លក្ខណៈរបស់អ្នកបួសគឺជាអ្នកស្វែងរកសន្តិភាពសម្រាប់ខ្លួនឯង បន្ទាបខ្លួនជាមនុស្សធម្មតាមួយរូប មិនលើកតម្កើងខ្លួនឯងដោយសារតែការបានបួស មិនជំពាក់ទាក់ចិត្តនៅត្រង់ការគោរពបូជា ថ្វាយបង្គំរបស់អ្នកដទៃ អាស្រ័យខ្លួនជាអ្នកបួសនោះទេ ព្រះពុទ្ធទ្រង់ត្រាស់ថា អ្នកបួសដែលបៀតបៀនបុគ្គលដទៃ សម្លាប់សត្វដទៃ មិនមែនជាបព្វជិត មិនមែនជាសមណៈឡើយ ។
ទិសដៅជីវិតរបស់អ្នកបួស គឺដើរក្នុងផ្លូវដ៏ស្ងប់ស្ងាត់ មានមេត្តាធម៌ មិនមានការបៀតបៀន មិនមានការអាល័យស្តាយស្រណោះសម្បត្តិលោកិយអ្វីបន្តិចឡើយ មានសេចក្ដីព្យាយាមជាធំ មានការឃើញត្រូវនិងការត្រិះរិះជាចក្ខុទាំងគូឃើញច្បាស់នូវព្រះធម៌ប្រាកដហើយ ។
អ្នកបួសគប្បីដើរតាមគន្លងបណ្ដាំរបស់ព្រះសម្មាសម្ពុទ្ធបរមគ្រូជាអ្នកនាំផ្លូវ ទ្រោលនូវប្រទីបបំភ្លឺក្នុងទឺងងឹតឱ្យឃើញនូវផ្លូវដើរឆ្ពោះទៅរកសេចក្ដីក្សេមរួចផុតចាកទុក្ខទាំងពួង ។ សាន សារិន
ចែករំលែកព័តមាននេះ