ខេត្តសៀមរាប ៖ ខណៈប្រទេសកម្ពុជាបានប្រកាសរកឃើញនូវករណីទី២ នៃអ្នកឆ្លងវីរុសកូវីដ-១៩ លើបុរសខ្មែរ វ័យ៣៨ឆ្នាំមួយរូប បានធ្វើឲ្យបងប្អូនមួយចំនួនពិសេសអ្នកក្រុងសៀមរាប មានការភ័យបារម្ភខ្លាំងឡើង រហូតមានបងប្អូនខ្លះ ជ្រួលទៅទិញអីវ៉ាន់ គ្រឿងឧបភោគបរិភោគយកមកស្តុកទុក ក៏ដូចបរិក្ខាការពារនិងសម្លាប់មេរោគដូចជាម៉ាស និងទឹកអាកុលជាដើម ជាហេតុធ្វើឲ្យ ជនឱកាសនិយមមួយចំនួនតូច ឆ្លៀតដំឡើងថ្លៃរបស់របរចាំបាច់ទាំងនេះ ។
បើតាម រដ្ឋបាលខេត្តសៀមរាប អោយដឹងថា ជាវិធានការទប់ស្កាត់កាលពីថ្ងៃទី៨ ខែមីនា ឆ្នាំ២០២០ ក្រុមការងារមន្ត្រីមន្ទីរពាណិជ្ជកម្មខេត្តសៀមរាប បានចុះស្រង់តម្លៃលក់ម៉ាស និងត្រួតពិនិត្យស្តុកម៉ាស នៅតាមបណ្តាឱសថស្ថាន នៅក្នុងក្រុងសៀមរាប ខេត្តសៀមរាប ក្នុងគោលបំណងណែនាំដល់ ពាណិជ្ជករ អាជីវករ សេវាករ និងម្ចាស់ឱសថស្ថាន ៖
ទី១ សូមកុំដំឡើងថ្លៃម៉ាស់ អាកុលលាងដៃ និងជេលលាងដៃ ហួសហេតុ ធ្វើឲ្យប៉ះពាល់ដល់កិត្តិយស និងសេចក្តីថ្លៃថ្នូរ ក្នុងការប្រកបអាជីវកម្ម តាមរយៈការកេងចំណេញ ក្នុងស្ថានភាពដែលប្រជាជនមានការលំបាក ។
និងទី២ សូមចូលរួមសហការ និងរួមចំណែកការងារមនុស្សធម៌ និងកាត់បន្ថយការឆ្លងជំងឺរលាកសួតដោយសារកូវីដ-១៩ (Covid-19) ៕
ចែករំលែកព័តមាននេះ