រាជធានីភ្នំពេញ ៖ គ្រោះថ្នាក់ចរាចរណ៍រវាងរថយន្តបុកជាមួយម៉ូតូ បណ្តាលឱ្យមនុស្សម្នាក់បាត់បងជីវិតភ្លាមនៅនឹងកន្លែងកើតហេតុ និង២នាក់ទៀតរងរបួសធ្ងន់ ត្រូវបានរថយន្តឯកជនដឹកយកទៅសង្គ្រោះភ្លាមៗ ។ ហេតុការណ៍ខាងលើនេះបង្កអោយមានការភ្ញាក់ផ្អើលកាលពីវេលាម៉ោង១១និង៣០នាទីយប់ថ្ងៃទី៦ ខែមីនា ឆ្នាំ២០២០…
រាជធានីភ្នំពេញ ៖ គ្រោះថ្នាក់ចរាចរណ៍រវាងរថយន្តបុកជាមួយម៉ូតូ បណ្តាលឱ្យមនុស្សម្នាក់បាត់បងជីវិតភ្លាមនៅនឹងកន្លែងកើតហេតុ និង២នាក់ទៀតរងរបួសធ្ងន់ ត្រូវបានរថយន្តឯកជនដឹកយកទៅសង្គ្រោះភ្លាមៗ ។
ហេតុការណ៍ខាងលើនេះបង្កអោយមានការភ្ញាក់ផ្អើលកាលពីវេលាម៉ោង១១និង៣០នាទីយប់ថ្ងៃទី៦ ខែមីនា ឆ្នាំ២០២០ ត្រង់ចំណុចស្តុបទំនប់កប់ស្រូវ ផ្លូវជាតិលេខ៤ ភូមិជម្ពូវ័ន សង្កាត់ចោមចៅទី៣ ខណ្ឌពោធិ៍សែនជ័យ ។
ជនរងគ្រោះម្នាក់ដែលបាត់បង់ជីវិត និងជនរងគ្រោះ២នាក់ទៀតដែលរងរបួសធ្ងន់ មិនស្គាល់អត្តសញ្ញាណនោះទេ ។ ជនរងគ្រោះទាំង៣នាក់ជិះម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០២០ ពណ៌ខ្មៅ ពាក់ស្លាកលេខ ភ្នំពេញ ១IA-៦០៥៥ ។
ចំណែករថយន្តយីឌុបមួយគ្រឿងម៉ាកហ៊ីយ៉ាន់ដាយ ពណ៌សលាយក្រហម ពាក់ស្លាកលេខ ព្រះសីហនុ ៣A-៤៨៦៣ អ្នកបើកបរមិនស្គាល់អត្តសញ្ញាណ ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេឃើញរថយន្ត យីឌុបមួយគ្រឿងបើកបរក្នុងទិសដៅពីជើងទៅត្បូង ហើយបត់ឆ្លងផ្លូវ ស្រាប់តែមានម៉ូតូ១គ្រឿងម៉ាកហុងដាឌ្រីម ជិះគ្នា៣នាក់ បើកបរក្នុងទិសដៅពីកើតទៅលិចក្នុងល្បឿនយ៉ាងលឿន ។
តាមប្រភពដដែលបានបន្តថា លុះមកដល់ចំណុចស្តុបខាងលើដែលមានភ្លើងពណ៌លឿងជាសញ្ញាឱ្យប្រុងប្រយ័ត្នទាំងអស់គ្នា ស្រាប់តែម៉ូតូវាក់អើនឹងរថយន្ត ដោយម៉ូតូជាន់ហ្វ្រាំងមិនជាប់ក៏ជ្រុលទៅបុកកង់រថយន្តយ៉ាងពេញទំហឹង បណ្តាលឲ្យដួលបោកនឹងថ្នល់បាត់បង់ជីវិតម្នាក់ភ្លាមៗនៅនិងកន្លែងកើតហេតុ ចំណែក២នាក់ទៀតរងរបួសធ្ងន់ត្រូវបានរថយន្តរបស់គ្លីនិកឯកជន ដឹកយកទៅសង្គ្រោះភ្លាមៗ។ ចំណែករថយន្តបានព្យាយាមបើកចេញពីកន្លែងកើតហេតុបានប្រមាណ៥០ម៉ែត្រ ហើយក៏ឈប់រថយន្ដអែបខាង បន្ទាប់មកអ្នកបើកបររត់គេចខ្លួនបាត់ស្រមោល។
ក្រោយពេលកើតហេតុ កំលាំងសមត្ថកិច្ចនគរបាលប៉ុស្តិ៍ចោមចៅទី៣បានចុះមកដល់កន្លែងកើតហេតុ ហើយអន្តរាគមន៍ និងធ្វើចរាចរណ៍ដើម្បីកុំអោយមានការកកស្ទះ រួចបានទាក់ទងទៅផ្នែកជំនាញចរាចររាជធានីភ្នំពេញភ្លាមៗផងដែរ។
ក្រោយពេលកើតហេតុ ផ្នែកជំនាញចរាចរណ៍រាជធានីភ្នំពេញធ្វើការបានវាស់វែងយករថយន្ត និងម៉ូតូទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញរង់ចាំធ្វើការដោះស្រាយនៅថ្ងៃក្រោយ ។ ចំណែកជនរងគ្រោះម្នាក់ដែលបាត់បង់ជីវិត សមត្ថកិច្ចអោយរថយន្តដឹកយកទៅរក្សាទុកនៅវត្តទឹកថ្លា រង់ចាំសាច់ញាតិមកទទួលយកទៅធ្វើបុណ្យតាមប្រពៃណី ៕ (កែសម្រួលដោយ ៖ ធីតា)
ចែករំលែកព័តមាននេះ