យោងតាមប្រភពពី Goal.com បានឱ្យដឹងថា ព្រឹត្តិការណ៍កីឡាទាំងអស់ ក្នុងនោះរួមទាំងលីគកំពូល Serie A នៅក្នុងប្រទេសអុីតាលី នឹងត្រូវធ្វើឡើងដោយគ្មានអ្នកទស្សនា (Closed…
យោងតាមប្រភពពី Goal.com បានឱ្យដឹងថា ព្រឹត្តិការណ៍កីឡាទាំងអស់ ក្នុងនោះរួមទាំងលីគកំពូល Serie A នៅក្នុងប្រទេសអុីតាលី នឹងត្រូវធ្វើឡើងដោយគ្មានអ្នកទស្សនា (Closed Doors) ចាប់ពីពេលនេះរហូតដល់ថ្ងៃទី៣ ខែមេសា ឆ្នាំ២០២០ នេះបើយោងតាមគោលនយោបាយរបស់រដ្ឋាភិបាល ចំពេលដែលមានការព្រួយបារម្ភកាន់តែខ្លាំង ជុំវិញការផ្ទុកនៃជំងឺរលាកផ្លូវដង្ហើមដោយសារវីរុស Covid-19។
នាយករដ្ឋមន្ត្រីអុីតាលី លោក Giuseppe Conte បានធ្វើសេចក្តីប្រកាសមួយ កាលពីថ្ងៃពុធម្សិលមិញ បន្ទាប់ពីបញ្ហាវីរុសឆ្លងនេះ បានបន្តការរីករាលដាលយ៉ាងខ្លាំងក្នុងប្រទេស។ រំលឹកជូនថា ការប្រកួតកីឡាជាច្រើន ក្នុងរួមទាំងក្របខណ្ឌ Serie A ត្រូវបានពន្យារពេល ជាង ២សប្តាហ៍កន្លងមក ក្នុងនោះរួមទាំងការប្រកួតវគ្គពាក់កណ្តាលផ្តាច់ព្រ័ត្រ ពានរង្វាន់ Coppa Italia ផងដែរ។
យោងតាមប្រភពពីគេហទំព័រ Aljazeera នាព្រឹកថ្ងៃទី៥ ខែមីនានេះបានឱ្យដឹងថា ចំនួនអ្នកឆ្លងដោយសារវីរុស Covid-19 ក្នុងប្រទេសអុីតាលី បានកើនឡើងដល់ជាង ៣.១០០ករណី ខណៈដែលអ្នកបាត់បង់ជីវិតកើនដល់១០៧នាក់ ៕ (កែសម្រួលដោយ ៖ ធីតា)
ចែករំលែកព័តមាននេះ