រាជធានីភ្នំពេញ ៖ អាជ្ញាធរខណ្ឌសែនសុខ បានធ្វើការសម្របសម្រួលនិងដោះស្រាយ បន្ទាប់ពីពលរដ្ឋចំនួន៧០គ្រួសារ រស់នៅភូមិច្រេស សង្កាត់គោកឃ្លាង ខណ្ឌសែនសុខ បាននាំគ្នាផិតមេដៃ ប្តឹងចោទតារាចម្រៀង ព្រាប សុវត្ថិ ថាបានរំលោភយកដីផ្លូវសាធារណៈ បានដាក់គំនរឈើនិងសម្ភារបិទផ្លូវ និងចតរថយន្តលើដងផ្លូវ បណ្តាលឱ្យបាត់បង់សណ្តាប់ធ្នាប់ និងបង្កសំឡេងរំខាន ។ បន្ទាប់ពីមានបញ្ហាបែបនេះកើតឡើងបានធ្វើឱ្យមហាជនមានការភ្ញាក់ផ្អើលដោយសារតែលោក ព្រាប សុវត្ថិ គ្រាន់តែជាអ្នកចម្រៀងតើ ទៅមានសិទ្ធិអ្វីរំលោភដល់ដីផ្លូវសាធារណៈ ។
ទោះបីជាយ៉ាងណាមានភ្លើងទើបមានផ្សែង ។ ការចុះសម្របសម្រួលទំនាស់ជិតខាងគ្នានេះ ត្រូវធ្វើឡើង
នៅព្រឹកថ្ងៃទី៦ ខែមីនា នៅក្នុងដីឡូត៍លោក ព្រាប សុវត្ថិ ដឹកនាំដោយលោក ឆាយ វាសនា ប្រធានរដ្ឋបាលខណ្ឌសែនសុខ ដោយមានការអនុញ្ញាតពីលោក ម៉ូវ ម៉ានិត អភិបាលខណ្ឌសែនសុខ ។ នៅព្រឹកនោះគេឃើញមានវត្តមានរបស់លោក ព្រាប សុវត្ថិ ព្រមទាំងក្រុមគ្រួសារនិងប្រជាពលរដ្ឋ ដែលជាអ្នករស់នៅភូមិផងរបងជាមួយ ។ ក្រៅពីនេះក៏មានអ្នកសារព័ត៌មាន ជាច្រើននាក់បានទៅតាមដានពីករណីចម្រុងចម្រាស់នេះផងដែរ ។
នៅចំពោះមុខអាជ្ញាធរប្រជាពលរដ្ឋបានសំណូមពរដល់លោក ព្រាប សុវត្ថិ ៣ចំណុច៖
១-ស្នើឱ្យលោក ព្រាប សុវត្ថិ ធ្វើការរុះរើសម្ភារផ្សេងៗចេញពីលើផ្លូវសារធារណៈខាងក្រោយដីឡូត៍របស់លោក ។២-ស្នើសុំឱ្យលោក ព្រាប សុវត្ថិ កែសម្រួលការចតរថយន្តនៅលើផ្លូវសាធារណៈពិបាកចេញ-ចូល និងបញ្ហាសំឡេងរបស់រថយន្ត ។និង៣-ស្នើសុំឱ្យភាគីលោក ព្រាប សុវត្ថិ កាប់មែកឈើ ដែលធ្លាក់ទៅលើផ្ទះរបស់ពួកគាត់ចេញឱ្យអស់ ។
ចំណុចដែលចោទថា លោក ព្រាប សុវត្ថិ រំលោភយកដីផ្លូវសាធារណៈ មិនបានដាក់បញ្ជូលក្នុងការសម្របសម្រួលនេះទេ ដោយប្រជាពលរដ្ឋ ទទូចសុំឱ្យមន្ត្រីជំនាញខាងសូរិយោដីចុះទៅវាស់វែង ក្បាលដីលេខ១៧៤ ដែលជាដីលោក ព្រាប សុវត្ថិ ព្រមទាំងវាស់វែងផ្លូវ ព្រោះផ្នែកខាងក្រោយ ដីផ្លូវមុនមានទទឹងប្រវែង១០ម៉ែត្រហើយពេលនេះនៅសល់តែ៧ម៉ែត្រនោះទេ ។
នៅក្នុងការសម្របសម្រួល ទាំង៣ចំណុចខាងលើ លោក ព្រាប សុវត្ថិ ក៏បានយល់ព្រម ឯកភាពអនុវត្តចំពោះសំណូមពរ ។ ទោះបីជាយ៉ាងណា គេពុំទាន់ដឹងថា លោក ព្រាប សុវត្ថិ បានអនុវត្តបានឬមួយយ៉ាងណានោះទេ តែទន្ទឹមគ្នានោះលោក ព្រាប សុវត្ថិ បានចោទប្រកាន់ប្រជាពលរដ្ឋវិញ ដែលបានធ្វើឱ្យខូចឈ្មោះលោក ហើយទាមទារឱ្យសុំទោស តែប្រជាពលរដ្ឋបានបដិសេធព្រោះពួកគាត់មិនបានធ្វើអ្វីខុសនោះទេ ។
គួរបញ្ជាក់ថា ប្រជាពលរដ្ឋចំនួន៧០នាក់ដែលរស់នៅក្នុងភូមិច្រេស សង្កាត់គោកឃ្លាង ខណ្ឌសែនសុខ ជុំវិញផ្ទះលោក ព្រាប សុវត្ថិ ក៏បាននាំគ្នាផ្តិតមេដៃប្តឹងលោក ព្រាប សុវត្ថិ ដោយចោទលោក ព្រាប សុវត្ថិ ដែលជាតារាចម្រៀងល្បីឈ្មោះបានរំលោភយកដីផ្លូវសាធារណៈ ហើយបានផ្តិតមេដៃប្តឹងទាស់ករណីក្បាលដីចុះបញ្ជីលេខ១៧៤ ដែលជាក្បាលដីលោក ព្រាប សុវត្ថិ ស្ថិតនៅភូមិច្រេស សង្កាត់គោកឃ្លាង ខណ្ឌសែនសុខ ដោយសារការចុះបញ្ជីនោះបានរំលោភចូលដីផ្លូវ ។ តាមប្រជាពលរដ្ឋបានឱ្យដឹងថា ដីរបស់លោក ព្រាប សុវត្ថិ ពីមុនជាដីរួមរបស់ប្រជាពលរដ្ឋដែលបានលក់ឱ្យ ។
រយៈពេលប្រមាណ៤ឆ្នាំមកហើយ លោក ព្រាប សុវត្ថិ ក៏បានមកទិញដីនិងសាងសង់ផ្ទះ លើដីនោះ ។ ពួកគាត់ចោទថា ចាប់តាំងពីពេលនោះមកក្នុងការសាងសង់លោក ព្រាប សុវត្ថិ ក៏បានយកដងផ្លូវខ្លះផ្នែកខាងក្រោយ ទុកជាកម្មសិទ្ធិរបស់ខ្លួនដោយដាក់ឥដ្ឋគំនរ ប្រក់តង់បិទផ្លូវតែម្តង មិនឱ្យពួកគាត់ធ្វើដំណើរបាន ។
ដោយមានការរំលោភបំពានពួកគាត់ក៏បានដាក់ពាក្យបណ្តឹងទៅអាជ្ញាធរ សង្កាត់ ខណ្ឌ និងប្តឹងទាស់ក្បាលដីលេខ១៧៤ របស់លោក ព្រាប សុវត្ថិ ទៅសាលារាជធានីភ្នំពេញ និងមន្ទីររៀបចំដែនដី នគរូបនីយកម្មសំណង់ ដើម្បីឱ្យចុះវាស់វែង តែស្ងាត់រហូត ទើបតែនៅរសៀលថ្ងៃទី៤ ខែមីនា ដែលមានការតវ៉ាជាថ្មីហើយ មានអ្នកព័ត៌មានមកយកព័ត៌មាននិងឡាយ(Live) ទើបអាជ្ញាធរចុះមកសម្របសម្រួលនៅពេលនោះ។ ប្រជាពលរដ្ឋ ក៏បានសុំឱ្យមន្ត្រីជំនាញចុះមកវាស់វែង ក្បាលដីលេខ១៧៤ និងដីផ្លូវ ជុំវិញផ្ទះលោក ព្រាប សុវត្ថិ ព្រោះផ្លូវពីមុននិងពេលនេះរួមតូចអស់ហើយ ។
ពាក់ព័ន្ធបញ្ហានេះតារាចម្រៀងលោក ព្រាប សុវត្ថិ បានប្រាប់បណ្តាញព័ត៌មាននៅថ្ងៃទី៦ ខែមីនា ឆ្នាំ២០២០នេះថា លោកយល់ព្រម និងព្យាយាមដោះស្រាយជូនតាមការចង់បានពីប្រជាពលដ្ឋដែលរស់នៅក្បែរខាងផ្ទះរបស់លោក ។ លោកបញ្ជាក់ថា ចំពោះការចោទប្រកាន់ថា លោកធ្វើរោងឈើបិទផ្លូវនោះគឺមិនមែនជាអ្វីដែលលោកចេះតែធ្វើតាមការនឹកឃើញនោះឡើយ ។
លោកថា មុនធ្វើលោកបានសុំអាជ្ញាធរមូលដ្ឋានយ៉ាងត្រឹមត្រូវ ខណៈពេលរោងឈើរបស់លោកនាពេលនេះគឺគ្រាន់តែបណ្តោះអាសន្នប៉ុណ្ណោះ ។ ចំណែកផ្លូវជាប់របងផ្ទះលោកនេះគឺលោកបានទិញ ដោយសារពីដើមវាជាទីតាំងបឹងដែលមិនអាចដើរបានឡើយ ។ ប៉ុន្តែក្រោយពេលលោកបានទិញហើយ លោកក៏បានធ្វើការចាក់ដីបំពេញអស់ជាច្រើនឡានបង្កើតបានជាផ្លូវនាពេលនេះ ។ យ៉ាងណាលោកយល់ព្រមបើកផ្លូវមួយនេះតាមការចង់បានពីប្រជាពលរដ្ឋ ដើម្បីធ្វើចរាចរណ៍បម្រើផលប្រយោជន៍ជាសាធារណៈទាំងអស់គ្នា ។
ដោយឡែកការរោទិ៍សំឡេងរថយន្តនោះត្រូវបានលោក ព្រាប សុវត្ថិ អះអាងថា ជាធម្មតាលោកជាអ្នកសិល្បៈ គឺមានចេញសម្តែងតាមខេត្តផ្សេង ហើយការចេញសម្តែងនោះគឺត្រូវចេញដំណើរវេលាទៀបភ្លឺ ខណៈពេលមកវិញអាចយប់ជ្រៅឬក៏ជិតភ្លឺដូចគ្នា ។ លោកបញ្ជាក់ថា ប្រការនេះវាមិនអាចចៀសរួចពីការឮសំឡេងរថយន្តខ្លះៗនោះទេ ប៉ុន្តែលោកសូមទទួលយកការរិះគន់នេះ ហើយលោកនឹងព្យាយាមសម្របសម្រួលពីផលប៉ះពាល់នេះដើម្បីអ្នកជិតខាង ។
យ៉ាងណាក៏ដោយ លោកក៏បានស្នើដល់ប្រជាពលរដ្ឋ ពេលមានរឿងអ្វីកើតឡើងសូមមកដោះស្រាយជាមួយគ្នាដោយផ្ទាល់ ព្រោះលោកមិនបានដឹងពីហេតុការណ៍ទាំងអស់បានឡើយ គឺលោកមិនដែលមានបំណងណាមួយបង្កឱ្យអ្នកជិតខាងអាក់អន់ចិត្តទេ ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ