រាជធានីភ្នំពេញ ៖ គម្រោង «សិល្បៈស្រុកយើង» ត្រូវបានបើកជាផ្លូវការ ដើម្បីស្វាគមន៍សាធារណជនទាំងជាតិ និងអន្តរជាតិ ឲ្យចូលទស្សនាស្នាដៃសម្តែងរបស់ក្រុមសិល្បករខ្មែរដោយសេរី កាលពីល្ងាចថ្ងៃសៅរ៍ ទី២៩ ខែកុម្ភៈ ឆ្នាំ២០២០ នៅរោងច្រក ក្រុមហ៊ុន ខ្មែរ ប៊ែវើរីជីស ។
គម្រោងនេះ ត្រូវបានផ្តួចផ្តើមដោយក្រុមហ៊ុន ខ្មែរ ប៊ែវើរីជីស ដើម្បីជំរុញឲ្យមហាជនទាំងអស់ងាកមកចាប់អារម្មណ៍ ព្រមទាំងលើកកម្ពស់ការចូលរួមគាំទ្រសិល្បៈ និងការសម្តែងផ្សេងៗរបស់ខ្មែរ ។
«សិល្បៈស្រុកយើង» ប្រមូលផ្តុំក្រុមសិល្បករខ្មែរដែលនឹងសម្តែងសិល្បៈចម្រុះមានដូចជា៖ ការសម្តែងរបាំប្រពៃណី ល្ខោនខោល ល្ខោនស្រមោលស្បែក របាំសហសម័យ ការប្រគំតន្ត្រីនិពន្ធដោយខ្លួនឯង និងការដាក់បញ្ចាំងភាពយន្តនៅរៀងរាល់ថ្ងៃសៅរ៍ចុងក្រោយនៃខែនីមួយៗ ដោយរាប់ចាប់ពីខែកុម្ភៈ តទៅ រហូតដល់ខែធ្នូ ឆ្នាំ២០២០ នៅក្នុងសាលប្រជុំដ៏ធំរបស់ រោងចក្រ ខ្មែរ ប៊ែវើរីជីស ។
លោកបណ្ឌិត អ៊ឹម សុធារិទ្ធ នាយកផ្នែកទំនាក់ទំនងសាធារណៈ ក្រុមហ៊ុន ខ្មែរ ប៊ែវើរីជីស បានមានប្រសាសន៍ថា «ខ្ញុំសង្ឃឹមថា អ្នកទាំងអស់គ្នានឹងវិលត្រឡប់មករោងចក្រយើងម្តងទៀតដើម្បីទស្សនាសិល្បៈនានាដែលនឹងដាក់សម្តែងប្រចាំខែ ខ្ញុំក៏សង្ឃឹមថា អ្នកទាំងអស់គ្នានឹងជួយផ្សព្ផ្សាយបន្ថែមពីគម្រោងនេះទៅកាន់គ្រួសារ មិត្តភក្តិ និងជាពិសេសភ្ញៀវបរទេស ឲ្យមកចូលរួមគាំទ្រ «សិល្បៈស្រុកយើង» ។
គម្រោង «សិល្បៈស្រុកយើង» ត្រូវបានចូលរួមដោយក្រុមសិល្បករខ្មែរពីសាកលវិទ្យាល័យភូមិន្ទវិចិត្រសិល្បៈ សមាគមសិល្បករគោកធ្លក Epic Arts យុវជនល្ខោនខោលកម្ពុជា Mascot Cambodia & Arts និង Smallworld Smallband ក្រុមតូច ៕ ដោយសហការ (កែសម្រួលដោយ ៖ បុប្ផា)
ចែករំលែកព័តមាននេះ