ខេត្តតាកែវ ៖ លោកឧត្តមសេនីយ៍ទោ សុខ សំណាង ស្នងការនគរបាលខេត្តតាកែវ បានធ្វើការអំពាវនាវអោយបងប្អូនប្រជាពលរដ្ឋនៅក្នុងខេត្តតាកែវ ត្រូវមានការប្រុងប្រយ័ត្នខ្ពស់ទៅលើបញ្ហាអគ្គិភ័យ ពីព្រោះនៅក្នុងរដូវនេះ គឺជារដូវក្តៅស្ងួត ដែលជាហេតុធ្វើអោយមានការកើតឡើងនូវគ្រោះអគ្គីភ័យ ដោយងាយបំផុត ។ ដូច្នេះ ដើម្បីចៀសវាងការកើតឡើងហេតុការណ៍អគ្គិភ័យនេះ បងប្អូនប្រជាពលរដ្ឋមិនត្រូវឆ្វេសប្រហែសឡើយ ជាមួយនិងភ្លើងទាន ធូប ប្រព័ន្ធអគ្គិសនី ជាពិសេស ភ្លើងកន្ទុយបារីដែលបានបោះចោលពាសវាលពាសកាលនោះតែម្តង ។
ចំពោះមន្ត្រីនគរបាលនៃកងអន្តរាគមន៍ពន្លត់អគ្គិភ័យ ដាច់ខាតមិនត្រូវប៉ះពាល់នូវលុយកាក់របស់ប្រជាពលរដ្ឋឡើយ ដោយចរចាតម្លៃគ្នាមុនពេលបាញ់ទឹកពន្លត់នោះឡើយ ។ ហើយបើសិនលោកដឹងថា មានមន្ត្រីក្នុងកងអន្តរាគមន៍ពន្លត់អគ្គិភ័យ ហ៊ានប្រព្រឹត្តទង្វើបែបនេះ លោកនឹងចាត់វិធានការចំពោះបុគ្គលនោះទៅតាមវិន័យនគរបាលជាតិ ។
លោកថ្លែងបែបនេះ នៅក្នុងពិធីប្រកាសតែងតាំងមុខតំណែងថ្មី និងបំពាក់ឋានន្តរស័ក្តជូនដល់មន្ត្រីនគរបាលជាតិនៃស្នងការនគរបាលខេត្តតាកែវចំនួន១៨២រូប ព្រឹកថ្ងៃទី០២ មីនា នៅសាលប្រជុំនៃស្នងការដ្ឋាន ។
លោក សុខ សំណាង ស្នងការនគរបាលខេត្តបានសង្កត់ធ្ងន់ និងធ្វើការណែនាំអោយដល់មន្ត្រីនគរបាលជាតិទាំងអស់ ត្រូវតែបន្តស្វែងយល់បន្ថែមទៅលើប្រព័ន្ធបច្ចេកវិទ្យា ពីព្រោះបច្ចេកវិទ្យាសម័យទំនើបនេះគឺមានលក្ខណៈងាយ ស្រួលច្រើនទៅលើការងារដែលកំពុងអនុវត្តរបស់នគរបាលជាតិ ដូចជាការចេះប្រើប្រាស់ប្រព័ន្ធផែនទី Google Earth ដែលបានធ្វើអោយមន្ត្រីជំនាញបានយល់ដឹងច្បាស់ពីភូមិសាស្ត្រច្បាស់លាស់ ទៅលើការមើលផែនទី និងកំណត់មើលគោលដៅ ។
បើសិនជានគរបាលយើង បានយល់ច្បាស់ពីបច្ចេកវិទ្យានោះ គឺងាយស្រួលមែនទែនទៅលើការកំណត់គោលដៅ ដូចជាករណីអគ្គិភ័យ យើងអាចដឹងថា តើប្រភពទឹកនៅទីកន្លែងណាដែលស្ថិតនៅក្បែរកន្លែងកើតហេតុ ។ ដូច្នេះ រថយន្តពន្លត់អគ្គិភ័យទៅជួយអន្តរាគមន៍នោះ អាចធ្វើការបូមទឹកបានលឿននិងរហ័ស ដែលជាកត្តាងាយស្រួល ក្នុងការជួយអន្តរាគមន៍ពន្លត់ដែលកើតមានឡើងបានទាន់ពេលវេលា ។
ចែករំលែកព័តមាននេះ