ស្រុកព្រៃនប់ ៖ បើតាមសេចក្តីរាយការណ៍បឋមបានឱ្យដឹងថា ផ្ទះមួយខ្នងធ្វើពីឈើប្រក់ហ្វីប្រូស៊ីម៉ង់ត៍ មានរៀបថ្មក្រោម ត្រូវបានអគ្គិភ័យឆាបឆេះអស់ស្ទើរទាំងស្រុង ហើយការឆាបឆេះនេះ បើតាមសមត្ថកិច្ចបានឲ្យដឹងថា បង្កឡើងដោយកូនប្រុសម្ចាស់ផ្ទះម្នាក់ជាដុតកំទេចចោល ព្រោះតែមានបញ្ហាក្នុងគ្រួសារ ។ ហេតុការណ៍នេះបង្កឱ្យមានការភ្ញាក់ផ្អើលកាលពីព្រឹកថ្ងៃទី4 ខែមីនា ឆ្នាំ2020 ស្ថិតនៅភូមិបឹងរាំង ឃុំសាមគ្គី ស្រុកព្រៃនប់ខេត្តព្រះសីហនុ ។
បើតាមសមត្ថកិច្ចបានប្រាប់ឱ្យដឹងថា ម្ចាស់ផ្ទះរងគ្រោះខាងលើឈ្មោះ កែវ សន ភេទស្រី អាយុ72ឆ្នាំ ជាស្ត្រីពោះម៉ាយ ចំណែកឯកូនប្រុសដែលដុតផ្ទះម្តាយខ្លួនឯងនេះឈ្មោះ នេត ដារ៉ា ភេទប្រុស អាយុ38ឆ្នាំ មុខរបរកម្មករ ហើយចំពោះមូលហេតុដែលបណ្តាលឱ្យមានអគ្គិភ័យខាងលើនេះ គឺមកពីកូនប្រុសរូបនេះខឹងក្រុមគ្រួសារស្តីបន្ទោស ទើបដុតផ្ទះកំទេចចោលតែម្តង ។
បើតាមប្រភពពីពលរដ្ឋនៅក្បែរកន្លែងកើតហេតុ បានឲ្យដឹងថា ផ្ទះខាងលើនេះធ្វើអំពីឈើទទឹង7ម៉ែត្រ បណ្តោយយ9ម៉ែត្រ ប្រក់ហ្វ៊ីប្រូស៊ីម៉ង់ត៍ រៀបបេតុងខាងក្រោម ចំណែកឯការខូចខាតរួមនឹងទ្រព្យសម្បត្តិក្នុងផ្ទះ គឺឆេះអស់ទាំងស្រុងតែម្តង ។
ក្រោយពេលកើតហេតុ កូនប្រុសម្ចាស់ផ្ទះដែលដុតបំផ្លាញផ្ទះម្តាយខ្លួនចោលនេះ បំរុងរត់គេចខ្លួនតាមរយៈរថយន្ដតាក់ស៊ី ប៉ុន្តែត្រូវបានសមត្ថកិច្ចនគរបាល ដេញតាមចាប់ឃាត់ខ្លួនបានតែម្តង រួចក៏នាំមកកាន់អធិការដ្ឋាននគរបាលស្រុក ដើម្បីដោះស្រាយតាមច្បាប៕ (កែសម្រួលដោយ ៖ បុប្ផា)
ចែករំលែកព័តមាននេះ