ខេត្តព្រះសីហនុ ៖ លោកវរសេនីយ៍ទោ ហួ យ៉ៃ អធិការនគរបាលស្រុកព្រៃនប់ខេត្តព្រះសីហនុបានអោយដឹងថា ជនសង្ស័យចំនួន៤នាក់ជាប់ពាក់ព័ន្ធនឹងករណីជួញដូរ និងរក្សាទុកសារធាតុញៀនដោយខុសច្បាប់ រួមទាំងវត្ថុតាងពាក់ព័ន្ធមួយចំនួនទៀត ត្រូវបាននគរបាលប្រឆាំងបទល្មើសពាក់ពន្ធ័គ្រឿងញៀនឃាត់បាន ។
លោកអធិការនគរបាលស្រុកព្រៃនប់បានបន្តថា ប្រតិបត្តិការខាងលើនេះធ្វើឡើងកាលពីយប់រំលងអាធ្រាត្រឈានចូលថ្ងៃទី៥ ខែមីនា ឆ្នាំ២០២០ ដោយកម្លាំងជំនាញអធិការដ្ឋាននគរបាលស្រុកព្រៃនប់ សហការជាមួយកម្លាំងប៉ុស្ដិ៍រដ្ឋបាលឃុំបឹងតាព្រហ្ម ដោយជំហានដំបូងបានចុះបង្ក្រាបករណីជួញដូរ និងរក្សាទុកនូវសារធាតុញៀននៅចំណុចផ្លូវលំ មុខដីឡូត៍មួយកន្លែង ស្ថិតក្នុងភូមិបត់គគីរ ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ ដោយឃាត់ខ្លួនជនសង្ស័យម្នាក់ឈ្មោះ ជ្រុន ពេជ្រ ភេទប្រុស អាយុ៤០ឆ្នាំ មុខរបរជាងផ្សារដែក មានទីលំនៅភូមិបត់គគីរ ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ និងដកហូតវត្ថុតាង ម្សៅក្រាមសថ្លាសង្ស័យសារធាតុញៀនចំនួន៦កញ្ចប់។
លោកអធិការនគរបាលស្រុកព្រៃនប់បានបន្តទៀតថា បន្ទាប់ពីសាកសួរជនសង្ស័យម្នាក់ខាងលើនេះរួចមក ជនសង្ស័យក៏បានឆ្លើយសារភាពប្រាប់ពីបក្ខពួក ទើបសមត្ថកិច្ចបានបន្តចុះឃាត់ខ្លួនជនសង្ស័យចំនួន៣នាក់ថែមទៀត ក្នុងនោះ១-ឈ្មោះ ជុំ រឿន ភេទស្រី អាយុ៣១ឆ្នាំ មុខរបរកម្មកររោងចក្រ មានទីលំនៅ ភូមិបឹងតាព្រហ្ម ឃុំបឹងតាព្រហ្ម ស្រុកព្រៃនប់ ខេត្តព្រះសីហនុ ២-ឈ្មោះ គ្រឿន ឌីណា ភេទប្រុស អាយុ៣៣ឆ្នាំ មុខរបរកម្មករសំណង់ មានទីលំនៅ ភូមិបឹងតាព្រហ្ម ឃុំបឹងតាព្រហ្ម ស្រុកព្រៃនប់ ខេត្តព្រះសីហនុ និង៣-ឈ្មោះ គ្រឿន ឆាលី ភេទប្រុស អាយុ៣១ឆ្នាំ មុខរបរកម្មកររោងចក្រ មានទីលំនៅភូមិបឹងតាព្រហ្ម ឃុំបឹងតាព្រហ្ម ស្រុកព្រៃនប់ ខេត្តព្រះសីហនុ។
បច្ចុប្បន្ន ជនសង្ស័យរួមទាំងវត្ថុតាំងត្រូវបានបញ្ជូនបន្តតាមនីតិវិធីច្បាប់៕ (កែសម្រួលដោយ ៖ ធីតា)
ចែករំលែកព័តមាននេះ