រាជធានីភ្នំពេញ ៖ អណ្តាតភ្លើងក្រហមច្រាលឡើងលើភ្លឺចិញ្ចាចពេញផ្ទៃមេឃ និងផ្សែងខ្មៅហុយឃ្មួញខ្មាញ់ទាំងកណ្តាលយប់ ដោយបង្កអោយមានការភ្ញាក់ផ្អើលយ៉ាងខ្លាំងទៅដល់កម្លាំងមានសមត្ថកិច្ច និងរថយន្តពន្លត់អគ្គិភ័យមកពីគ្រប់ទិសទី ។ ករណីអគ្គិភ័យនេះបានឆាបឆេះអស់រយៈពេលជាង៣ម៉ោងដោយឆេះបំផ្លាញអស់ផ្ទះ តូច ធំ…
រាជធានីភ្នំពេញ ៖ អណ្តាតភ្លើងក្រហមច្រាលឡើងលើភ្លឺចិញ្ចាចពេញផ្ទៃមេឃ និងផ្សែងខ្មៅហុយឃ្មួញខ្មាញ់ទាំងកណ្តាលយប់ ដោយបង្កអោយមានការភ្ញាក់ផ្អើលយ៉ាងខ្លាំងទៅដល់កម្លាំងមានសមត្ថកិច្ច និងរថយន្តពន្លត់អគ្គិភ័យមកពីគ្រប់ទិសទី ។ ករណីអគ្គិភ័យនេះបានឆាបឆេះអស់រយៈពេលជាង៣ម៉ោងដោយឆេះបំផ្លាញអស់ផ្ទះ តូច ធំ អស់ចំនួន២៧ខ្នង ទ្រព្យសម្បត្តិអស់មួយចំនួនធំ បង្កអោយមានមនុស្សចំនួន៤នាក់រងរបួសស្រាល (មន្ត្រីពន្លត់អគ្គិភ័យ៣នាក់ និងប្រជាពលរដ្ឋម្នាក់) តែមិនអ្នកណាម្នាក់រងរបួសធ្ងន់ធ្ងរ ឬបាត់បង់ជីវិតឡើយ នេះគ្រាន់តែជាជំហានដំបូងប៉ុណ្តោះ ។
តាមប្រភពព័ត៌មានពីនគរបាលបានប្រាប់ឱ្យដឹងថា មុនពេលកើតហេតុគេបានឭសំឡេងផ្ទុះកំប៉ុងហ្គាសមួយលាន់ឭតែ «ភូស»ចេញពីផ្ទះថ្មបេតុងប្រកក្បឿងនៅភូមិ១២ ផ្លូវលេខ៦៣ (ផ្លូវត្រសក់ផ្អែម) ក្នុងសង្កាត់ផ្សារថ្មីទី៣ ខណ្ឌដូនពេញនាវេលាម៉ោង១០និង៣០នាទីយប់ ថ្ងៃទី០៦ ខែមីនា ដែលមានម្ចាស់ឈ្មោះ មាន សំអាត អាយុ៦៣ឆ្នាំ មុខរបរជាមន្ត្រីកងរាជអាវុធហត្ថម្នាក់ ។
ភ្លាមនោះក៏ស្រាប់តែឃើញមានអណ្តាតភ្លើងក្រហមច្រាលឆេះឡើងតែម្តង ដោយបានបង្កអោយមានការភ្ញាក់ផ្អើលកើតឡើងទៅដល់បងប្អូនប្រជាពលរដ្ឋដែលរស់នៅក្បែរខាងភ័យស្លន់ស្លោនាំគ្នារត់ទៅយកទឹក និងបំពង់ពន្លត់អគ្គិភ័យទៅធ្វើការពន្លត់ និងខ្លះទៀតនាំគ្នាស្រវ៉េស្រវ៉ារត់ទៅជញ្ជូនអីវ៉ាន់ចេញពីផ្ទះរបស់ពួកគាត់យកចេញក្រៅរៀងៗខ្លួន ។ ដោយសារតែមានផ្ទះជាច្រើននៅជាប់ៗគ្នានោះភ្លើងក៏កាន់តែឆេះរាលដាលយ៉ាងឆាប់រហ័សរាលដាលឆ្លងពីផ្ទះមួយទៅផ្ទះមួយ និងមានអណ្តាតភ្លើងក្រហមច្រាលលាយឡំដោយផ្សែងខ្មៅក្រាស់ឃ្មឹកឡើងលើ ហើយបង្កអោយមានការភ្ញាក់ផ្អើលទៅដល់កម្លាំងមានសមត្ថកិច្ចមូលដ្ឋាន ខណ្ឌដូនពេញជាច្រើននាក់ចុះមកដល់ និងរ៉ឺម៉កម៉ូតូដឹកទឹករបស់សាលាខណ្ឌជាច្រើនគ្រឿងចុះមកជួយបាញ់ទឹកពន្លត់ផងដែរ ។
ក្នុងករណីអគ្គិភ័យនេះដែរ គឺបានកើតឡើងយ៉ាងឆាប់រហ័យបំផុត ដោយសារតែផ្ទះជាច្រើនខ្នងនៅជាប់ៗគ្នានិងនៅលើជាន់ទី១ ខាងលើសំណង់អគារមួយខ្នងដ៏ធំ ដែលបន្សល់ទុកជាយូរឆ្នាំមកហើយ តាំងពីជំនាន់បារាំងនោះធ្វើអោយកម្លាំងជំនាញ ពន្លត់អគ្គិភ័យ មានការលំបាកមិនអាចឡើងទៅខាងលើ ឬក៏ចូលទៅពន្លត់ខាងក្នុងបានឡើយ ហើយក៏បានបង្កអោយមន្ត្រីពន្លត់អគ្គិភ័យចំនួន៣នាក់ និងបុរសម្នាក់ (សរុប៤នាក់) រងរបួសស្រាល ។ ករណីអគ្គិភ័យខាងលើនេះដែររថយន្តពន្លត់អគ្គិភ័យចំនួន៤២គ្រឿង និងប្រើប្រាស់ទឹកបាញ់អស់ចំនួន១៣៨ឡានទើបធ្វើអោយភ្លើងរលត់ ។
ពាក់ព័ន្ធទៅនឹងករណីអគ្គិភ័យឆេះខាងលើនេះនៅព្រឹកថ្ងៃទី០៧ ខែមីនានេះ គណៈកម្មាធិការចម្រុះបានចុះមកធ្វើការស្រាវជ្រាវរកពីមូលហេតុនៃការឆេះផងដែរ តែនៅមិនទាន់បានដឹងថា ឆេះមកពីមូលហេតុអ្វីច្បាស់នៅឡើយ ។
ដោយតាមប្រភពខ្លះបានបញ្ជាក់ប្រាប់ថា «កើតឡើងដោយសារតែការផ្ទុះកំប៉ុងហ្គាសដាំបាយ និងខ្លះទៀតថា កើតឡើងដោយសារតែការឆ្លងចរន្តអគ្គិនី» និងមួយចំនួនថា បានឃើញភ្លើងឆេះចេញពីផ្ទះរបស់មន្ត្រីអាវុធហត្ថម្នាក់ខាងលើ និងខ្លះទៀតបញ្ជាក់ប្រាប់ថា បានឃើញភ្លើងឆេះឡើងចេញពីផ្ទះរបស់ប្រជាពលរដ្ឋម្នាក់ទៀត» និងមិនទាន់ដឹងច្បាស់ថា ករណីនេះកើតឡើងដោយមូលហេតុអ្វី និងផ្ទះណាមួយច្បាស់ឡើយ ដោយរង់ចាំធ្វើការស្រាវជ្រាវជាបន្តទៅទៀតប៉ុណ្ណោះ ៕
ចែករំលែកព័តមាននេះ