រាជធានីភ្នំពេញ ៖ ធនាគារ អេស៊ីលីដា បានផ្ដល់ឱកាសដល់សាធារណជនក្លាយជាម្ចាស់ភាគហ៊ុនិក ដោយបានបោះផ្សាយលក់មូលបត្រកម្មសិទ្ធិជាសាធារណៈ ហើយអ្នកមានទុនកាន់តែច្រើននឹងក្លាយជាម្ចាស់ភាគទុនិកកាន់តែធំនៅក្នុងធនាគារដ៏ធំក្នុងស្រុកមួយនេះដោយមិនមានការកំណត់ចំនួនណាមួយលក់ទៅលើបុគ្គលណាម្នាក់ឡើយ ។ ធនាគារ អេស៊ីលីដា…
រាជធានីភ្នំពេញ ៖ ធនាគារ អេស៊ីលីដា បានផ្ដល់ឱកាសដល់សាធារណជនក្លាយជាម្ចាស់ភាគហ៊ុនិក ដោយបានបោះផ្សាយលក់មូលបត្រកម្មសិទ្ធិជាសាធារណៈ ហើយអ្នកមានទុនកាន់តែច្រើននឹងក្លាយជាម្ចាស់ភាគទុនិកកាន់តែធំនៅក្នុងធនាគារដ៏ធំក្នុងស្រុកមួយនេះដោយមិនមានការកំណត់ចំនួនណាមួយលក់ទៅលើបុគ្គលណាម្នាក់ឡើយ ។
ធនាគារ អេស៊ីលីដា បានប្រកាសលក់មូលបត្រកម្មសិទ្ធិជាសាធារណៈតាំងពីចុងឆ្នាំ ២០១៩ មកម្ល៉េះ ដោយបានទទួលការអនុញ្ញាតពីគណៈកម្មការមូលបត្រកម្ពុជាផងដែរ ។ ចាប់តាំងពីទទួលបានភ្លើងខៀវពីគណៈកម្មការមូលបត្រកម្ពុជា ធនាគារអេស៊ីលីដា បានជំរុញការផ្សព្វផ្សាយរបស់ខ្លួនកាន់តែខ្លាំង ដោយបានរៀបចំនូវសិក្ខាដល់សាធារណជនជាបន្តបន្ទាប់ និងឈានដល់ការបង្ហាញព័ត៌មានលម្អិត ឬហៅថា រ៉ូដសូ ទៀតផង ជាក់ស្ដែងកម្មវិធី រ៉ូដសូ លើកទី១ មានអ្នកចូលរួមដល់ជាង៥០០នាក់ លើសពីការរំពឹងទុករបស់ខ្លួនដែលរំពឹងថាត្រឹម៣០០នាក់ ។
លោក ស៊ូ សុជាតិ អគ្គនាយកគណៈកម្មការមូលបត្រកម្ពុជា បានមានប្រសាសន៍ថា ធនាគារ អេស៊ីលីដា ជាធនាគារពាណិជ្ជដំបូងដែលធ្វើការ បោះផ្សាយលក់មូលបត្រកម្មសិទ្ធិជាសាធារណៈ។ ប្រសិនបើមិនមានឆន្ទៈដ៏មុះមុត និងការដឹកនាំដ៏ខ្លាំងរបស់ថ្នាក់ដឹកនាំធនាគារទេ យើងមិនអាចឈានដល់ដំណាក់កាលថ្ងៃនេះទេ ហើយវាជាឱកាសសម្រាប់សាធារណជនដែលមានចំណាប់អារម្មណ៍ ព្រោះចំនួនភាគហ៊ុនច្រើនគួរសមសម្រាប់ធ្វើការបោះផ្សាយលក់។ ចង់ទិញប៉ុន្មានក៏បានឲ្យតែមានលុយ ។
លោកស្រី ម៉ារ អមរ៉ា អនុប្រធាននាយកប្រតិបត្តិ និងជាគណៈប្រធាននាយិកាប្រតិបត្តិហិរញ្ញវត្ថុ បានមានប្រសាសន៍បន្ថែមថា សាធារណជនអាចចូលរួមធ្វើប៊ុកបៀលឌីង ដោយដាក់សំណើរចាប់ពី១០០ មូលបត្រកម្មសិទ្ធិ (ភាគហ៊ុន) ឡើងទៅ ដោយកើនម្តង (១០ ឯកតាមូលបត្រកម្មសិទ្ធិ) ហើយមិនមានកំណត់ចំនួនភាគហ៊ុនអតិបរមាដែលចង់ដាក់ពាក្យស្នើសុំទេ។ វិនិយោគិនចង់ដាក់ពាក្យស្នើសុំទិញភាគហ៊ុនប៉ុន្មានក៏បាន ។
ធនាគារ អេស៊ីលីដា ភីអិលស៊ី បានចាប់ផ្តើមដំណើរការប៊ុកបៀលឌីងជាផ្លូវការចាប់ពីថ្ងៃទី០៣ ខែមីនា ហើយនឹងបញ្ចប់នៅ ថ្ងៃទី១៤ ខែមីនា ឆ្នាំ២០២០ (ម៉ោង៨:០០ព្រឹក ដល់ម៉ោង ៥:០០ ល្ងាច ពីថ្ងៃចន្ទ ដល់ ថ្ងៃសៅរ៍) និងបានកំណត់ថ្លៃមូលបត្រកម្មសិទ្ធិ (ភាគហ៊ុន) នៅក្នុងចន្លោះថ្លៃ ចាប់ពី ១៥.០០០ រៀល ដល់ ១៧.៤០០ រៀល ក្នុងមួយភាគហ៊ុន ។
គួរបញ្ជាក់ថា ធនាគារអេស៊ីលីដា បានចាប់ផ្ដើមជាមួយនឹងទុនប្រមាណ៦៣ម៉ឺនដុល្លារអាមេរិកប៉ុណ្ណោះ កាលពីឆ្នាំ ១៩៩៣ និងបានរីកចម្រើនរហូតដល់មានទុនជាង៩០០លានដុល្លារអាមេរិក នាពេលបច្ចុប្បន្ន ក្នុងនោះដែរ ទ្រព្យសកម្មរបស់ធនាគារមួយនេះ មានប្រមាណ ៦ពាន់លានដុល្លារអាមេរិក សម្រាប់បម្រើក្នុងវិស័យធនាគារ៕ (កែសម្រួលដោយ ៖ បុប្ផា)
ចែករំលែកព័តមាននេះ