រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានប្រកាសឲ្យរៀបចំអង្គរសន្ត្រាននៅឆ្នាំ២០២០ឡើងវិញ ដើម្បីទាក់ទាញភ្ញៀវទេសចរណ៍មកទស្សនាអង្គរវត្តបានច្រើន ។ ក្នុងឱកាសអញ្ជើញបិទសន្និបាតបូកសរុបការងារឆ្នាំ២០១៩ និងលើកទិសដៅការងារឆ្នាំ២០២០…
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានប្រកាសឲ្យរៀបចំអង្គរសន្ត្រាននៅឆ្នាំ២០២០ឡើងវិញ ដើម្បីទាក់ទាញភ្ញៀវទេសចរណ៍មកទស្សនាអង្គរវត្តបានច្រើន ។ ក្នុងឱកាសអញ្ជើញបិទសន្និបាតបូកសរុបការងារឆ្នាំ២០១៩ និងលើកទិសដៅការងារឆ្នាំ២០២០ នៃក្រសួងសុខភិបាលនៅសណ្ឋាគារសុខាថ្ងៃទី៤ ខែមីនានេះ សម្តេចតេជោនាយករដ្ឋមន្ត្រីបានមានប្រសាសន៍ថា ៖« នៅក្នុងឱកាសបុណ្យចូលឆ្នាំថ្មី ២០២០ ខាងមុខនេះ យើងត្រូវរៀបចំអង្គរសង្ក្រាន្តឡើងវិញដើម្បីផ្តល់ការកម្សាន្តសប្បាយដល់ភ្ញៀវទេសចរ និងបងប្អូនប្រជាពលរដ្ឋ ហើយទន្ទឹមនឹងនោះ គឺដើម្បីឲ្យក្រុមហ៊ុននានាទទួលបាននូវផល និងចំណូលពីកម្មវិធីទាំងនេះផងដែរ» ។
ជាមួយគ្នានោះដែរ សម្តេចតេជោ ហ៊ុន សែន ជំរុញដល់កម្មវិធីទេសចរណ៍ក្នុងស្រុក និងអញ្ជើញប្រជាពលរដ្ឋទៅកម្សាន្តសប្បាយក្នុងបុណ្យទន្លេនៅខេត្តបាត់ដំបង ចាប់ពីថ្ងៃទី១៣ -១៥ ខែមីនានេះ ។ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាគ្រោងនឹងអញ្ជើញជាអធិបតីនៅក្នុងពិធីបុណ្យទន្លេនៅខេត្តបាត់ដំបង ។ នៅថ្ងៃទី១៤ មីនាខាងមុខនេះ សម្តេចតេជោ ហ៊ុន សែន នឹងអញ្ជើញទៅសម្រាកនៅក្នុងខេត្តបាត់ដំបងមួយយប់ មុននឹងអញ្ជើញចូលរួមក្នុងកម្មវិធីបុណ្យទន្លេនៅថ្ងៃទី១៥ មីនា ។
សម្តេចសូមអញ្ជើញបងប្អូនប្រជាពលរដ្ឋភ្ញៀវទេសចរជាតិ និងអន្តរជាតិចូលរួមកម្សាន្តសប្បាយអោយបានច្រើនកុះករទាំងអស់គ្នា នៅក្នុងថ្ងៃបុណ្យទន្លេចាប់ពីថ្ងៃទី១៣-១៥ មីនា ឆ្នាំ ២០២០ ៕
ចែករំលែកព័តមាននេះ