រាជធានីភ្នំពេញ ៖ លោក កឹម សុខា អតីតប្រធានគណបក្សសង្គ្រោះជាតិ បានអំពាវនាវ ដល់ប្រជាពលរដ្ឋគ្រប់និន្នាការនយោបាយចូលរួមទប់ស្កាត់ជំងឺកូវីដ-១៩(Covid-19) ដោយកុំធ្វើការវាយប្រហារគ្នាដើម្បីកេងចំណេញនយោបាយនោះឡើយ ។
លោក កឹម សុខា បានសរសេរលើបណ្តាញសង្គម នៅថ្ងៃទី៦ ខែមីនាថា ពេលនេះពិភពលោកកំពុងប្រឈមនឹងការរីករាលដាលនៃជំងឺCovid-19 ដែលមិនត្រឺមតែប៉ះពាល់ដល់សុខភាព និងអាយុជីវិតមនុស្សនោះទេ លើសពីនេះទៀត វាអាចនាំឲ្យប៉ះពាល់ដល់សេដ្ឋកិច្ចរបស់ប្រទេស និងជីវភាពរស់នៅរបស់មនុស្សជាច្រើន
ទៀតផង ក្នុងនោះក៏មានប្រទេសកម្ពុជានិងប្រជាពលរដ្ឋខ្មែរយើងផងដែរ ។
លោកបញ្ជាក់ថា ៖ «ខ្ញុំយល់ឃើញថា ក្នុងកាលៈទេសៈនេះ យើងជាខ្មែរត្រូវរួបរួមគ្នា ដើម្បីទប់ស្កាត់បញ្ហាប្រឈមទាំង២ខាងលើ(ជំងឺនិងសេដ្ឋកិច្ច) ដែលប៉ះពាល់ដល់ប្រទេសជាតិនិងប្រជាពលរដ្ឋយើង ដោយកុំប្រកាន់និន្នាការនយោបាយ កុំប្រើប្រាស់បញ្ហានេះបំផ្លើសបំភ្លៃ ដើម្បីកេងចំណេញនយោបាយវាយប្រហារគ្នា ដោយអសីលធម៌» ។ លោក កឹម សុខា គូសបញ្ជាក់ទៀតថា ៖ «ខ្ញុំសូមគាំទ្រចំពោះកម្ពុជាយើង ដែលពេលនេះផ្តល់អាទិភាពដើម្បីរួមគ្នាប្រយុទ្ឋប្រឆាំងនឹងជំងឺ Covid-19 និងសូមលើកទឹកចិត្តដល់សមត្ថកិច្ចជំនាញ បំពេញបេសកកម្មបានជោគជ័យជូន ជាតិ និងប្រជាពលរដ្ឋខ្មែរ ។ ជាពិសេស ខ្ញុំសូមអំពាវនាវដល់ប្រជាពលរដ្ឋខ្មែរទាំងអស់គ្នា សូមថែរក្សាអនាម័យ ការពារខ្លួនឲ្យបានខ្ជាប់ខ្ជួន ដោយប្រុងប្រយ័ត្នទប់ស្កាត់នូវជំងឺរាតត្បាតនេះ ។
ជាមួយគ្នានេះដែរ ខ្ញុំសូមបួងសួងដល់គុណបុណ្យព្រះរតនត្រៃ បារមីវត្ថុស័ក្តិសិទ្ធី សូមឲ្យប្រជាពលរដ្ឋខ្មែរមានសុខភាពល្អ ជាពិសេសចៀសផុតពីជំងឺ Covid-19 និងសូមឲ្យមានជីវភាពរស់នៅប្រសើរឡើង កុំឲ្យជួបប្រទះនូវវិបត្តិសេដ្ឋកិច្ចឲ្យសោះ» ។ សូមជម្រាបថា ការលើកឡើងរបស់លោក កឹម សុខា គឺបន្ទាប់ពីប្រមុខរាជរដ្ឋាភិបាលបានដាក់វិធានការទប់ស្កាត់ជំងឺកូវីដ-១៩នេះ និងស្នើឲ្យពលរដ្ឋមានអនាម័យ ដើម្បីបញ្ចៀសការឆ្លងជំងឺនេះ ។ ប៉ុន្តែយ៉ាងក៏ដោយ រហូតមកដល់ពេលនេះក្រសួងសុខភិបាលបានអះអាងថា មិនទាន់មានប្រជាពលរដ្ឋកម្ពុជាណាម្នាក់ឆ្លងជំងឺកូវីដ-១៩ នេះទេ ។
ជាការកត់សម្គាល់ នេះគឺជាលើកទី២ហើយដែលលោក កឹម សុខា ដែលកំពុងមានរឿងក្តីក្តាំនៅតុលាការក្នុងសំណុំរឿងសន្ទិដ្ឋិភាពជាមួយបរទេស បានអំពាវនាវឱ្យប្រជាពលរដ្ឋខ្មែររួបរួមគ្នាប្រយុទ្ធប្រឆាំងនឹងមេរោគកូវីដ-១៩នេះ ។ ការចេញមុខរបស់លោក កឹម សុខា ធ្វើឡើងស្របពេលដែលលោក សម រង្ស៊ី និងសកម្មជនអតីតបក្សប្រឆាំងមួយចំនួនទៀត បាននិងកំពុងយកបញ្ហាកូវីដ-១៩នេះ វាយប្រហារមកលើរាជរដ្ឋាភិបាល និងក្រសួងសុខាភិបាលកម្ពុជាតាមបណ្តាញសង្គមហ្វេសប៊ុក ។ អ្នកខ្លះបានឌឺដងផ្ចាញ់ផ្ចាល ខ្លះសម្តែងការព្រួយបារម្ភ និងខ្លះទៀតចង់ក្រើនរំឭកឱ្យមានប្រុងប្រយ័ត្នបន្ថែមទៀតលើបញ្ហានេះ។ ប៉ុន្តែក្រៅពីនេះក៏មានដែរ ក្រុមមនុស្សប្រឌិតព័ត៌មានបំផ្លើសការពិតបំពុលសង្គម ធ្វើឱ្យមានការចលាចលដោយសារព័ត៌មានក្លែងក្លាយទាំងនោះ ។
សម្តេចតេជោនាយករដ្ឋមន្ត្រី បានចាត់ទុកក្រុមមនុស្សប្រភេទនេះថា ជាក្រុមជនទុច្ចរិត និងហៅថាជាភេរវករ បើសិនពួកគេនៅតែបន្តប្រឌិតព័ត៌មានមិនពិតតទៅទៀត ។ សម្រាប់សម្តេចតេជោនាយករដ្ឋមន្រី្ត ការប្រឌិតព័ត៌មានមិនពិត មិនមានផលចំណេញអ្វីទេ តែវាបានធ្វើឱ្យប្រជាពលរដ្ឋ និងក្រុមគ្រួសារអ្នកប្រឌិត
ព័ត៌មាននោះមានការភ័យខ្លាចខ្លាំងទៅវិញទេ។បើទោះបីលើកឡើងបែបនេះ តែសម្តេចតេជោប្រមុខរាជរដ្ឋាភិបាលកម្ពុជា នៅតែជំរុញឱ្យពលរដ្ឋត្រូវចេះធ្វើអនាម័យផ្ទាល់ខ្លួន ដើម្បីការពារការឆ្លងមេរោគកូវីដ-១៩ ។ មិនតែប៉ុណ្ណោះក៏បានប្រកាសយកការប្រយុទ្ធប្រឆាំងកូវីដ-១៩ជាបញ្ហាចម្បងអាទិភាពរបស់រាជរដ្ឋាភិបាលចាប់ពីពេលនេះតទៅ ។
លោកកឹម សុខា បានគាំទ្រការប្រកាសនេះ របស់សម្តេចតេជោ ហ៊ុន សែន ហើយថែមទាំងបានជំរុញលើកទឹកចិត្តដល់សមត្ថកិច្ចជំនាញបំពេញបេសកកម្មបានជោគជ័យជូនជាតិ និងប្រជាពលរដ្ឋខ្មែរ ។ លើសពីនេះទៀត លោក កឹមសុខា ក៏បានអំពាវនាវដល់ប្រជាពលរដ្ឋខ្មែរទាំងអស់ឱ្យថែរក្សាអនាម័យ ការពារខ្លួនឱ្យបានខ្ជាប់ខ្ជួនដោយប្រុងប្រយ័ត្ន ទប់ស្កាត់នូវជំងឺរាតត្បាតកូវីដ-១៩នេះ ៕
ចែករំលែកព័តមាននេះ