រាជធានីភ្នំពេញ ៖ បន្ទាប់ពីវីរុសកូរ៉ូណា ឬហៅថា COVID-19 បានផ្ទុះឡើងនៅប្រទេសចិនហើយរីករាលដាលនិងបានសម្លាប់មនុស្សអស់ជាច្រើនពាន់នាក់នៅលើពិភពលោកក្នុងរយៈពេលប៉ុន្មានពីរ ឬ ៣ ខែចុងក្រោយនេះ បានធ្វើឱ្យក្រុមហ៊ុនដែលមិនមានទុនបម្រុងគ្រប់គ្រាន់បានសម្រេចបិទទ្វាឈប់ធ្វើអាជីវកម្មទាំងនៅក្នុងតំបន់និងលើពិភពលោក ។ សម្រាប់កម្ពុជាក៏មិនខុសគ្នាដែរ តួយ៉ាងក្រុមហ៊ុនធ្វើប្រតិបត្តិការខាងសណ្ឋាគារស្ថិតនៅខេត្តសៀមរាបបានបិទទ្វាខ្លះទៅហើយ ហើយគ្រាបន្ទាប់ទៅមុខនេះទៀតអាចដល់ដំណាក់កាលក្រុមហ៊ុនទេសចរណ៍ប្រឈមមុខបិទទ្វាដូចគ្នាបើវីរុសកូរ៉ូណានៅកំរាមកំហែង។
លោកជំទាវ ឆាយ ស៊ីវលីន ប្រធានសមាគមទេសចរណ៍កម្ពុជាមានប្រសាសន៍ឱ្យដឹងកាលពីថ្ងៃទី៤ ខែមីនាម្សិលមិញថា រហូតមកដល់ពេលនេះសម្រាប់ក្រុមហ៊ុនទេសចរណ៍មិនទាន់មានការផ្អាកអាជីវកម្មនោះទេ គ្រាន់តែមានការកាត់បន្ថយចំនួនបុគ្គលិកបម្រើការ៣០% ឬលើសពីនេះផ្នែកទៅតាមសុខភាពរបស់ក្រុមហ៊ុន។តែបើនៅតាមសណ្ឋាគារវិញមានការផ្អាកអាជីវកម្មប្រហែល២០(តូចនិងធំ)មានទីតាំងនៅខេត្តសៀមរាបដែលបង្កឡើងដោយសារវីរុសកូរ៉ូណា។
បើតាមលោកជំទាវ ឲ្យដឹងផងដែរថា ក្រុមហ៊ុនទេសចរណ៍អាចឈរជើងបានដូចនៅពេលសព្វថ្ងៃនេះមិនមែនមានន័យថាការធ្វើអាជីវកម្មរបស់ពួកគេទទួលបានប្រាក់ចំណេញនោះទេ តែគឺដោយសារក្រុមហ៊ុននៅឈរជើងបានទាំងនោះ រំពឹងថាអាចនឹងមានចលនាទេសចរណ៍ក្នុងស្រុកផុសឡើងបន្ទាប់ពីមានការលើកទឹកចិត្ត និងម្យ៉ាងទៀតគិតថាខ្លាចពិបាករកធនធានមនុស្សត្រឡប់មកវិញនៅពេលស្ថានភាពល្អប្រសើរឡើងវិញ។ ប៉ុន្តែទោះជាយ៉ាងណាក្រុមហ៊ុនទេចរណ៍ចង់មិនចង់អាចនឹងត្រូវបិទទ្វាអាជីវកម្ម ទោះបីជាប្រមុខរាជរដ្ឋាភិបាលផ្តល់ការលើកទឹកចិត្តផ្នែកពន្ធបន្ថែមនៅជំហានបន្ទាប់ក៏ដោយ។
លោកជំទាវ ឆាយ ស៊ីវលីន បានមានប្រសសន៍ថា «សម្រាប់ក្រុមទេសចរណ៍ដែលបន្តឈរជើងបើកទ្វាមិនមែនមានន័យថានៅចំណេញទេ ។ ជួនកាលការបិទវាមិនងាយស្រួលសម្រាប់ម្ចាស់អាជីវកម្ម មិនមែននឹកឃើញចង់បិទ ញឺគាត់បិទបានភ្លាមទេ ។ តែអ្នកខ្លះគាត់អាចទៅរួចដោយសារគាត់មិនសូវជាខ្វាយខ្វល់ច្រើនបើគាត់ចង់បិទគឺបិទបាន ។ តែសម្រាប់ក្រុមហ៊ុនដែលនៅធ្វើប្រតិបត្តិការនេះដោយគាត់រំពឹងថាអាចនឹងធ្វើម៉េចបានចលនាទេសចរណ៍ក្នុងស្រុកហើយគាត់ពិបាកនិងរកធនធានមនុស្សត្រឡប់មកវិញតាមរយៈមនោសញ្ចេតនារវាងម្ចាស់អាជីវកម្មនិងបុគ្គលិក កម្មករ»។
លោកជំទាវបានសង្កត់ធ្ងន់ថា «យើងប្រឈមមុខនឹងការបិទទ្វាតែម្តងមិនអាចទៅរួចនោះទេ បើបញ្ហាវីរុសកូរ៉ូណានៅតែអូសបន្លាយវែងឆ្ងាយទៅទៀត ។ យើងអត់អាចឈរជើងទៀតបានទេ យើងអត់ទុនទុកសម្រាប់បង្វិលនៅក្នុងអន្តរកាលនេះ គឺយើងទប់អត់បានទេ។ យើងទប់ទល់អាចបានត្រឹមដែលរាជរដ្ឋាភិបាលលើកលែងពន្ធ៤ខែ យើងបានត្រឹមប៉ុណ្ណឹងទេ តែបើវីរុសកូរ៉ូណាបន្តរីករាលដាល ហើយគ្មានភ្ញៀវមកចូលស្នាក់នៅនោះនឹងមានការបិទបន្តបន្ទាប់ទៀត ហើយក្រុមហ៊ុនទេសចររណ៍ក៏ដូចគ្នា ។ បើរាជរដ្ឋាភិបាលមានការលើកទឹកចិត្តមិនយកពន្ធនៅជំហានបន្ទាប់ក៏នៅតែបិទដែរ។ការលើកលែងពន្ធគ្រាន់តែជួយបានមួយចំណែកទេ តែនៅមួយចំណែកធំទៀតគឺយើងមិនអាចទប់ទល់រួចបានទេ»។
បើតាមប្រធានសមាគមទេសចរណ៍កម្ពុជាលើកឡើងថា «បញ្ហាវីរុសកូរ៉ូណាផ្ទុះឡើងធ្វើឱ្យពួកយើងរងផលប៉ះពាល់ខ្លាំង ធ្ងន់ធ្ងរមែនទែន តាំងពីណាពីណីមកយើងមិនដែលបានទទួល។ទោះបីជំនាន់ជំងឺសារកើតឡើងក៏ដោយមនុស្សនៅដើរកម្សាន្តចេញ ចូលធ្វើឱ្យអាជីវកម្មនូវតែអាចដំណើរការបាន។ប៉ុន្តែនៅពេលនេះទទួលរងផលប៉ះពាល់ខ្លាំង ហើយយើងកំពុងព្រួយបារម្ភថាយើងអាចឈរជើងបានប៉ុន្មានខែទៅមុខទៀតនោះទេ» ។
ទន្ទឹមនឹងប្រធានសមាគមទេសចរណ៍ទកម្ពុជាបង្ហាញថានឹងមានក្រុមហ៊ុនទេសចរណ៍អាចនិងមានការបិទទ្វាសម្រាប់ធ្វើអាជីវកម្មនៅពេលខាងមុខ កម្ពុជាក៏អាចនឹងបាត់ចំណូលពីវិស័យទេសចរណ៍នៅឆ្នាំ២០២០នេះប្រហែលជិត១លានដុល្លារអាមេរិកនិងបានដាក់ចេញនូវវិធានការឆ្លើយតបបញ្ហាវីរុសកូរ៉ូណានេះផងដែរ។
លោកទិត ចន្ថា រដ្ឋលេខាធិការប្រចាំការនៃក្រសួងទេសចរណ៍មានប្រសាសន៍ក្នុងសន្និសីទសារព័ត៌មានស្តីពី «វឌ្ឍនៈភាពនិងទិសដៅការងារបន្តរបស់ក្រសួងទេសចរណ៍កាលពីថ្ងៃទី២មីនាថា អំពីវិធានការចំពោះមុខដែលជាវិធានការអាទិភាពទាំង៤ដែលក្រសួងទេសចរណ៍បានដាក់ចេញនិងអនុវត្តប្រកបដោយការយកចិត្តទុកដាក់ខ្ពស់នឹងជំរុញឱ្យមានប្រសិទ្ធភាពក្នុងការឆ្លើយតបបានទាន់ពេលវេលាពីបញ្ហាCovid 19 ៖ ទី១)- ជំរុញសកម្មភាពសទេសចរណ៍ផ្ទៃក្នុង នៅពេលមានការថមថយនៃស្ថានភាពទេសចរណ៍អន្តរជាតិមកដល់ដែលយើងបានដឹងហើយថាវាជាបញ្ហាសកល។នៅពីរខែដើមឆ្នាំ២០២០នេះមានការថមថយក្នុងរង្វង់១៥%នៃទេសចរណ៍អន្តរជាតិធ្លាប់តែមានកំណើន។ទី២)-នៅតែស្វាគមន៍លំហូរទេសចរណ៍អន្តរជាតិ ដោយមានការរឹតបណ្តឹង ឬបិទអ្វីទាំងអស់គឺមានតែការជួយសម្រួលធ្វើយ៉ាងណាឱ្យការធ្វើដំណើរមានភាពងាយស្រួលដើម្បីទាក់ទាញទេសចរណ៍អន្តរជាតិចូលកម្ពុជា។ប៉ុន្តែស្របគ្នានេះយើងបានដាក់ចេញវិធានការបង្ការ ទប់ស្កាត់និងដោះស្រាយ។
ទី៣)- ធ្វើឱ្យគោលដៅទេសចរណ៍សំខាន់ៗគឺអភិវឌ្ឍន៍ហេដ្ឋារចនាសម្ព័ន្ធនៅក្នុងឱកាសដែលភ្ញៀវមានការថមថយខ្លះគឺយើងយកពេលក្នុងការរៀបចំផ្ទះសំបែង ផលិតផល ហេដ្ឋារចនាសម្ព័ន្ធឱ្យស្អាត ដើម្បីត្រៀមនៅពេលបញ្ហានេះត្រូវបានដោះស្រាយយើងសង្ឃឹមថានឹងមានភ្ញៀវទេសចរណ៍មកកាន់កម្ពុជាច្រើននិង ទី៤)- បើសិនយើងឃើញមានការប៉ះពាល់ គឺរាជរដ្ឋាភិបាលបានដាក់ចេញនូវវិធានការជួយសម្រួលការលំបាកពិសេសជួយទៅដល់អ្នកប្រកបរបរក្នុងវិស័យទេសចរណ៍៕
ចែករំលែកព័តមាននេះ