រាជធានីភ្នំពេញ ៖ មន្ត្រីស្ថានទូតខ្មែរប្រចាំនៅប្រទេសកូរ៉េបានអោយដឹងថា បន្ទាប់ពីបានបង្កើតក្រុមការងារពិសេសចំពោះកិច្ចសម្រាប់តាមដាន និងរាយការណ៍អំពីមេរោគ COVID-19 នៅប្រទេសកូរ៉េ ដែលផ្តោតការយកចិត្តទុកដាក់ជាអាទិភាពពីសុខមាលភាពរបស់ប្រជាពលរដ្ឋខ្មែរជាចម្បង និងបន្ទាប់ពីទទួលបានការឧបត្ថមពីសប្បុរសជននានាទាំងក្នុង និងក្រៅប្រទេស នៅថ្ងៃទី៧ ខែមីនានេះ ក្រុមការងារបានរៀបចំវេចខ្ចប់ម៉ាស់(ស្តង់ដាNF94) ចំនួន១០០០ម៉ាស់ និងទឹកលាងដៃចំនួនជិត ៣០០០ ពាន់ ដែលមានគុណភាពខ្ពស់ នូវដំណាក់កាលទី១ ដោយឥតគិតថ្លៃ ។
ដើម្បីផ្ញើជូនដល់សហគមន៍ខ្មែរដែលកំពុងរស់នៅធ្វើការ និងសិក្សានៅប្រទេសកូរ៉េ ជាពិសេសនៅតំបន់ថេហ្គូ និងខេត្តខ្យងសាង ជាអាទិភាព ដោយសារតែជាតំបន់ដែលមានការរីករាលដាលខ្លាំង ។ នីតិវិធីងាយៗក្នុងការស្នើសុំម៉ាស់ពីស្ថានទូត គឺគ្រាន់តែផ្ញើឈ្មោះ លេខទូរស័ព្ទ អាសយដ្ឋាន និងអត្តសញ្ញាណប័ណ្ឌ (ID Card) មកទំព័រហ្វេសប៊ុករបស់ស្ថានទូត ឬក្រុមការងារពិសេសចំពោះកិច្ចណាមួយរបស់ស្ថានទូតជាការស្រេច ។
មន្ត្រីដដែល បានអោយដឹងទៀតថា ស្ថានទូតកម្ពុជាបាននឹងកំពុងធ្វើការទាក់ទងទិញម៉ាស់បន្ថែមទៀត ដើម្បីផ្គត់ផ្គង់តាមតម្រូវការចាំបាច់បឋម និងបន្ដស្វែងរកជំនួយសប្បុរសជននានា ដើម្បីជួយឧបត្ថមដល់សហគមន៍ខ្មែរនៅប្រទេសកូរ៉េ ដែលជួបការលំបាកក្នុងការរកទិញម៉ាស់ ដើម្បីប្រើប្រាស់ក្នុងកាល:ទេស:ដ៏ប្រឈមនេះ ។
ឆ្លៀតក្នុងឱកាសនេះ ស្ថានទូតកម្ពុជាសូមថ្លែងអំណរគុណដល់សប្បុរសជននានា និងសមាជិកក្រុមការងារពិសេសចំពោះកិច្ចដែលបានជួយឧបត្ថមគាំទ្រ និងចូលរួមសហការបង្កលក្ខណៈ ដើម្បីជួយគាំពារដល់សហគមន៍ខ្មែរនៅប្រទេសកូរ៉េ ទទួលបានសុខសុវត្ថិភាព ទាំងផ្លូវកាយ និងផ្លូវចិត្ត ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ