រាជធានីភ្នំពេញ ៖ ដើម្បីបានវត្ថុធាតុដើម សម្រាប់ផ្គត់ផ្គង់សង្វាក់ផលិតកម្មក្នុងប្រទេស អគ្គនាយករដ្ឋដ្ឋានគយរដ្ឋករកម្ពុជាបានប្រកាសថា នឹងផ្តល់អាទិភាពចំពោះការដឹកជញ្ជូនវត្ថុធាតុដើមពីប្រទេសចិនចូលកម្ពុជា ។
លោក គុណ ញឹម អគ្គនាយកដ្ឋានគយ និងរដ្ឋាករកម្ពុជាបានថ្លែងក្នុងសន្និសីទសារព័ត៌មានព្រឹក ថ្ងៃទី០៥ ខែមីនា ឆ្នាំ២០២០ នៅទីស្តីការគណៈរដ្ឋមន្ត្រីយ៉ាងដូច្នេះថា នៅពេលមានបញ្ហានេះកើតឡើង យើងដឹងទាំងអស់គ្នាហើយថា មានការខ្វះខាតក្នុងការផ្គត់ផ្គង់វត្ថុធាតុដើម អីចឹងហើយក្រសួងសេដ្ឋកិច្ច និងហិរញ្ញវត្ថបានចេញលិខិតមួយដោយឲ្យអគ្គនាយករដ្ឋានរដ្ឋករកម្ពុជាចាត់ទុកថា ជាការងារអាទិភាពឲ្យបានជាអតិបរិមាក្នុងការសម្រួលការនាំចូលវត្ថុធាតុដើមលើវិស័យកាត់ដេរ ហើយគ្រឿងបង្គុំសម្រាប់ផលិតវត្ថុនាំចេញផងដែរ» ។
លោកបន្តថា អគ្គនាយករដ្ឋានគយ និងរដ្ឋករកម្ពុជាបានធ្វើលិខិតយ៉ាងលំអិតបន្ថែមទៀត ដោយបានបើកកិច្ចប្រជុំអង្គភាពគយមូលដ្ឋានគ្រប់ច្រកទាំងអស់ ដើម្បីអនុវត្តការណែនាំក្នុងការធ្វើការ ។ លោកគូសបញ្ជាក់ថា ៖«យើងត្រៀមរួចហើយក្នុងនោះ អំពីម៉ោងរដ្ឋបាលផងដែរ ។ ខ្ញុំចង់ប្រាប់ថា យើងតាមដានជារៀងរាល់ថ្ងៃពីមួយថ្ងៃទៅមួយថ្ងៃពីមួយសប្តាហ៍ទៅមួយសប្តាហ៍ឃើញថា វត្ថុធាតុដើមចាប់ផ្តើមមកវិញបណ្តើរៗហើយ ។ យើងត្រៀមថា បើវត្ថុធាតុដើមច្រើនយើងត្រៀមបន្ថែមម៉ោងរដ្ឋបាលដោយធ្វើការដល់ម៉ោង១១ ឬ១២យប់ ដើម្បីធ្វើយ៉ាងណាកប៉ាល់មកភ្លាមកុងតឺន័រដឹកចេញពីកំពង់ផែទៅរោងចក្រតែម្តង» ។
លោកក៏បានឲ្យដឹងថា អគ្គនាយករដ្ឋានគយរដ្ឋករកម្ពុជាក៏បានបើកច្រកពិសេសមួយសម្រាប់ការដឹកជញ្ជូនវត្ថុធាតុដើមវិស័យកាត់ដេរផងដែរ ។ លោកគូសបញ្ជាក់ថា ៖«ខ្ញុំសូមបញ្ជាក់ថា វត្ថុធាតុដើមលើវិស័យកាត់ដេរ គឺជាអាទិភាពទីមួយ» ។
ចំណែកលោក ស សុខសេនសាន អគ្គលេខាធិការនៃអគ្គលេខាធិការដ្ឋានក្រសួងសេដ្ឋកិច្ច និងហិរញ្ញវត្ថុបានលើកឡើងថា ៖«ពិភពលោកបានកំពុងពិនិត្យយ៉ាងយកចិត្តទុកដាក់ចំពោះបញ្ហាសេដ្ឋកិច្ចក្រោយពីជំងឺកូវីដ១៩បញ្ចប់ ហើយប្រទេសជិតខាងយើងក៏បន្តមើល ប៉ុន្តែអ្វីដែលយើងមិនអាចឆ្លើយតបាននោះ គឺយើងទំហំ នឹងមានកម្រិតជំងឺនេះមានរយៈពេលប៉ុន្មាន?» ។ លោកបន្តថា សម្រាប់កម្ពុជាយើងនៅពេលសកលលោកប៉ះពាល់នោះយើងក៏ទទួលរងដែរ ប៉ុន្តែមកដល់ពេលនេះជាមិនទាន់មានការរាល់ដាលខ្លាំងនោះទេ ។ ដូច្នេះបើមានការរីករាលដាលជំងឺនេះខ្លាំងនៅលើសកលនោះទំហំសេដ្ឋកិច្ចរូមទាំងកម្ពុជានឹងមានការប៉ះពាល់ខ្លាំងធ្ងន់ធ្ងរ ៕
ចែករំលែកព័តមាននេះ