ខេត្តកំពង់ស្ពឺ ៖ កម្មការិនីរោងចក្រផលិតស្បែកជើង «វីងស្តាស៊ូ» ជាច្រើននាក់បានដួលសន្លប់ជាបន្តបន្ទាប់សង្ស័យមកពីធុំក្លិនកាវបិទស្បែកជើង ហើយត្រូវបានអ្នកគ្រប់គ្រងរោងចក្របញ្ជូនទៅកាន់គ្លីនិកឯកជនខ្លះ និងទៅមន្ទីរពេទ្យបង្អែករដ្ឋខ្លះ រហូតមកដល់ពេលនេះពួកគាត់មានអាការៈធូរស្បើយឡើងវិញហើយ ដោយពុំមានអាការៈធ្ងន់ធ្ងរអ្វីនោះទេ ចំណែកអ្នកខ្លះក៏បានត្រឡប់ទៅផ្ទះរៀងៗខ្លួនផងដែរ…
ខេត្តកំពង់ស្ពឺ ៖ កម្មការិនីរោងចក្រផលិតស្បែកជើង «វីងស្តាស៊ូ» ជាច្រើននាក់បានដួលសន្លប់ជាបន្តបន្ទាប់សង្ស័យមកពីធុំក្លិនកាវបិទស្បែកជើង ហើយត្រូវបានអ្នកគ្រប់គ្រងរោងចក្របញ្ជូនទៅកាន់គ្លីនិកឯកជនខ្លះ និងទៅមន្ទីរពេទ្យបង្អែករដ្ឋខ្លះ រហូតមកដល់ពេលនេះពួកគាត់មានអាការៈធូរស្បើយឡើងវិញហើយ ដោយពុំមានអាការៈធ្ងន់ធ្ងរអ្វីនោះទេ ចំណែកអ្នកខ្លះក៏បានត្រឡប់ទៅផ្ទះរៀងៗខ្លួនផងដែរ ។
ហេតុការណ៍ខាងលើនេះបានកើតឡើងកាលពីព្រឹកថ្ងៃទី៥ ខែកុម្ភៈ ឆ្នាំ២០២០ នៅចំណុចរោងចក្រផលិតស្បែកជើងយីហោ «វីងស្តាស៊ូ» (wing star shoes) មានទីតាំងស្ថិតនៅក្នុងឃុំមហាឫស្សី ស្រុកគងពិសី ដែលមានកម្មករធ្វើការសរុបទាំងពីរអាគារនៃរោងចក្រមានចំនួន២.០៦៧នាក់។
បើតាមប្រភពពីប្រធានក្រុមកម្មការិនីរោងចក្រខាងលើបានបញ្ជាក់ប្រាប់ថា ដំបូងឡើយមានកម្មការិនីម្នាក់មានអាការៈវិលមុខ ដោយសារពុលកាវបិទស្បែកជើង ហើយក៏បានដួលសន្លប់ ក្រោយមកទៀតអ្នកដែលនៅក្បែរនាងក៏បានដួលសន្លប់ជាបន្តបន្ទាប់ ហើយត្រូវបានថ្នាក់ដឹកនាំរោងចក្របញ្ជូនទៅធ្វើការសង្គ្រោះនៅមន្ទីរពេទ្យរដ្ឋខ្លះ និងនៅមន្ទីរពេទ្យឯកជនខ្លះ។
តាមប្រភពដដែលបានបន្តថា នៅពេលដែលកម្មការិនីចំនួន៥នាក់បានដួលសន្លប់ជាបន្តបន្ទាប់ ក្រោយមកអ្នកផ្សេងៗទៀតដែលនៅជិតគ្នាហាក់មានអាការៈពិតភ័យក៏បានដួលសន្លប់ជាបន្តបន្ទាប់គ្នារហូតមានចំនួនកាន់តែច្រើនឡើងៗ ក៏ត្រូវបានរថយន្តសង្គ្រោះដឹកយកទៅធ្វើការសង្គ្រោះភ្លាមផងដែរ។
លោកចិក បូរិន ប្រធានមន្ទីរការងារខេត្តកំពង់ស្ពឺបានបញ្ជាក់ប្រាប់តាមទូរស័ព្ទថា អាការៈទាំងនេះគឺដំបូងឡើយដែលមានកម្មការិនីម្នាក់បានដួលសន្លប់ ហើយអ្នកផ្សេងៗទៀតឃើញបែបនេះមានអាការៈភិតភ័យក៏ដួលសន្លប់បន្តបន្ទាប់គ្នា និងត្រូវបានរដ្ឋបាលរោងចក្រនិងមន្ទីរការងារដឹកបញ្ជូនទៅធ្វើការសង្គ្រោះនៅមន្ទីរពេទ្យបង្អែកស្រុកគងពិសីមួយចំនួន ចំណែកមួយចំនួនទៀតបញ្ជូនទៅគ្លីនិកឯកជនដែលនៅជិតរោងចក្រនោះ រហូតមកដល់ពេលនេះពួកគាត់មានអាការៈធូរស្បើយ និងបានត្រឡប់ទៅផ្ទះរៀងៗខ្លួនអស់ហើយដែរ។ដោយឡែកកម្មការិនីដែលមានសុខភាពល្អ ក៏ត្រូវខាងរោងចក្របានអនុញ្ញាតឲ្យឈប់សម្រាក និងអនុញ្ញាតឲ្យត្រឡប់ទៅផ្ទះទាំងអស់តែម្ដង។
លោកប្រធានមន្ទីរការងារខេត្តបានបន្តថា ករណីខាងលើនេះគឺដោយសារតែពួកគាត់មានការភិតភ័យ ទើបដួលសន្លប់ជាបន្តបន្ទាប់គ្នា នេះជារឿងធម្មតាទៅហើយចំពោះកម្មការិនីដែលបំរើការងារក្នុងរោងចក្រ ដោយកន្លងមកក៏ធ្លាប់ជួបប្រទះបញ្ហាដូច្នេះដែរ ។ ក្នុងពេលដែលកំពុងសម្រាកព្យាបាល ក៏មានក្រុមគ្រូពេទ្យតាមដានយ៉ាងយកចិត្តទុកដាក់នោះ លោកវ៉ី សំណាង អភិបាលខេត្តកំពង់ស្ពឺ ក៏បានចុះសួរសុខទុក្ខកម្មការិនីទាំងអស់ដោយផ្ទាល់នៅតាមកន្លែងសម្រាកព្យាបាល ហើយកម្មកានីទាំងអស់ក៏បានថ្លែងអំណរគុណដល់លោកជាពន់ពេកដែលបានឆ្លៀតពេលមកសួរសុខទុក្ខពួកគាត់។
តាមប្រភពពីកម្មការិនីម្នាក់បានបញ្ជាក់ប្រាប់ថា ដំបូងឡើយគាត់ឃើញមិត្តរបស់គាត់ម្នាក់បានដួលសន្លប់ ពេលនោះគាត់មានអារម្មណ៍នឹងនរធម្មតា តែក្រោយមកទៀតមិត្តភក្តិរបស់គាត់ពីរបីនាក់ទៀតក៏បានដួលសន្លប់ជាបន្តបន្ទាប់ ធ្វើឱ្យគាត់មានការភិតភ័យក៏សន្លប់តាមតែម្ដង រហូតមកដល់ពេលនេះគាត់ ព្រមទាំងមិត្តភក្តិទាំងអស់មានអាការៈធូរស្បើយឡើងវិញហើយ៕ (កែសម្រួលដោយ ៖ ធីតា)
ចែករំលែកព័តមាននេះ