៃមួយរបស់ប្រជាជនកម្ពុជា។ ខណៈដែលវាមិនចំណាយលុយកាក់ វាបានជួយកាត់បន្ថយការឆ្លងមេរោគជាច្រើនមកមនុស្ស។
ការរស់នៅស្អាតនិងមានអនាម័យ ត្រូវតែជាយុទ្ឋនាការមួយមានទ្រង់ទ្រាយធំទូទាំងប្រទេស ដើម្បីអោយ សារ ការរស់នៅស្អាត និងមានអនាម័យល្អ នេះបានជ្រួបជ្រាបដល់ពលរដ្ឋកម្ពុជានៅទូទាំងប្រទេស ។ វានឹងមានសារសំខាន់ខ្លាំងណាស់ ដែលក្រសួងសុខាភិបាលសារព័ត៌មាន និងអ្នកពាក់ព័ន្ឋទាំងអស់ធ្វើការចែក រំលែកសារការរស់នៅស្អាតនិងមានអនាម័យល្អ គឺជាអាវុធដ៏សំខាន់មួយក្នុង ការប្រយុទ្ឋប្រឆាំងនឹងការឆ្លង មេរោគកូវីដ១៩ និងមេរោគផ្សេងទៀត។
នៅក្នុងសម័យកាលបច្ចេកវិទ្យាព័ត៌មានពិសេសបណ្តាញសង្គមដូចជាហ្វេសប៊ុកនិងបណ្តាញសង្គមផ្សេងទៀតនោះ វាមានភាពងាយស្រួលខ្លាំងណាស់នៅក្នុងការផ្សព្វផ្សាយសារឬព័ត៌មាន អោយបានដល់ មនុស្សជាច្រើននោះ។ ដោយសារតែភាពងាយស្រួលនៃការផ្សព្វផ្សាយនេះហើយបានជាព័ត៌មានមិនពិត fake news បានរាលដាលយ៉ាងសាហាវ នៅក្នុងប្រទេសកម្ពុជា។ ដូច្នេះ វាគ្រាន់តែទាមទារនូវឆន្ទះរបស់មនុស្សគ្រប់គ្នាតែប៉ុណ្ណោះនៅក្នុង ការប្រែក្លាយប្រទេសកម្ពុជា អោយ ក្លាយជាប្រទេស មួយដែលកាន់តែមានអនាម័យល្អនិងស្អាត។
គ្រប់ទីកន្លែងទាំងអស់មិនថា ក្រសួងរដ្ឋ ក្រុមហ៊ុនឯកជន អង្គការក្រៅរដ្ឋាភិបាល រោងចក្រ មជ្ឈមណ្ឌលលក់ទំនិញ រោងភាពយន្ត ភោជនីយដ្ឋាន ហាងកាហ្វេឬក៏កន្លែងផ្សេងទៀតទេ គេត្រូវតែរួមចំណែកនៅក្នុង ការផ្សព្វផ្សាយសារនៃការរស់នៅប្រកបដោយអនាម័យ ស្អាត និងសារអំពីសារសំខាន់នៃការលាង ដៃ នៅក្នុងការទប់ទល់ប្រឆាំងនឹងការឆ្លងមេរោគកូវីដ១៩ និងមេរោគផ្សេងទៀត។ វានឹងរឹតតែប្រសើរថែមទៀត បើសិនជាគ្រប់ទីកន្លែងទាំងអស់នោះផ្តល់ មធ្យោបាយសម្រាប់ការធ្វើអនាម័យ ដូចជាមាន ការដាក់សាប៊ូ និង ក្រដាសជូតនៅក្នុងគ្រប់ បន្ទប់ទឹកទាំងអស់។
ក្រសួងសុខាភិបាល ក្រសួងបរិស្ថាន និងក្រសួងពាក់ព័ន្ខផ្សេងទៀត មានតួនាទីនៅក្នុងការ ឃោសនា អោយទូលំទូលាយបំផុតអំពីសារសំខាន់នៃការរស់នៅមានអនាម័យនិងស្អាតហើយ ទន្ទឹមនោះ ត្រូវជំរុញ លើកទឹកចិត្តដល់គ្រប់កន្លែងទាំងអស់ អោយចូលរួមចំណែកនៅក្នុងយុទ្ឋនាការ ដើម្បីបង្កើនអនាម័យល្អ និងការរស់នៅស្អាត អោយជ្រាបដល់បេះដូងខ្មែរគ្រប់រូប ។ ចំណែកសារព័ត៌មានកម្ពុជាទាំងអស់ក៏ត្រូវចូល រួមយ៉ាងសកម្មផងដែរនៅក្នុងយុទ្ឋនាការមួយនេះតាមរយះការបង្កើន ការផ្វផ្សាយព័ត៌មានអំពីសារសំខាន់នសារសំខាន់នៃការលាងដៃ និង ការរស់នៅប្រកបដោយអនាម័យសម្រាប់សុខភាពក៏ដូច ជាការ ប្រឆាំង នឹង មេរោគកូវីដ១៩។
ការរស់នៅប្រកបដោយអនាម័យស្អាតនេះ ត្រូវតែក្លាយជាទម្លាប់រស់នៅប្រចាំថ្ងៃរបស់ប្រជាជនកម្ពុជាគ្រប់រូប ដោយមិនគ្រាន់តែដើម្បីទប់ទល់នឹងមេរោគកូវីដ១៩ឡើយ ។ ដូច្នេះ មនុស្សគ្រប់គ្នាត្រូវតែរួមគ្នាប្រែក្លាយកម្ពុជាអោយទៅជាប្រទេស ដែលមានស្តង់ដារអនាម័យខ្ពស់ និងការស់នៅស្អាតមិនថា ពេលមានការរាលដាលឆ្លងមេរោគកូវីដ១៩ ឬពេលអនាគតឡើយ ។ យើងត្រូវតែធ្វើអោយបានការចងចាំមួយ សម្រាប់មនុស្សទូទាំងពិភពលោកថា កម្ពុជាគឺជាប្រទេសដែលមានស្តង់ដាអនាម័យខ្ពស់ និងស្អាតបន្ថែមទៅលើសម្រស់នៃប្រទេសមួយនេះ៕
ចែករំលែកព័តមាននេះ