រាជធានីភ្នំពេញ ៖ រដ្ឋាភិបាលចិនបានសម្រេចបញ្ជូននាវា៧គ្រឿង ដើម្បីដឹកវត្ថុធាតុដើមមកផ្គត់ផ្គង់នៅរោងចក្រក្នុងប្រទេសកម្ពុជាដែលថ្ងៃនេះនឹងមកដល់កំពង់ផែព្រះសីហនុបណ្តើរៗ ។ នេះបើតាមការបញ្ជាក់របស់សម្តេចតេជោហ៊ុន សែន ។ សម្តេចតេជោហ៊ុន សែន…
រាជធានីភ្នំពេញ ៖ រដ្ឋាភិបាលចិនបានសម្រេចបញ្ជូននាវា៧គ្រឿង ដើម្បីដឹកវត្ថុធាតុដើមមកផ្គត់ផ្គង់នៅរោងចក្រក្នុងប្រទេសកម្ពុជាដែលថ្ងៃនេះនឹងមកដល់កំពង់ផែព្រះសីហនុបណ្តើរៗ ។ នេះបើតាមការបញ្ជាក់របស់សម្តេចតេជោហ៊ុន សែន ។
សម្តេចតេជោហ៊ុន សែន នាយករដ្ឋមន្ត្រីបានថ្លែងក្នុងពិធីសម្ភោធផ្លូវជាតិលេខ៥៥ និងផ្លូវជាតិលេខ១០ នៅខេត្តពោធិសាត៍ នាព្រឹកថ្ងៃទី៩ ខែមីនា ឆ្នាំ២០២០ យ៉ាងដូច្នេះថា ៖ «ខ្ញុំសូមជូនជាព័ត៌មានថា ចិនបានរៀបចំនាវា៧គ្រឿង សម្រាប់ដឹកវត្ថុធាតុដើមផ្គត់ផ្គង់ឲ្យរោងចក្រថ្ងៃនេះចាប់ផ្តើមចូលមកជើងទី១ ស្អែកចូលជើងទី២ ។ ៧គ្រឿងនេះចំនួន៥គ្រឿងបានចូលថតនៅកំពង់ផែកំពង់សោម និង២គ្រឿងចតនៅហូជីមិញ» ។ សម្តេចបានបន្តថា តំបន់សេដ្ឋកិច្ចពិសេសស្វាយវៀង បើដឹកពីហូជីមិញមានភាពជិតជាងដឹកកំពង់សោមវាឆ្ងាយជាង ។ ចិនថានាវាទាំងនេះនឹងដឹកវត្ថុធាតុដើមមិនមែនតែត្រឹមថ្ងៃមីនានេះទេ គឺដឹករហូតដល់ថ្ងៃឧសភា និងរហូតដល់សភាពការណ៍ធូរស្រាល ។
ចំពោះការព្យួរការងារនៅតាមរោងចក្រមួយចំនួននោះសម្តេចតេជោក៏បានអំពាវនាវដល់ម្ចាស់រោងចក្រសហគ្រាស នានាទី១.សុំកុំឲ្យម្ចាស់រោងចក្រឆ្លៀតពេលបញ្ឈប់ ឬព្យួរការងារលុបចោលនូវកិច្ចសន្យាការងារនេះជាចំណុចដាច់ខាតមិនឲ្យមានសោះ ។ ទី២. សុំលើកលែងចំពោះមីក្រូ ឬធានាគារលើកលែងការប្រាក់សម្រាប់កម្មករដែលត្រូវបានព្យួរការងារ (ពន្យាការសង ឬមិនយកការប្រាក់) ក្នុងរយៈពេលត្រូវព្យួរការងារ ។ ទី៣.សុំឲ្យម្ចាស់បុរី ឬម្ចាស់ផ្ទះដែលលក់ផ្ទះឲ្យកម្មករ ឬអ្នកធ្វើការនៅតាមសណ្ឋាគារ ហើយត្រូវបានព្យួរការងារនេះពន្យាការបង់ប្រាក់ ។ កុំផ្តាច់ការប្រាក់ក្នុងពេលហ្នឹង ។ ព្រោះនៅពេលមិនបង់ការប្រាក់នោះគេនឹងដេញចេញពីផ្ទះ អីញ្ចឹងទេសុំឲ្យមានការយោគយល់ចំពោះបញ្ហានេះ ។
ក្នុងឱកាសនោះដែរ សម្តេចបានស្នើដល់អគ្គិសនីក៏ដូចជា រដ្ឋករទឹកក៏មានការយោគយល់ដល់អ្នកដែលព្យួរការងារដោយឲ្យជំពាក់សិនព្រោះថា អ្នកទាំងនោះមិនប្រើប្រាស់ច្រើននោះទេ ។ ជាមួយគ្នានោះដែរ សម្តេចតេជោបានអះអាងថា កម្មករដែលនឹងត្រូវព្យួរការងារនោះមិនដល់២ម៉ឺនាក់នោះទេ ។ ចំណោមអ្នកទាំងនេះអាច៥០%ជាប់ធនាគារដោយសារខ្ចីថវិកាធ្វើផ្ទះ និងធ្វើនេះ ធ្វើនោះ ៕ កែសម្រួលដោយ ៖ សុឃាក់
ចែករំលែកព័តមាននេះ