រាជធានីភ្នំពេញ ៖ក្រោយបែកបាក់ភរិយា តារាកំប្លែងមាឌតូចល្អិតនាយក្រិន បានបាត់មុខពីក្រុមកំប្លែងនាយកុយ បន្ទាប់ពីតារារូបនេះបែកបាក់ភរិយា ។ ការបែកបាក់ភរិយាបន្សល់ទុកកូន៣នាក់ក្នុងបន្ទុក ដែលត្រូវបង្ខំចិត្តចាកចេញពីរាជធានីភ្នំពេញទៅរស់នៅខេត្តបាត់ដំបង ទីដែលជាកន្លែងកំណើតរបស់នាយ ។
ទស្សនិកជនបានចាប់អារម្មណ៍ថា នាយ ក្រិន មិនបានឃើញសម្តែងដូចមុនជាមួយក្រុមនាយកុយ នៅក្នុងកម្មវិធីសោភ័ណតន្ត្រី ដែលផ្សាយផ្ទាល់រៀងរាល់ថ្ងៃសៅរ៍នោះឡើយ បន្ទាប់ពីនាយបានពើបប្រទេះរឿងអាស្រូវជីវិតប្ដីប្រពន្ធផ្អើលអស់មហាជន ។
ការបាត់ខ្លួនពីឆាកសម្តែងនេះមិនត្រូវបានគេដឹងមូលហេតុច្បាស់លាស់នោះឡើយ បើសូម្បីប្រធានក្រុមកំប្លែងនាយកុយ ក៏មិនដែលបានបញ្ជាក់ពីការបាត់មុខរបស់នាយក្រិន ពីឆាកសម្តែងនោះដែរ ស្របពេលដែលក្រុមកំប្លែងរបស់លោកក៏ត្រូវបានជម្រុះចេញសល់តិចនាក់ផងនោះ ។
យ៉ាងណាក៏ដោយជុំវិញបញ្ហានេះ តារាកំប្លែងរួមក្រុម និងជាមិត្តភក្តិដ៏ជិតស្និទ្ធមួយរូបរបស់នាយក្រិន គឺនាយហុងដា បានអះអាងកាលពីពេលថ្មីៗកន្លងមកថា មូលហេតុសំខាន់ដែលនាយក្រិន បាត់វត្តមានសម្តែងកំប្លែងជាមួយក្រុមនាយកុយ គឺដោយសារបញ្ហាសុខភាព ។
នាយ ហុង ដា បានបញ្ជាក់ប្រាប់កោះសន្តិភាពតាមសារអេឡិចត្រូនិកថា នាយក្រិន បានធ្លាក់ខ្លួនឈឺរួមទាំងកូនរបស់នាយផង ហើយពេលនេះនាយកំពុងរស់នៅឯស្រុកកំណើតនាខេត្តបាត់ដំបង ជាហេតុធ្វើឲ្យពិបាកធ្វើដំណើរមកសម្តែងនៅភ្នំពេញ ។ នាយហុងដាបញ្ជាក់ថា «វា(នាយក្រិន)មិនបានលេងនៅប៉ុស្តិ៍ដោយសារវាមានជំងឺ ហើយកូនវាក៏ឈឺបណ្តាក់គ្នា ។ ដោយសារតែឈឺបែបនេះ វាពិបាកពេកក៏ទៅនៅបាត់ដំបងមួយរយៈដើម្បីមើលខ្លួន ឈឺទាំងឪពុកទាំងកូន មិនដឹងជានរណាមើលនរណា បើ ប៉ុនៗគ្នាអ៊ីចឹង ។
សម្រាប់ការងារការគ្រប់គ្រងហាងវិញ គឺបានបងថ្លៃ ក្មួយ ហើយជួនកាលរូបខ្ញុំទៅជួយមើល និងគ្រប់គ្រងជំនួសនៅពេលទំនេរ ហើយពេលដែលនាយក្រិន បានធូស្រាលពីជំងឺគឺបានឡើងពីបាត់ដំបងមកភ្នំពេញជួយមើលហាងម្តងទៅ»។
បើកតាមនាយហុង ដា ពេលខ្លះនៅពេលមានកម្មវិធីណាគេហៅមកសម្តែងនោះ នាយ ក្រិន ក៏បានខិតខំក្រោកមកទាំងឈឺ ដើម្បីបានលុយខ្លះទុកមើលថែជំងឺ ព្រោះនាយកុយ ក្រិន មិនមានជំនាញអ្វីក្រៅពីកំប្លែងនោះឡើយ ហេតុនេះលោកតែងតែហៅដើរលេងកំប្លែងម្តងម្កាលនៅពេលមានគេហៅ ។
នាយហុង ដា បានឲ្យដឹងទៀតថា សម្រាប់រឿងគ្រួសារវិញរវាងនាយក្រិន និងភរិយា នោះគឺត្រូវបានបញ្ចប់ទាំងស្រុងរួចហើយ ដោយភរិយារបស់នាយមិនដែលបានទាក់ទងមកម្តងណាឡើយ បន្ទាប់ពីមានរឿងរ៉ាវប្រះឆា បែកបាក់គ្នាកាលពីពេលកន្លងមកនេះ ។
តារាកំប្លែងមាឌល្អិតនាយក្រិន បានធ្វើឲ្យមហាជនមានការភ្ញាក់ផ្អើលចំពោះដំណឹងបែកធ្លាយថា ភរិយារបស់លោកផិតក្បត់លោកជាច្រើនលើក បន្ទាប់ពីមានកូនបីនាក់រួចហើយ។ ការបែកបាក់នេះត្រូវនាយក្រិន ធ្លាប់បានអះអាងថា កើតឡើងប្រមាណជាង២ខែហើយ ។ តាមដំណើររឿងគឺក្នុងអំឡុងខែសីហាកន្លងទៅ លោកមានជំងឺ ហើយបានទៅសម្រាកព្យាបាលនៅស្រុកកំណើតឯខេត្តបាត់ដំបង ដោយទុកភរិយានៅមើលហាងផឹកស៊ីតែម្នាក់ឯង ។
លុះត្រឡប់មកវិញ លោកក៏ចាប់អារម្មណ៍ថា ភរិយាលោកមានអាការប្លែក និងចេះតែតែងខ្លួនស្អាតៗរាល់ថ្ងៃ ។ ដូច្នេះហើយ លោកក៏ចាប់ផ្ដើមតាមដាន ហើយក៏បានដឹងរឿងតែម្ដង គឺភរិយាបានលួចទាក់ទងអ្នកផ្សេងទៀតក្បត់លោក ហើយលោកបានឃើញផ្ទាល់ភ្នែកតែម្ដង ។ លោកថា រឿងដល់ដំណាក់កាលនេះ មហាជនដឹងពេញទឹកពេញដីហើយ លោកដាច់ខាតមិនបកក្រោយ ទទួលយកភរិយាវិញនោះទេ បើទោះជាភរិយា ដឹងកំហុសហើយសុំជានាគ្នាវិញក៏ដោយ ។
តារាកំប្លែងមាឌល្អិតរូបនេះពោលថា ជួបរឿងរ៉ាវជីវិតគូម្ដងហើយម្ដងទៀតបែបនេះ លោកថា រាងចាលនឹងឆាកជីវិតមួយនេះ លែងចង់យកភរិយាទៀតហើយ ៕ (កែសម្រួលដោយ ៖ បុប្ផា)
ចែករំលែកព័តមាននេះ