រាជធានីភ្នំពេញ ៖ ព្រឹត្តិការណ៍រ៉ូដសូ ឬហៅថាកម្មវិធីបង្ហាញព័ត៌មានលម្អិតរបស់ធនាគារអេស៊ីលីដា ទៅកាន់ដៃគូវិនិយោគ មានអ្នកចាប់អារម្មណ៍ច្រើន និងបានចូលរួមលើសពីអ្វីដែលបានគ្រោងទុក គឺមានរហូតដល់ជាង៥០០នាក់ខណៈធនាគាររំពឹងថាមានត្រឹមតែ៣០០នាក់ប៉ុណ្ណោះ ។ ព្រឹត្តិការណ៍រ៉ូដសូ បានធ្វើឡើងកាលពីរសៀលថ្ងៃទី០៣ មីនា ២០២០ នៅការិយាល័យកណ្ដាលធនាគារអេស៊ីលីដា ព្រមទាំងមានការចូលរួមពីតំណាងធនាគារជាតិ និងគណៈកម្មការមូលបត្រកម្ពុជាផងដែរ ។
លោកបណ្ឌិត អុិន ចាន់នី ប្រធាននាយកប្រតិបត្តិធនាគារអេស៊ីលីដា ភីអិលស៊ី បានមានប្រសាសន៍ថា លោកមិននឹកស្មានថា កម្មវិធីបង្ហាញព័ត៌មានលម្អិតរបស់ធនាគារអេស៊ីលីដា ដែលធ្វើលើកទី១នេះ មានអ្នកចាប់អារម្មណ៍ និងចូលរួមច្រើនដូច្នេះទេ ។ ដំបូងឡើយខាងធនាគារគិតថាប្រហែលជាមានអ្នកចូលរួមប្រមាណត្រឹម៣០០នាក់ប៉ុណ្ណោះ តែនៅពេលជិតដល់ថ្ងៃរៀបចំកម្មវិធី មានអ្នកចុះឈ្មោះមកចូលរួមរហូតដល់៥០០នាក់ ឯណោះ ។
លោកបន្តថា ធនាគារអេស៊ីលីដា ធ្វើអ្វីទៅតាមលំដាប់លំដោយ និងមិនបង្ខំក្នុងការលក់មូលបត្រទៅអតិថិជនឆាប់ៗនោះទេ តែយើងចង់អោយសាធារណជនដែលគ្រោងទិញមូលបត្រកម្មសិទ្ធិសាធារណៈរបស់ធនាគារអេស៊ីលីដា បានយល់ច្បាស់ និងមិនអោយចេះតែទិញដោយមិនបានយល់ពីអ្វីទៅជាការទិញលក់ភាគហ៊ុននោះទេ ដូច្នេះហើយទើបអេស៊ីលីដា បានបង្កើតនូវសិក្ខាសាលាផ្សព្វផ្សាយជាច្រើនលើក និងបន្តបន្ទាប់មកទៀត ក៏ធ្វើកម្មវិធីបន្តបន្ទាប់ ជាក់ស្ដែងដូចជាកម្មវិធីរ៉ូដសូ ដែលគ្រោងធ្វើពីរលើក និងកម្មវិធីបុកបៀលឌីង ជាច្រើនថ្ងៃផងដែរ ។
លោកថា អេស៊ីលីដា គឺមិនប្រញ៉ាប់ក្នុងការលក់ទៅសាធារណជននោះទេ គឺធ្វើអ្វីទៅតាមផែនការ ព្រោះអេស៊ីលីដាមានហិរញ្ញវត្ថុរឹងមាំដោយមិនចាំបាច់ត្រូវការទុនពីសាធារណជនមកពង្រីកអាជីវកម្មទេ តែយើងចង់ចែករំលែកអោយសាធារណជនក្លាយជាម្ចាស់ភាគទុនិករបស់ធនាគារអេស៊ីលីដាវិញ» ។
លោក ស៊ូ សុជាតិ អគ្គនាយកគណៈកម្មការមូលបត្រកម្ពុជា បានមានប្រសាសន៍ថា ការវិនិយោគលើភាគហ៊ុនមិនលើកទឹកចិត្តដល់អ្នកដែលខ្វីលុយធនាគារទៅវិនិយោគនោះទេ ។ ការវិនិយោគគួរតែចេញពីថវិកាផ្ទាល់ខ្លួនដែលនៅសល់ ទើបមិនបង្កអោយមានហានិភ័យ ។ លោកថា ការវិនិយោគភាគហ៊ុនគឺរំពឹងដើម្បីបានផលចំណេញ ហើយបើផលចំណេញនោះ មិនគ្រប់នឹងថ្លៃសងការប្រាក់ទៅធនាគារវិញផងនោះ តើគួរយកសាច់ប្រាក់ពីធនាគារមកវិនិយោគឬយ៉ាងណា ។
លោកបន្តថា ការវិនិយោគលើផ្សារភាគហ៊ុននៅកម្ពុជា នាពេលបច្ចុប្បន្ននេះ កំពុងមានការចាប់អារម្មណ៍ពីសាធារណជនកម្ពុជាជាច្រើន ដែលធ្វើអោយសកម្មភាពនៃការទិញលក់មូលបត្រនៅក្នុងផ្សារមូលបត្រ មានការកើនឡើងគួរអោយកត់សម្គាល់ ។ តាមរយៈការចូលក្នុងផ្សារមូលបត្ររបស់ធនាគារអេស៊ីលីដា លោកជឿថានឹងជំរុញអោយសកម្មភាពនៃការជួញដូរភាគហ៊ុននៅក្នុងទីផ្សារនឹងកាន់តែកើនឡើងមួយកម្រិត ។
លោក ម៉ែន ភក្ដី ប្រធាននាយកដ្ឋានអាជ្ញាប័ណ្ណនៃធនាគារជាតិនៃកម្ពុជា បានមានប្រសាសន៍ថា ធនាគារអេស៊ីលីដា មានការរីកលូតលាស់ជាបន្តបន្ទាប់គួរអោយកត់សម្គាល់ ជាក់ស្ដែងធនាគារនេះបានពង្រីកសេវាកម្មរបស់ខ្លួននៅទូទាំងប្រទេស ព្រមទាំងបង្កើតបាននូវក្រុមហ៊ុនបុត្រសម្ព័ន្ធជាច្រើនផងដែរ ដូចជាធនាគារអេស៊ីលីដាឡាវ មីក្រូហិរញ្ញវត្ថុ មីយ៉ាន់ម៉ា វិទ្យាស្ថានពាណិជ្ជសាស្ត្រអេស៊ីលីដា និង Acleda Security ជាដើម ។
ជាមួយនឹងការរីកចម្រើនជាបន្តបន្ទាប់នេះ ធនាគារក៏ត្រូវការប្រភពទុនបន្ថែម ដើម្បីវិនិយោគ និងការរីកចម្រើនបន្តទៀត ។ ស្របជាមួយនឹងជំនឿទុកចិត្តពីសាធារណជនមកលើវិស័យធនាគារ ការបោះផ្សាយមូលបត្រកម្មសិទ្ធិជាសាធារណៈនេះ ក៏ជាផ្នែកមួយនៃការផ្ដល់ជំនឿទុកចិត្តដល់សាធារណជនលើវិស័យធនាគារផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ