តាមរបាយការណ៍ជាច្រើននៅភាគខាងជើងនៃប្រទេសអុីតាលី ដែលកំពុងជាប់គាំងដោយសារការរីករាលដាលនៃវីរុស Covid-19 បានធ្វើឱ្យមន្ត្រីជាន់ខ្ពស់ AIC បានអំពាវនាវឱ្យមានការផ្អាក ការប្រកួតបាល់ទាត់ទាំងអស់រដូវកាលនេះ។
លោក Damiano Tommasi ប្រធានសមាគមកីឡាបាល់ទាត់អុីតាលី (Italian Footballers’ Association) ហៅកាត់ AIC ចង់ឲ្យការប្រកួតកីឡាបាល់ទាត់ទាំងអស់នៅក្នុងប្រទេសអុីតាលី ត្រូវផ្អាកទាំងអស់ជាងធ្វើឡើងដោយគ្មានអ្នកទស្សនា (Closed Doors) បន្ទាប់ពីមានសេចក្តីរាយការណ៍ថា តំបន់ជាច្រើននៅភាគខាងជើងនៃប្រទេសអុីតាលីនឹងត្រូវបានបិទ។
យោងតាមប្រព័ន្ធផ្សព្វផ្សាយព័ត៌មានជាច្រើន ក្នុងប្រទេសអុីតាលីបានអះអាងថា តំបន់ Lombardy ដែលរួមបញ្ចូលទាំងទីក្រុង Milan និង Bergamo និងខេត្តជិតខាងចំនួន១១ផ្សេងទៀត នឹងត្រូវបានបិទការចេញចូល ដែលជាផ្នែកមួយនៃគោលនយោបាយរបស់រដ្ឋាភិបាល ដើម្បីគ្រប់គ្រងការរីករាលដាលនៃវីរុសឆ្លងនេះ។ ក្នុងកាលៈទេសៈបែបនេះ គ្មាននរណាម្នាក់អាចត្រូវបានអនុញ្ញាតឱ្យចាកចេញ ឬចូលតំបន់ទាំងនោះទេ លើកលែងតែមានការចំបាច់ខ្លាំងមិនអាចជៀសផុតបាន។
ប្រទេសអុីតាលីមានករណីឆ្លងវីរុស Covid-19 បានកើនឡើងជិត ៦.០០០ករណីដែលបានបណ្តាលឱ្យបាត់បង់ជីវិតមនុស្សចំនួន២៣៣នាក់នៅក្នុងប្រទេស។ ការរីករាលដាលនៃវីរុសនេះ បាននាំឱ្យការប្រកួតកីឡាបាល់ទាត់ទាំងអស់ ត្រូវធ្វើឡើងដោយគ្មានអ្នកទស្សនា (Closed Doors) រហូតដល់ថ្ងៃទី៣ មេសា ៕ (ប្រភព៖ Goal.com)
ចែករំលែកព័តមាននេះ