រាជធានីភ្នំពេញ ៖ សម្តេចតេជោនាយករដ្ឋមន្ត្រី ហ៊ុន សែន បានធ្វើការអំពាវនាវដល់ប្រជាពលរដ្ឋទូទៅ គួរប្រើការសំពះជម្រាបសួរគ្នាដែលជាវប្បធម៌ខ្មែរ ជំនួសឲ្យការចាប់ដៃស្វាគមន៍គ្នា ខណៈដែលវិបត្តិ Covid-…
រាជធានីភ្នំពេញ ៖ សម្តេចតេជោនាយករដ្ឋមន្ត្រី ហ៊ុន សែន បានធ្វើការអំពាវនាវដល់ប្រជាពលរដ្ឋទូទៅ គួរប្រើការសំពះជម្រាបសួរគ្នាដែលជាវប្បធម៌ខ្មែរ ជំនួសឲ្យការចាប់ដៃស្វាគមន៍គ្នា ខណៈដែលវិបត្តិ Covid- 19 កំពុងគំរាមកំហែងលើពិភពលោក ។ សម្តេចតេជោ បានអំពាវបែបនេះ នាឱកាសបិទសន្និបាតបូកសរុបការងារឆ្នាំ២០១៩ និងលើកទិសដៅការងារឆ្នាំ២០២០ របស់ក្រសួងសុខាភិបាល កាលពីល្ងាចថ្ងៃទី៤ ខែ មីនាកន្លងទៅ ។
ការអំពាវនាវរបស់សម្តេចតេជោប្រមុខរាជរដ្ឋាភិបាលនេះ គឺខណៈនៃការចាប់ដៃស្វាគមន៍គ្នាមានភាគរយនៃការឆ្លង Covid-19 ខ្ពស់ ដូច្នេះគប្បីសំពះគ្នាជំនួសវិញ ។ ការអំពាវនាវនេះក៏មិនខុសគ្នាដែរ ដែលរដ្ឋាភិ បាលបារាំងបានចេញបម្រាមមិនឲ្យមានការស្វាគមន៍ដោយថើបថ្ពាល់គ្នាទៅវិញទៅមកឡើយ ដើម្បីចៀស វាងការឆ្លងCovid-19 ។
សម្តេចតេជោ ហ៊ុន សែន មានប្រសាសន៍ថា ៖«យើងប្រើវិធីសាស្ត្រហ្នឹង(សំពះ) ជាទំនៀមទម្លាប់ប្រពៃណីខ្មែរយើង ខ្មែរអត់ចាប់ដៃទេ ប៉ុន្តែប្រហែលជាចាប់ពីទសវត្សរ៍ឆ្នាំ៧០មក ក្រោយរដ្ឋប្រហារ ៥០ឆ្នាំក្រោយនេះទើបខ្មែរចេះចាប់ដៃគ្នា»។ វិបត្តិកូរ៉ូណាថ្មី កំពុងបង្កការយាយីពិភពលោក បន្ទាប់ពីជំងឺនេះរីករាលដាលកាន់តែខ្លាំងឡើងពី១ថ្ងៃទៅ១ថ្ងៃ ដែលរហូតមកដល់ពេលនេះ អត្រាអ្នកបាត់បង់ជីវិតដោយសារជំងឺឆ្លង Covid-19 នៅលើពិភពលោកកើនដល់ជាង៣ពាន់នាក់ ក្នុងចំណោមអ្នកដែលបានឆ្លងជំងឺនេះជាង៩ម៉ឺននាក់ ដែលក្នុងនោះប្រទេសចិនច្រើនជាងគេ និងជាការផ្ទុះចេញពីប្រទេសនេះផងដែរ ។
ការចាប់ផ្តើមរីករាលដាលនៃជំងឺនេះ បណ្តាលឱ្យមានមនុស្សស្លាប់ជាបន្តបន្ទាប់នៅក្រៅប្រទេសចិន ក្នុងនោះប្រទេសធ្ងន់ធ្ងរមួយចំនួនទៀតមានដូចជា កូរ៉េខាងត្បូង អុីរ៉ង់ អុីតាលី ជប៉ុន អាល្លឺម៉ង់ បារាំង អេស្ប៉ាញ និងអាមេរិកជាដើម ។ ប៉ុន្តែយ៉ាងណាក៏ដោយ ចាប់តាំងពីផ្ទុះឡើងនៃជំងឺនេះតាំងពីដើមខែមករា ឆ្នាំ២០២០មានអ្នកជំងឺជាង៥ម៉ឺននាក់ហើយនៅលើពិភពលោក ត្រូវបានព្យាបាលជាសះស្បើយផងដែរ ។
ពិភពលោកកំពុងដាក់ចេញវិធានការជាបន្តបន្ទាប់ ដើម្បីទប់ស្កាត់ការឆ្លងរីករាលដាលនៃជំងឺ Covid-19 ទៅតាមសេចក្តីណែនាំរបស់អង្គការសុខភាពពិភពលោក ។ ជាមួយនេះ វិធានការកាត់បន្ថយការប៉ះពាល់គ្នាដោយផ្ទាល់ ដោយរិះរកការស្វាគមន៍គ្នាតាមវិធីផ្សេងៗដូចជា ការស្វាគមន៍ដោយជើងឬដោយការសំពះ ។
សម្រាប់សម្តេចតេជោ ហ៊ុន សែន វប្បធម៌ស្វាគមន៍គ្នារបស់ខ្មែរ គឺការសំពះជម្រាបសួរ។ សម្តេចតេជោថ្លែងថា បច្ចុបន្ននេះ ពោលគឺ៥០ឆ្នាំចុងក្រោយនេះ សកលភាវូបនីយកម្ម បានធ្វើឱ្យខ្មែរប្រើវិធីសាស្ត្រចាប់ដៃស្វាគមន៍គ្នា ដោយមិនខ្វល់អំពីវ័យនោះឡើយ ប៉ុន្តែសម្រាប់កម្ពុជាពីមុន បើសិនជាក្មេងហ៊ានចាប់ដៃចាស់ ច្បាស់ជាត្រូវចាត់ទុកថាព្រហើនហើយ ។ សម្តេចតេជោថ្លែងថា ៖ «ផ្អាកចាប់ដៃស្វា គមន៍គ្នារហូតដល់ផុតCovid-19 សិន ហើយប្រើ វិធីសំពះជំនួសវិញ» ។
ទោះបីជាបានជំរុញឱ្យមានការសំពះជម្រាប សួរ កាត់បន្ថយការប៉ះពាល់គ្នាក៏ដោយ ប៉ុន្តែសម្រាប់សម្តេច
តេជោដែលជាមេដឹកនាំប្រទេស ប្រហែលចៀសមិនផុតពីការឱបចាប់ដៃពីសំ ណាក់ប្រជាពលរដ្ឋនោះទេ ដោយសារសម្តេចមានកម្មវិធីជួបពួកគាត់ជាបន្តបន្ទាប់ទៀតនាពេលខាងមុខ ។ សម្តេចតេជោ បានប្រាប់ទៅកងអង្គរក្សមិនឱ្យចាប់ប្រជាពលរដ្ឋណាចេញឡើយ បើសិនជាពួកគាត់មកចាប់ដៃសម្តេច នៅថ្ងៃទី៩ ខែមីនា ខាងមុខ នៅពេលអញ្ជើញទៅសម្ពោធផ្លូវជាតិលេខ៥៥ និងផ្លូវជាតិលេខ១០ នៅស្រុកវែលវែង ខេត្តពោធិ៍សាត់ ៕
ចែករំលែកព័តមាននេះ