រាជធានីភ្នំពេញ ៖ ដោយសារតែមានវប្បធម៌ ចែករំលែក នូវក្តីស្រឡាញ់ ចំពោះមនុស្សជុំវិញខ្លួន ជាពិសេសសម្រាប់សម្រួលភាពលំបាករបស់អ្នកទីទាល់ អ្នកនាង ស្រីអូន បានរំលេចភាពមនុស្សធម៌សារជាថ្មី។…
រាជធានីភ្នំពេញ ៖ ដោយសារតែមានវប្បធម៌ ចែករំលែក នូវក្តីស្រឡាញ់ ចំពោះមនុស្សជុំវិញខ្លួន ជាពិសេសសម្រាប់សម្រួលភាពលំបាករបស់អ្នកទីទាល់ អ្នកនាង ស្រីអូន បានរំលេចភាពមនុស្សធម៌សារជាថ្មី។ អ្នកនាងនឹងសហការី បានប្រមូលនូវសម្ភារៈប្រើប្រាស់ និងគ្រឿងបរិភោគ ចែកដល់លោកពូ និងលោកតា រត់ស៊ីក្លូ ចំឱកាសថ្ងៃ ៨ មីនា ទិវាសិទ្ធិនារីអន្តរជាតិ។
នេះមិនមែនជា ឱកាសទី១នោះទេ ដែលអ្នកនាង ស្រីអូន តារាល្បីនៅក្នុងហ្វេសប៊ុក ហើយគេស្គាល់ថា ជានាយិកា ក្រុមហ៊ុនសម្រស់ធម្មជាតិ ពាំនាំរូបភាពមនុស្សធម៌។ ជាការមើលឃើញអ្នកនាង រមែងបង្រៀនដល់សហការីទាំងអស់ ត្រូវចេះបង្ហាញក្តីស្រឡាញ់ដល់ មនុស្សជុំវិញខ្លួន មិនត្រូវសម្ងំយកសុខតែឯងនោះទេ។
ជាក់ស្តែង កាលពីថ្ងៃទី៨ មីនា ឆ្នាំ២០២០ មុននេះ អ្នកនាងស៊ុន្ទរី នួន ហៅស្រីអូន បានដឹកនាំសមាជិកជាច្រើនរូប ដើម្បីយកអំណោយចែកដល់អ្នករត់ស៊ីក្លូប្រមាណជិត៣០០នាក់ ។ កាយវិការដ៏សាមញ្ញ បង្ហាញនូវទឹកចិត្តរាប់អាន បានធ្វើឱ្យលោកតាស៊ីក្លូមួយចំនួនរំភើបចិត្ត ហើយខ្លះជូនពរជ័យដល់អ្នកនាង និងគ្រួសារបងប្អូន សុខសប្បាយ។ ពិសេសអ្នកនាងស្រីអូន ហាក់ទ្រាំទ្របាននូវកំដៅថ្ងៃ មិនខ្លាចហត់ ។ អ្វីដែលរំជួលចិត្ត អ្នកនាងបានហូរទឹកភ្នែកអាណិតដល់ពួកគាត់ដែលតស៊ូជីវិត ព្រោះអ្នកនាងក៏តស៊ូជីវិតមិនធម្មតាដែរ នាអតីតកាល។
អ្នកនាងស្រីអូន នាយិកាក្រុមហ៊ុន «សម្រស់ធម្មជាតិ» បានឱ្យដឹងថា អំណោយទាំងអស់កើតចេញពីទឹកចិត្តសមាជិក ប្រមូលចូលគ្នាតាមទឹកចិត្ត។ របស់ប្រើប្រាស់មាន អង្រឹង មុង ត្រីខ ទឹកក្រូច និងថវិកា។ ក្រៅពីនេះ យើងបានចែករំលែកខ្លះទៀតដល់ អ្នកក្រៅបញ្ជីជូនពួកគាត់ មិនអាចមើលរំលងបាន។ អត្ថន័យពេលនេះ ដើម្បីយកថ្ងៃពិសេសរបស់នារីមកចែកក្តីស្រឡាញ់ដល់អ្នកលំបាក។ យើងនឹងរៀបគម្រោងវិលមកជួបពួកគាត់ទៀត នាឱកាសណាមួយ។ ឆាប់ខាងមុខយើងនឹងទៅជួបបងៗ ឬស្ត្រីផ្ទុកមេរោគអេដស៍ នាអង្គការមួយដើម្បីសំណេះសំណាលលើកទឹកចិត្ត។ ដោយសហការ (កែសម្រួលដោយ ៖ បុប្ផា)
ចែករំលែកព័តមាននេះ