រាជធានីភ្នំពេញ ៖ នាព្រឹកថ្ងៃទី៦ មីនានេះ លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញ បានអោយដឹងថា ចំពោះករណីមានការភ្ញាក់ផ្អើលពីសំណាក់ប្រជាពលរដ្ឋកាលពីថ្ងៃទី៥…
រាជធានីភ្នំពេញ ៖ នាព្រឹកថ្ងៃទី៦ មីនានេះ លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញ បានអោយដឹងថា ចំពោះករណីមានការភ្ញាក់ផ្អើលពីសំណាក់ប្រជាពលរដ្ឋកាលពីថ្ងៃទី៥ មីនា ទៅលើបុរសជនជាតិចិន៣នាក់រស់នៅបុរីមួយកន្លែងក្នុងខណ្ឌសែនសុខនោះគឺពុំមែនជាករណីផ្ទុកមេរោគ Covid-19 នោះទេ ដោយសារបុរសជនជាតិចិន៣រូបនោះមានការភ័យខ្លាចបារម្ភដោយខ្លួនឯងតែប៉ុណ្ណោះ ពួកគាត់ពុំមានជំងឺអ្វីនោះទេ។
លោក ម៉េត មាសភក្តី បានអោយដឹងទៀតថា ក្រោយពីទទួលបានពីព័ត៌មានពាក់ព័ន្ធករណីខាងលើនេះភ្លាម លោក ឃួង ស្រេង អភិបាលរាជធានីភ្នំពេញ បានបញ្ជាឲ្យលោក ម៉ូវ ម៉ានិត អភិបាលខណ្ឌសែនសុខ និងមន្ត្រីសុខាភិបាល ព្រមទាំងអាជ្ញាធរមូលចុះទៅពិនិត្យមើលជាក់ស្តែងនៅក្នុងផ្ទះរបស់ជនជាតិចិន៣នាក់នោះកាលពីរាត្រីថ្ងៃទី៥ មីនាកន្លងទៅនេះ។
លោកបានបន្តថា បន្ទាប់ពីក្រុមប្រតិបត្តិការនៅធ្វើការសាកសួររួច ផ្នែកជំនាញសន្និដ្ឋានថា គឺពុំមានទាក់ទងនឹងវីរុស COVID-19 ទេ និងក្រុមប្រតិបត្តិការបានផ្ដល់អនុសាសន៍ដល់ជនជាតិចិនទាំង៣នាក់ខាងលើឲ្យចេះអនាម័យពាក់ម៉ាស់ការពារពេលជួបមិត្តភក្តិដែលជាជនជាតិចិនដូចគ្នា ដែលមកពីប្រទេសចិន ពាក់ព័ន្ធនឹងតំបន់ផ្ទុះជំងឺ និងឲ្យចាប់អារម្មណ៍ពីអាការៈនៃជំងឺមានសភាពដូចជាក្អក ហៀរសំបោរ មានកំដៅក្នុងខ្លួន៣៨អង្សា ពិបាកដកដង្ហើម។ល។ បន្ទាប់មកជនជាតិចិនចំនួន៣នាក់ខាងលើបាននិយាយថា ថៅកែរបស់ពួកគេបានទូរស័ព្ទហៅគ្រូពេទ្យឯកជននៅម្ដុំរតនផ្លាហ្សា (សង្កាត់ទឹកថ្លា) ចុះមកពិនិត្យ មុនឱ្យចូលធ្វើការងាររត់តុនៅភោជនីយដ្ឋានតែប៉ុណ្ណោះ។
លោក ម៉េត មាសភក្តី បានបញ្ជាក់ថា ពាក់ព័ន្ធនឹងករណីខាងលើនេះ ខាងមន្ទីរសុខាភិបាលរាជធានីភ្នំពេញ នឹងបន្តតាមដានលើជនជាតិចំនួន៣នាក់ខាងលើទៀត។ ជាងនោះទៅទៀត ពាក់ព័ន្ធនឹងស្ថានភាពសុខភាពប្រជាពលរដ្ឋនៅរាជធានីភ្នំពេញ ជាពិសេសពាក់ព័ន្ធជំងឹ Covid-19 គឺ អភិបាលរាជធានីភ្នំពេញ បានតាមដានយ៉ាងយកចិត្តដាក់បំផុត និងត្រៀមចាត់វិធានការជានិច្ចលើបញ្ហានេះ។ លោកបានអំពាវនាវ និងស្នើសុំដល់បងប្អូនប្រជាពលរដ្ឋមេត្តា កុំជឿលើព័ត៌មានដែលមិនមានប្រភពច្បាស់លាស់ ដែលអាចនាំឲ្យបងប្អូនមានការយល់ច្រឡំ ៕ (កែសម្រួលដោយ ៖ ធីតា)
ចែករំលែកព័តមាននេះ