រាជធានីភ្នំពេញ ៖ មនុស្សចំនួន៨នាក់ ត្រូវបានកម្លាំងគណៈបញ្ជាការឯកភាពខណ្ឌមានជ័យ ធ្វើការឃាត់ខ្លួន ក្នុងពេលចុះរដ្ឋបាលទ្រង់ទ្រាយធំជាលើកទី២ នៅចំណុចទីលានចាក់សំរាមចាស់ ស្ថិតក្នុងភូមិព្រែកទាល់ សង្កាត់ស្ទឹងមានជ័យទី១ ខណ្ឌមានជ័យ ។
ការចុះរដ្ឋបាលខាងលើនេះ ធ្វើឡើងនៅវេលាព្រឹកថ្ងៃទី៥ ខែមិនា ឆ្នាំ២០២០ ដោយមានការដឹកនាំបញ្ជារផ្ទាល់ ពីលោកឌី រ័ត្នខេមរុណ អភិបាលរងខណ្ឌមានជ័យ ដោយមានកម្លាំងចម្រុះចូលរួម មាននគរបាល កម្លាំងអាវុធហត្ថ និងប្រជាការពារសង្កាត់ខណ្ឌជាច្រើននាក់ផងដែរ ។
លោកឌី រ័ត្នខេមរុណ អភិបាលរងខណ្ឌមានជ័យ អោយដឹងថា ការចុះរដ្ឋបាលខាងលើនេះ គឺធ្វើឡើងដើម្បីរក្សាបាននូរបៀបរៀបរយល្អ ចំពោះតំបន់ដែលត្រូវបានគេទុកចោល ហើយជនឆ្លៀតឱកាសបានយកតំបន់នេះ ជាកន្លែងសម្រាប់ចែកចាយថ្នាំញៀន ក៏មានជនខ្លះទៀតបានសង់រោងជាជម្រកសម្រាប់ប្រើប្រាស់ថ្នាំញៀនដោយលួចលាក់ផងដែរ ។ ដែលបញ្ហាទាំងនេះបានបង្កជាការភ័យខ្លាចទៅដល់បងប្អូនប្រជាពលរដ្ឋដែលរស់នៅជុំវិញតំបន់នោះផងដែរ ។ យ៉ាងណាមិញ ជាលទ្ធផលនៃការចុះរដ្ឋបាលខាងលើនេះ កម្លាំងអាជ្ញាធរចម្រុះ បានឃាត់ខ្លួនមនុស្ស៨នាក់ និងដកបានថ្នាំញៀន រួមជាមួយវត្ថុតាងថ្នាំញៀនមួយចំនួនផងដែរ ។
សូមបញ្ជាក់ថា ក្នុងចំណោមមនុស្សទាំង៨នាក់ខាងលើ មានក្មេងប្រុសម្នាក់ជាអនីតិជន មិនគ្រប់អាយុ ដូច្នេះហើយត្រូវបានអាជ្ញាធរបញ្ជូនទៅមន្ទីរសង្គមកិច្ចរាជធានីភ្នំពេញ ដើម្បីអប់កែប្រែ នៅទីនោះ ។ ដោយឡែកមនុស្ស៧នាក់ទៀត ត្រូវបន្តនីតិវិធីទៅតាមផ្លូវច្បាប់ ។
គួរបញ្ជាក់ថា អតីតទីលានចាក់សំរាមស្ទឹងមានជ័យខាងលើនេះ បច្ចុប្បន្នមានស្មៅដុះហ៊ុមព័ទ្ធជិត ស្ទើរក្លាយទៅជាព្រៃទៅហើយ ខណៈដែល ត្រូវបានគេទុកចោលអស់ជិត១០ឆ្នាំ ដោយទីលានចាក់សំរាមថ្មី ត្រូវបានផ្លាស់ប្តូរទៅខណ្ឌដង្កោរវិញ ៕ (កែសម្រួលដោយ ៖ ធីតា)
ចែករំលែកព័តមាននេះ