រាជធានីភ្នំពេញ ៖ ក្រសួងវប្បធម៌ និងវិចិត្រសិល្បៈបានចេញសេចក្តីប្រកាសព័ត៌មាន ដោយបានស្នើ និងណែនាំដល់បណ្តាអង្គការ និងក្រុមសិល្បៈនានា ឲ្យមានការរៀបចំការសម្តែងរបាំព្រះរាជទ្រព្យ ឬរបាំក្បាច់បុរាណខ្មែរ ឲ្យត្រឹមត្រូវតាមក្បួនខ្នាត ដើម្បីចូលរួមលើកស្ទួយតម្លៃសិល្បៈ និងកិត្តិយសរបស់ជាតិទាំងមូល។
សេចក្តីប្រកាសព័ត៌មានខាងលើនេះ បានធ្វើឡើង បន្ទាប់ពីរូបភាពនៃជនជាតិសិង្ហបុរីមួយរូប បានយករបាំបុរាណខ្មែរមួយក្រុមទៅសម្តែងនៅទីតាំងមួយដែលមិនសមរម្យ ជាហេតុនាំឲ្យមានការផ្ទុះប្រតិកម្មយ៉ាងខ្លាំងពីសំណាក់ប្រមុខរាជរដ្ឋាភិបាលកម្ពុជា ស្ថាប័នពាក់ព័ន្ធ និងប្រជពលរដ្ឋខ្មែរ។
បើយោងតាមសេចក្តីប្រកាសព័ត៌មានដែលបានចេញផ្សាយសាធារណៈកាលពីថ្ងៃទី៤ ខែមីនា ឆ្នាំ២០២០ បានឲ្យដឹងងថា ក្រសួងវប្បធម៌ និងវិចិត្រសិល្បៈបានសង្កេតឃើញនៅមានអង្គការ សមាគម ក្រុមសិល្បៈ ឬបុគ្គលខ្លះៗ បានប្រើប្រាស់ទម្រង់របាំព្រះរាជទ្រព្រ ឬរបាំក្បាច់បុរាណខ្មែរ ទោះដោយចេតនាក្តី អចេតនាក្តី ខ្វះការប្រុងប្រយ័ត្ននូវក្បួនខ្នាត ក្នុងរូបភាពមិនសមរម្យ នៅតាមទីកន្លែងមិនសមស្រប ដែលជាហេតុធ្វើឲ្យអាប់អោន ឬជាការបន្ទាបបន្ថោកដល់តម្លៃនៃសិល្បៈ ប៉ះពាល់ដល់កិត្តិយសនៃអ្នករបាំខ្មែរ ដែលមានមនសិការ វិជ្ជជីវៈច្បាស់លាស់ និងប៉ះពាល់ដល់កិត្តិស័ព្ទនៃប្រទេសជាតិទាំងមូល។
អាស្រ័យហេតុនេះ ក្រសួងសូមណែនាំឲ្យបណ្តាអង្គការ សមាគម ក្រុមសិល្បករនានា ដែលនឹងរៀបចំយកទម្រង់ របាំព្រះរាជទ្រព្យ ឬរបាំក្បាច់បុរាណខ្មែរ ទៅសម្តែងជាលក្ខណៈអន្តរជាតិនៅក្រៅប្រទេស សូមសហការជាមួយក្រសួងឲ្យបានជិតស្និត តាមរយៈការផ្តល់ជារបាយការណ៍សង្ខេបស្តីពីទស្សនទាន គោលបំណង ទីកន្លែង ឬបរិស្ថាន ដែលរបាំព្រះរាជទ្រព្យ ឬរបាំក្បាច់បុរាណខ្មែរត្រូវសម្តែង ដើម្បីជៀសវាងនូវរូបភាពមិនសមរម្យប៉ះពាល់ដល់តម្លៃសិល្បៈ និងកិត្តិយសរបស់ជាតិ។
ជាមួយគ្នានេះដែរ ចំពោះការសម្តែងរបាំព្រះរាជទ្រព្យ ឬរបាំក្បាច់បុរាណខ្មែរនានាក្នុងប្រទេសក៏ត្រូវមានការប្រុងប្រយ័ត្នចំពោះក្បួនខ្នាត អ្នករបាំ និងទីតាំងឲ្យបានសមរម្យ និងតម្លៃមរតកមនុស្សជាតិ និងកេរតំណែលរបស់បុព្វបុរសខ្មែរផងដែរ។
ក្រសួងវប្បធម៌ និងវិចិត្រសិល្បៈសង្ឃឹមថា បណ្តាអង្គការ សមាគម និងក្រុមអ្នកសិល្បៈនានានឹងសហការយ៉ាងជិតស្និតក្នុងស្មារតីរួមគ្នា ថែរក្សា ការពារតម្លៃនៃសិល្បៈវប្បធម៌ជាតិឲ្យបានគង់វង្សជាអមតៈតរៀងទៅ។ បើតាមក្រសួងវប្បធម៌ និងវិចិត្រសិល្បៈ បានឱ្យដឹងថា របាំព្រះរាជទ្រព្យ ឬរបាំក្បាច់បុរាណខ្មែរ ត្រូវបានចុះបញ្ជីបេតិភណ្ឌវប្បធម៌អរូបីនៃមនុស្សជាតិរបស់អង្គការយូណេស្កូ តាំងពីឆ្នាំ២០០៣រហូតមក។ ក្នុងសម័យចក្រភពអង្គរ របាំនេះជារបាំសក្ការៈរាំថ្វាយទេវៈ បួងសួងសុំសេចក្តីសុខ សិរីសួស្តីថ្វាយពរជ័យដល់ជាតិ និងប្រជាជន។
ក្រោយថ្ងៃរំដោះ៧មករា ឆ្នាំ១៩៧៩ រហូតដល់បច្ចុប្បន្ន ក្រសួងវប្បធម៌និងវិចិត្រសិល្បៈមានមោទនភាព និងរីករាយដោយសារការរស់ឡើងវិញនៃរបាំព្រះរាជទ្រព្យ ឬរបាំក្បាច់បុរាណខ្មែរ ដែលក្រសួងក៏ដូចជាបណ្តាអង្គការ សមាគម ក្រុមសិល្បៈ ធ្វើការបង្ហាត់បង្រៀន បណ្តុះបណ្តាលយ៉ាងផុសផុល សំដៅរួមចំណែកថែរក្សា ការពារ និងផ្សព្វផ្សាយ ដើម្បីលើកតម្កើងអត្តសញ្ញាណវប្បធម៌ជាតិ ហើយដែលប្រការនេះ ក្រសួងសូមលើកទឹកចិត្ត ដើម្បីឲ្យមានការចូលរួមកាន់តែច្រើនថែមទៀត។
គួរបញ្ជាក់ថា របាំព្រះរាជទ្រព្យ ឬរបាំក្បាច់បុរាណខែ្មរមានចំនួន៨២របាំ និងរបាំរឿងមានចំនួន៣៥រឿង ហើយរបាំដែលរស់ឡើងវិញមានចំនួន៥៤របាំ និងនៅបាត់បង់ចំនួន២៨របាំ ខណៈពេលរបាំរឿងដែលរស់ឡើងវិញមានចំនួន២១រឿង និងនៅបាត់បង់ចំនួន១៤ រឿង ៕ (កែសម្រួលដោយ ៖ បុប្ផា)
ចែករំលែកព័តមាននេះ