រាជធានីភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី និងរដ្ឋមន្ត្រីក្រសួងមហាផ្ទៃ និងជាអនុប្រធានគណបក្សប្រជាជនកម្ពុជាបានអះអាងទោះបីជាគ្មានគណបក្សប្រឆាំងក៏ដោយក៏បក្សកាន់អំណាចមិនជិះសេះលែងដៃក្នុងការដឹកនាំប្រទេសនោះទេ។ សម្តេចស ខេង…
រាជធានីភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី និងរដ្ឋមន្ត្រីក្រសួងមហាផ្ទៃ និងជាអនុប្រធានគណបក្សប្រជាជនកម្ពុជាបានអះអាងទោះបីជាគ្មានគណបក្សប្រឆាំងក៏ដោយក៏បក្សកាន់អំណាចមិនជិះសេះលែងដៃក្នុងការដឹកនាំប្រទេសនោះទេ។ សម្តេចស ខេង បានលើកឡើងក្នុងប្រកាសចូលកាន់ដំណែងអភិបាលខេត្តកណ្តាល នាព្រឹកថ្ងៃទី៥ ខែមីនា ឆ្នាំ២០២០នេះ បានស្វាគមន៍ចំពោះការដាក់បញ្ចូលរាល់សេវាសំខាន់ៗនៅតាមក្រសួងស្ថាប័ននានា ដើម្បីបំរើប្រជាពលរដ្ឋឲ្យកាន់តែប្រសើរ ។
សម្ដេចឧបនាយករដ្ឋមន្ដ្រីបញ្ជាក់ថា ៖« ទោះបីគ្មានគណបក្សប្រឆាំងដែលរំលាយនាពេលកន្លងទៅមិនត្រូវជិះសេះលែងដៃឡើយត្រូវមានវិធានការទប់ស្កាត់គ្រប់ពេលវេលា» ។ សម្ដេច ស ខេង មានប្រសាសន៍ថា«យើងមិនត្រូវភ្លេចៗទេថា ឥឡូវនឹងអត់មានបក្សប្រឆាំង អត់មានអីចឹង យើងជិះសេះលែងដៃអាហ្នឹងទស្សនៈបែបនេះខុសហើយ» ។ សម្ដេចបន្ដថា គោលការណ៍នាពេលនេះត្រូវប្រឆាំងចលនាទាំងអស់ដែលអាចប៉ះពាល់ដល់សន្ដិភាពជាតិ ។ សម្ដេចឧទាហរណ៍ ការបង្កើតកម្លាំងប្រដាប់អាវុធដោយខុសច្បាប់ ឬចលនាធ្វើអស្ថេរភាព ដើម្បីឈានផ្ដួលរំលំរាជរដ្ឋាភិបាលស្របច្បាប់តាមរយៈបដិវត្តន៍ពណ៌របស់ក្រុមប្រឆាំងដូច្នេះត្រូវមានវិធានគ្រប់ពេលវេលាផងដែរ ។
បន្ថែមពីនេះសម្ដេចរំលឹកថា ព្រឹតិ្តការណ៍ថ្ងៃទី៩ ខែវិច្ឆិកា ឆ្នាំ២០១៩ កន្លងទៅក្រុមទណ្ឌិត សម រង្ស៊ី ដែលមានគម្រោងចូលស្រុកខ្មែរវិញត្រូវបានបរាជ័យដោយពួកគេមិនអាចធ្វើអ្វីបានឡើយ ។ សម្ដេចថា ក្រុមទណ្ឌិត សម រង្ស៊ី ចូលមកថ្ងៃទី៩ វិច្ឆិកា មិនមែនដូចឆ្នាំ២០១៣ឡើយ គឺមកដើម្បីផ្ដួលរំលំរាជរដ្ឋាភិបាល ។ ដើម្បីឲ្យសមត្ថកិច្ច និងភាគីពាក់ព័ន្ធមួយចំនួនទៀតដឹងកាន់តែច្បាស់ សម្ដេចក្រឡាហោម ស ខេង បានឲ្យដឹងថា «ការធ្វើឲ្យបាត់ស្ថេរភាព ឬមួយក៏បដិវត្តន៍ពណ៌វាមិនមែនមកតែពីម្ខាងទេមកពីអ្នកមានបំណងផ្ដួលរំលំយើងទេ ។ ជួនអីយើងធ្វើដោយមិនដឹងខ្លួន ។ ឧទាហរណ៍ថា ដោះស្រាយទំនាស់ដីធ្លី យើងយកកម្លាំងទៅបង្ក្រាប ដោះស្រាយបទល្មើសព្រៃឈើ ដែលជួនអីប្រជាជនគ្រាន់តែដឹកនឹងរទះមួយគោ ឬពីគោយើងចាប់ អ្នកកាប់ដឹកទាំងឡានៗ យើងអត់ចាប់ យើងឧទាហរណ៍ចឹង» ។
ក្នុងឱកាសនោះដែរសម្តេចសខេងក៏បានលើកឡើងថា ៖«យន្តការដើម្បីផ្តល់សេវាជូនប្រជាពលរដ្ឋមានច្រើន ណាស់ ខ្ញុំមិនអាចរាប់អស់ទេ ប៉ុន្តែគ្រាន់ថាក្រសួងណាក៏មានភារកិច្ច ហើយខេត្តណា និងវិស័យណាក៏មានភារៈកិច្ចដែរ ប៉ុន្តែយើងបានរៀបចំជាយន្តការមួយហៅថា ច្រកចេញចូលតែមួយយើងបានដំណើរការហើយបើទោះបីជានៅមានចន្លោះខ្វះខាតមួយចំនួន ប៉ុន្តែដំណើរវាទៅមុខហើយ» ។ សម្តេចក៏បានលើកឡើងថា អាឡូវមានខេត្តមួយចំនួនបានលើកឡើងថា សេវាដែលមិនទាន់ដាក់បញ្ចូលក្នុងច្រកចេញចូលតែមួយសុំឲ្យសិក្សាដាក់បញ្ចូលដែរ ។ ខ្ញុំយល់ស្រម និងគាំទ្រចំពោះសេវាណាដែលយើងឃើញថា អាចនឹងដាក់បញ្ចូលបាន ។ អីញ្ចឹងក្រសួងនីមួយៗត្រូវសិក្សាបញ្ហានេះ ៕
ចែករំលែកព័តមាននេះ