ការចាប់ផ្តើម ឬពង្រីកអាជីវកម្មទាមទារនូវធនធានជាច្រើនដែលបានបង្កជាសម្ពាធយ៉ាងធ្ងន់ធ្ងរដល់អាជីវករ និងមនុស្សជុំវិញខ្លួនអាជីវករ ។ ជាក់ស្តែង ក្រៅពីធនាគារ និងស្ថាប័នហិរញ្ញវត្ថុដទៃហើយ មិត្តភក្តិ និងក្រុមគ្រួសារប្រៀបបានជាប្រភពកម្ចីសំខាន់ៗសម្រាប់អាជីវករក្នុងប្រទេសកម្ពុជា ។ ប៉ុន្តែវាមិនងាយទេក្នុងការហាមាត់និយាយពាក្យថាខ្ចីលុយ ទោះជានិយាយដាក់មនុស្សជិតស្និទ្ធិក៏ដោយ ។ ដោយហេតុដូចនេះ អ្នកត្រូវតែរៀបចំគម្រោងការ និងពិចារណាឲ្យបានដិតដល់ជាមុនសិនមុននឹងនិយាយឃ្លាខាងលើ ។ ខាងក្រោមគឺជាគន្លឹះមួយចំនួនដែលនឹងជួយឲ្យអ្នកជោគជ័យក្នុងការស្នើសុំ ។
១. ប្រាប់ឲ្យត្រង់ពីហានិភ័យ
ជាទូទៅពេលដែលខ្ចីលុយអ្នកដទៃ មនុស្សតែងតែព្យាយាមធ្វើឲ្យភាគីម្ខាងទៀតទុកចិត្តខ្លួនដោយមិនប្រាប់ការពិតពីហានិភ័យនានាដែលអាចនឹងមាននៅថ្ងៃអនាគត ។ ប៉ុន្តែវាជាកំហុសឆ្គងមួយដ៏ធំព្រោះវាអាចធ្វើឲ្យភាគីដែលជាមិត្តឬគ្រួសាររបស់អ្នកខកចិត្ត ឬខឹងនឹងអ្នកដែលមិនប្រាប់តាមត្រង់ ។ ភាពស្មោះត្រង់របស់អ្នកអាចនឹងធ្វើឲ្យភាគីម្ខាងទៀតកាន់តែជឿទុកចិត្តអ្នកទៅវិញទេ ។
២. មានចារជាសំបុត្រឲ្យបានច្បាស់លាស់
ហាមជឿទុកចិត្តការចងចាំរបស់មនុស្សដាច់ខាត ។ ដោយហេតុដូចនេះ អ្នកត្រូវតែរៀបចំកិច្ចសន្យាដែលចែងពីលក្ខខណ្ឌសំខាន់ៗឲ្យបានច្បាស់លាស់ ។ ក្រៅពីវាចងការសន្យារបស់អ្នកហើយ អ្នកក៏អាចប្រើវាដើម្បីរៀបចំការចាយវាយ និងការសងកម្ចីវិញដែរ ។
៣. រក្សាភាពសកម្មក្នុងការសងបំណុល
ទោះជាម្ចាស់បំណុលរបស់អ្នកជាមិត្តភក្តិជិតស្និទ្ធិ ឬក្រុមគ្រួសារជាប់សាច់ជាប់ឈាមក៏ពិតមែនក្តី វាមិនផ្តល់ជាសិទ្ធិឲ្យអ្នកមិនសងបំណុលដែលខ្លួនខ្ចីទេ ។ បើអ្នកជួបនឹងបញ្ហាក្នុងការសងលុយ អ្នកគួរតែនិយាយប្រាប់ទៅម្ចាស់បំណុលឲ្យបានច្បាស់លាស់ ។ ពួកគេអាចនឹងយល់ពីស្ថានការអ្នកប្រសិនបើអ្នកប្រាប់ទៅពួកគេដោយស្មោះត្រង់ ៕ កែសម្រួលដោយ ៖ សុឃាក់
ចែករំលែកព័តមាននេះ