រាជធានីភ្នំពេញ ៖ ក្នុងកិច្ចខិតខំជួយសម្រួលដល់ការលំបាករបស់កម្មករ-កម្មការិនី ដែលមានបំណុលបង់រំលោះផ្ទះ ហើយត្រូវបានព្យួរការងារបណ្តោះអាសន្ននោះ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានប្រកាសឲ្យដឹងនៅព្រឹកថ្ងៃទី ៩ មីនា នេះថា សម្តេចបានសុំអោយម្ចាស់បុរីលំនៅឋានទាំងអស់ ដែលរំលួសផ្ទះជាមួយបងប្អូនកម្មករត្រូវពន្យារការបង់ និងកុំផ្តាច់កុងត្រានោះអី។ ជាពិសេស សម្តេចក៏សូមអោយអគ្គិសនីកម្ពុជា អនុញ្ញាតអោយកម្មករ-កម្មការិនីជំពាក់ថ្លៃភ្លើងសិន ក្នុងអំឡុងពេលនេះ។
កាន់តែរីករាយទៀតនោះ គឺថាសម្តេចតេជោ នាឱកាសចូលរួមពិធីសម្ពោធដាក់ឱ្យប្រើប្រាស់ផ្លូវជាតិលេខ៥៥ តភ្ជាប់ពីផ្លូវជាតិលេខ៥ ក្នុងទីរួមខេត្តពោធិ៍សាត់ ឆ្ពោះទៅកាន់ព្រំដែនថ្មដា ជាប់ជាមួយខេត្តត្រាត ប្រទេសថៃ និងបើកការដ្ឋានសាងសង់ផ្លូវជាតិ១០ តភ្ជាប់ពីសំឡូត ទៅខេត្តកោះកុង សម្តេចបានប្រកាសជូននូវដំណឹងល្អសំរាប់កម្មករកម្មការិនី ដោយក្នុងនោះ មិត្តចិនបានផ្តល់នាវាចំនួន០៧គ្រឿង ដឹកវត្ថុធាតុដើម មកមកប្រើប្រាស់ក្នុងរោងចក្រនៅកម្ពុជាចាប់ពីខែមីនានេះ រហូតដល់ខែឧសភា ឆ្នាំ២០២០។
ទន្ទឹមនឹងនេះ នៅថ្ងៃនេះផងដែរ សម្តេចតេជោបានអំពាវនាវ០៤ចំណុចសំខាន់៖ ១-សូមរោងចក្រនានាមេត្តាកុំលុបចោលកិច្ចសន្យាការងារជាមួយកម្មករ-កម្មការិនី ។ ២-ចំពោះមីក្រូហិញ្ញវត្ថុទាំងអស់ ត្រូវពន្យារការសង ឬការមិនយកការប្រាក់ដល់កម្មករ កម្មការិនី ដែលបានជំពាក់លុយនៅមីក្រូហិរញ្ញវត្ថុនោះ ។
សូមរម្លឹកថា អ្នកនាំពាក្យក្រសួងការងារបានបញ្ជាក់ថា ដោយសារតែវីរុសកូវីដ-១៩ ដែលបានផ្ទុះនៅចិននិងកំពុងរីករាលខ្លាំង នៅតាមបណ្តាប្រទេសផ្សេងៗធ្វើឲ្យប៉ះពាល់ដល់រោងចក្រសហគ្រាសប្រមាណ ២០០ និងកម្មករប្រមាណ១៦ម៉ឺននាក់ ប្រឈមមុខនឹងការព្យួរការងារមួយរយៈ ។
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ