រាជធានីភ្នំពេញ ៖ វិបត្តិជំងឺកូរ៉ូណា ឬកូវីដ ១៩ កាន់តែសាយភាយនៅបណ្ដាប្រទេសលើពិភពលោក ហើយកម្ពុជាក៏រងផលប៉ះពាល់ពីវិបត្តិនេះដែរ បើទោះបីជាកម្ពុជា មិនទាន់មានប្រជាពលរដ្ឋណាម្នាក់កើតជំងឺនេះក៏ដោយ ជាក់ស្ដែង ការប្រមូលពន្ធគយនៅក្នុងខែកុម្ភៈ កន្លងទៅនេះ បានរងផលប៉ះពាល់ ដោយមានការថយចុះជាងខែមករា ឆ្នាំ ២០២០ និងថយចុះពីផែនការកំណត់ដោយច្បាប់ ។
យោងតាមលោកគុណ ញឹម ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកគយនិងរដ្ឋករកម្ពុជា បានមានប្រសាសន៍ថា ច្បាប់ស្ដីពីថវិកា ក្នុងឆ្នាំ ២០២០ បានកំណត់អោយអគ្គនាយកដ្ឋានគយនិងរដ្ឋករ រកចំណូលអោយបានជាង២,៩ពាន់លានដុល្លារអាមេរិក ដូច្នេះក្នុងមួយខែត្រូវរកអោយបានរង្វង់២៥០លានដុល្លារអាមេរិក។ សម្រាប់ខែមករា ដើមឆ្នាំ ២០២០ ការប្រមូលពន្ធគយពីអគ្គនាយកដ្ឋានគយ និងរដ្ឋករ គឺមិនមានផលប៉ះពាល់ទេ ដោយបានលើសពីផែនការបន្តិចបន្តួច តែដល់ខែកម្ភៈ ដែលជាពេលជំងឺកូរ៉ូណា កំពុងផ្ទុះពេញបន្ទុក នៅបណ្ដាប្រទេសជាច្រើននៅលើពីភពលោក ជាពិសេសពីប្រទេសចិន បានធ្វើអោយចំណូលពន្ធគយបានធ្លាក់ចុះវិញ តែមិនខ្លាំងនោះទេ ។ លោកបានបន្តថា ខែមករា អគ្គនាយកដ្ឋានគយ និងរដ្ឋកររកចំណូលបានប្រមាណ២៥៥លានដុល្លារអាមេរិក គឺលើសផែនការបន្តិច ហើយក្នុងខែកុម្ភៈ ក្នុងឆ្នាំដដែលនោះ អគ្គនាយកដ្ឋានគយ និងរដ្ឋករ រកចំណូលបានប្រមាណ២៣៥លានដុល្លារអាមេរិក គឺក្រោមផែនការតិចតួចប៉ុណ្ណោះ ។
លោកគុណ ញឹម បានបន្តថា « មានកត្តាបី ដែលធ្វើអោយការប្រមូលពន្ធគយរបស់រដ្ឋករកម្ពុជាថយចុះ ក្នុងខែកុម្ភៈនេះ ទី១- ដោយសារតែ នៅចុងខែមករា គឺនៅក្នុងអំឡុងបុណ្យចូលឆ្នាំចិន និងវៀតណាម ធ្វើអោយអាជីវករមួយចំនួនធំ ត្រូវផ្អាករបររកស៊ី និងអូសបន្លាយដល់ខែកុម្ភៈ ។ កត្តាទី២- បន្ទាប់ពីចូលឆ្នាំចិន ក៏ជួបនឹងជំងឺ កូវីដ១៩ ហើយកត្តាទី៣- គឺដោយសារតែខែកុម្ភៈ មានចំនួនថ្ងៃតិចជាងគេ គឺត្រឹមតែ ២៩ថ្ងៃ ។ ផលប៉ះពាល់ពីកូវីដ១៩ បានធ្វើអោយវិស័យទេសចរណ៍ធ្លាក់ចុះច្រើន ហើយនៅពេលវិស័យនេះធ្លាក់ចុះការនាំចូលសម្ភារមកបំពេញ ក្នុងវិស័យនេះដូចជាវិស័យសណ្ឋាគារ ភោជនីយដ្ឋាន ក៏ធ្លាក់ចុះដូចគ្នា ។ក្នុងនោះដែរ ការនាំចូលសម្ភារសម្រាប់បម្រើអោយវិស័យឧស្សាហកម្មកាត់ដេរ ក៏បានថមថយដែរ ព្រោះវត្ថុធាតុដើមសម្រាប់បម្រើក្នុងវិស័យនេះ ភាគច្រើននាំចូលពីប្រទេសចិន ហើយនៅពេលដែលចិនជួបបញ្ហានេះ ធ្វើអោយការផលិតនៅក្នុងប្រទេសចិនធ្លាក់ចុះ ដូច្នេះហើយទើបមិនមានវត្ថុធាតុនាំចូលមកកម្ពុជា » ។
ប្រតិភូ រូបនេះបានបន្ថែមថា ក្នុងពេលដែលស្ថាប័នគយ និងរដ្ឋករជួបបញ្ហាដូច្នេះ ក្រសួងសេដ្ឋកិច្ច និងហិរញ្ញវត្ថុ ក៏បានរិះរកគ្រប់មធ្យោបាយ និងវិធានការបន្ថែម ក្នុងការគៀងគរចំណូល ព្រោះការប្រមូលចំណូលនៅពេលនេះឃើញថាមានផលលំបាក ។
យោងតាមលោក មាស សុខសេនសាន អគ្គលេខាធិការនៃក្រសួងសេដ្ឋកិច្ចនិងហិរញ្ញវត្ថុ បានមានប្រសាសន៍ថា ផលប៉ះពាល់ពីជំងឺកូវីដ១៩ មិនមែនមានតែកម្ពុជានោះទេ គឺជាលក្ខណៈសាកល ដែលពិភពលោកកំពុងពន្លឿនការដោះស្រាយបញ្ហានេះ អោយបានលឿនបំផុត ។ ផលប៉ះពាល់សម្រាប់កម្ពុជាពេលនេះ គឺមានវិស័យធំពីរ គឺកាត់ដេរដោយសារតែខ្វះវត្ថុធាតុដើម និង វិស័យទេសចរណ៍ ដែលប៉ះពាល់ធ្ងន់ធ្ងរជាងគេ ។
បើតាមប្រសាសន៍សម្ដេចតេជោហ៊ុន សែន នាយករដ្ឋមន្ត្រីនៃកម្ពុជា បានទំលាក់ការព្យាករណ៍កំណើនសេដ្ឋកិច្ចក្នុងឆ្នាំ ២០២០ មកនៅត្រឹមរង្វង់៦ភាគរយ ខណៈឆ្នាំ ២០១៩កន្លងទៅ កម្ពុជាសម្រេចបានកំណើនសេដ្ឋកិច្ចប្រមាណជាង៧ភាគរយ ។ សម្ដេចថា កំណើនសេដ្ឋកិច្ចឆ្នាំ ២០២០ ត្រឹម៦ភាគរយ វាអាចនឹងពិបាកក្នុងការធ្វើណាស់ ដោយសារតែផលប៉ះពាល់ពីវីរុសកូរ៉ូណាទៅលើវិស័យទេសចរណ៍ ដែលជាវិស័យមួយផ្ដល់ចំណូលច្រើនដល់សេដ្ឋកិច្ចជាតិ ៕ កែសម្រួលដោយ ៖ សុឃាក់
ចែករំលែកព័តមាននេះ