ប្រទេសប៉េរូ ៖ កូនប្រុសរបស់អតីតអគ្គលេខាធិការអ.ស.ប លោកហ្សាវីយេប៉េរេដឺគូអេឡា លោកហ្វ្រង់ស៊ីស្កូប៉េរេសដឺគូអេឡា ថ្លែងតាមវិទ្យុប៉េរូRPPថា បិតារបស់លោកបានទទួលមរណភាពហើយកាលពីយប់ថ្ងៃទី៤មីនា នៅក្រុងលីម៉ាក្នុងជន្មាយុ១០០ឆ្នាំ។
សពរបស់អតីតអ្នកការទូតប៉េរូនិងអតីតអគ្គលេខាធិការអ.ស.បរវាងឆ្នាំ១៩៨២និង១៩៩១រូបនេះ នឹងយកមកតម្កល់នាថ្ងៃទី៦មីនានៅវិមានTORRE TAGLE ទីស្នាក់ការរបស់ក្រសួងការបរទេសប៉េរូ មុនពេលយកទៅបញ្ចុះនៅទីបញ្ចុះសពPRESBITERO MAESTRO ក្រុងលីម៉ា។
កើតនៅក្រុងលីម៉ាក្នុងឆ្នាំ១៩២០ លោកហ្សាវីយេប៉េរេដឺគូអេឡា ជាអគ្គលេខាធិការអ.ស.បទី៥។ នាថ្ងៃទី១៩មករាលោកបានប្រារព្ធខួបកំណើតគម្រប់១០០ឆ្នាំរបស់លោក ។ អគ្គលេខាធិការអ.ស.បបច្ចុប្បន្ន លោកអានតូនីញ៉ូហ្គូទែររេស បានសរសេរតាមTWITTERថា ខ្ញុំនឹកឃើញពីគំរូនិងបណ្ដាបទពិសោធន៍ របស់លោកហ្សាវីយេប៉េរេដឺគូអេឡា ដើម្បីរៀនសូត្រនិងយកមកអនុវត្ត។ ជីវិតរបស់លោកនៅត្រូវគេចងចាំ មិនត្រឹមតែ១សតវត្សនោះទេតែទូទាំងប្រវត្តិសាស្ត្ររបស់អ.ស.បតែម្ដង។
នៅប៉េរូលោកហ្សាវីយេប៉េរេដឺគូអេឡា ធ្លាប់កាន់តំណែងជាប្រធានក្រុមប្រឹក្សារដ្ឋមន្ត្រីផងនិងជារដ្ឋមន្ត្រីការបរទេសផង ក្នុងរដ្ឋាភិបាលបណ្ដោះអាសន្នរបស់លោកVALENTIN PANIAGUA ពីថ្ងៃទី២២វិច្ឆិកាឆ្នាំ២០០០ដល់ថ្ងៃទី២៨កក្កដាឆ្នាំ២០០១៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ