ខេត្តបន្ទាយមានជ័យ ៖ អធិការនគរបាលស្រុក ក្រុង ដែលនៅមានមុខសញ្ញាប្រព្រឹត្តបទល្មើសសេសសល់មិនទាន់ចាប់បានយកមកផ្តន្ទាទោស ជាពិសេសគឺមុខសញ្ញាប្រព្រឹត្តបទល្មើសឧក្រិដ្ឋ គឺកម្លាំងត្រូវតែបន្តតាមប្រមាញ់ស្រាវជ្រាវរកមុខសញ្ញានោះ ឱ្យដូចជាភ្លៀងរលឹម ដើម្បីរកយុត្តិធម៌ជូនជនរងគ្រោះ ដោយមិនត្រូវបោះបង់ចោលសកម្មភាពទុកឲ្យមុខសញ្ញានោះរស់នៅដោយសុខស្រួលនោះឡើយ ។ សូមកម្លាំងក៏ត្រូវតែបង្កើនការយាមល្បាតត្រួតពិនិត្យជាប្រចាំនៅតាមមូលដ្ឋាន ជាងនេះទៀត គឺជម្រុញការត្រួតពិនិត្យអាវុធជាតិផ្ទុះ និងគ្រឿងញៀនឲ្យបានញឹកញាប់លើរថយន្ត ម៉ូតូ ធ្វើចរាចរណ៍តាមដងផ្លូវសាធារណៈសំដៅរក្សាបានសន្តិសុខ សុវត្ថិភាព ជូនប្រជាពលរដ្ឋ ។
នេះគឺជាការលើកឡើងរបស់លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ នៅរសៀលថ្ងៃទី០៤ មីនា ក្នុងកិច្ចប្រជុំបូកសរុបសភាពការណ៍ និងលទ្ធផលកិច្ចប្រតិបត្តិការប្រចាំខែកុម្ភៈ និងលើកទិសដៅអនុវត្តការងារបន្ត ។ នៅក្នុងឱកាសបុណ្យចូលឆ្នាំថ្មីប្រពៃណីជាតិខាងមុខនេះ លោកឧត្តមសេនីយ៍ទោ អាត់ ខែម បានដាក់បទបញ្ជាឲ្យគ្រប់អធិការនគរបាល ស្រុក ក្រុង ត្រូវពង្រឹងការយកចិត្តទុកដាក់លើកបញ្ហាសន្តិសុខសណ្តាប់ធ្នាប់ សុវត្ថិភាពឲ្យបានល្អ ត្រូវធ្វើបច្ចុប្បន្នភាពមុខសញ្ញាក្មេងទំនើងមាននៅក្នុងមូលដ្ឋានគឺក្តាប់ឲ្យបាន ដើម្បីងាយស្រួលការគ្រប់គ្រង និងត្រៀមកម្លាំងការពារក្នុងពិធីបុណ្យនេះ ឲ្យប្រព្រឹត្តទៅដោយភាពសម្បាយរីករាយរបស់ប្រជាពលរដ្ឋ ។
នៅក្នុងខេត្តបន្ទាយមានជ័យនេះ កម្មវិធីមហាសង្ក្រាន គឺមាន៣កន្លែង កន្លែងដែលធំជាងគេ គឺនៅប្រាសាទបន្ទាយឆ្មារ ក្នុងស្រុកថ្មពួក បន្ទាប់់មកនៅសួនមានជ័យ ក្រុងសិរីសោភ័ណ និងនៅក្រុងប៉ោយប៉ែត ។ជាមួយគ្នានោះដែរ លោកឧត្តមសេនីយ៍ស្នងការ ក៏បានជម្រុញឲ្យនគរបាលជំនាញប្រឆាំគ្រឿងញៀន ត្រូវបង្កើនការស្រាជ្រាវក្តាប់ឲ្យបានពីមុខសញ្ញាជួញដូរ និងប្រើប្រាស់គ្រឿងញៀន ដើម្បីបង្ក្រាបចាប់ឃាត់ខ្លួន ព្រោះគ្រឿងញៀន វាបង្កឲ្យមានភាពអសន្តិសុខក្នុងសង្គម វាប៉ះពាល់ដល់សង្គមគ្រួសារនិងសង្គមជាតិ ។
ជុំវិញបញ្ហាចរាចរណ៍នេះផងដែរ លោកបានជម្រុញឲ្យនគរបាលជំនាញធ្វើការត្រួតពិនិត្យលើអ្នកបើកបរ ដែលប្រព្រឹត្តបទល្មើសចរាចរណ៍ បង្កគ្រោះថ្នាក់ដល់អ្នកដទៃ រងរបួសនិងបាត់បង់ជីវិតហើយរត់គេចខ្លួន គឺត្រូវតែស្រាវជ្រាវរកអ្នកបើកបររថយន្តនោះឲ្យឃើញ ចំពោះអ្នកបើកបររថយន្តក្រុមហ៊ុន គឺត្រូវមានការទំនាក់ទំនងជាមួយម្ចាស់ក្រុមហ៊ុន ឱ្យមានការសហការស្រង់បញ្ជីឈ្មោះអ្នកបើកបររថយន្តក្នុងក្រុមហ៊ុនគាត់ ដើម្បីងាយស្រួលពេលអ្នកបើកបរនោះបង្កគ្រោះថ្នាក់ រត់គេចខ្លួនតែយើងមានឈ្មោះ និងអាស័យដ្ឋានគាត់ តាមស្រាវជ្រាវចាប់អ្នកបើកបររូបនោះយកមផ្តន្ទាទោសតាមច្បាប់ ។
កុំឲ្យដូចប្ចុប្បន្ននេះ សង្កេតឃើញថា ពេលគ្រោះថ្នាក់ឲ្យតែរត់គេចខ្លួនរួច មានម្ចាស់ក្រុមហ៊ុនមកដោះស្រាយ ហើយមានខ្លះអ្នកបើកបររួចពីសំណាញ់ច្បាប់ ការធ្វើបែបនេះបញ្ហាគ្រោះថ្នាក់ចរាចរណ៍នៅតែកើនឡើងដែល ចាប់ពីពេលនោះទៅអ្នកប្រព្រឹត្តបទល្មើសថ្នាក់ចរាចរណ៍ចំពោះអ្នកបើកបររថយន្ត នគរបាលចរាចរណ៍ត្រូវកិបប័ណ្ណបើកបររបស់គាត់ ប្រព្រឹត្តម្តងកិប១ ពីរដងកិប២ បីដងកិប៣ លើកទី៤បញ្ឈប់ការបើកបរ ។
ជាចុងក្រោយ លោកផ្តាំផ្តើដល់កងកម្លាំងនគរបាលទាំងអស់ត្រូវមានសាមគ្គីភាពផ្ទៃក្នុង គោរពវិន័យ លេខ០០៦ របស់នគរបាលជាតិ ព្រោះវិន័យគឺជាកញ្ចក់ឆ្លុះបញ្ជាំងពីអាកប្បកិរិយា ក្រមសិលធម៌ សុជីវធម៌ របស់នគរបាល ៕
ចែករំលែកព័តមាននេះ