រាជធានីភ្នំពេញ ៖ បុរសម្នាក់ផឹកស៊ីស្រវឹង ស្រាប់តែឃើញស្ត្រីជាប្រពន្ធផឹកស៊ីជាមួយជនបរទេសក្នុងហាង ហើយសង្ស័យបុរសជាប្តីកើតចិត្តប្រច័ណ្ឌបានចូលទៅវាយកម្ទេចរបស់របរនៅហាងស៊ីផឹកមួយកន្លែង បណ្តាលឲ្យខូចខាតរបស់របរអស់មួយចំនួនធំ ក៏ត្រូវសមត្ថកិច្ចឃាត់ខ្លួនយកទៅសួរនាំនៅប៉ុស្តិ៍ផ្សារកណ្តាល១តែម្តង ។
ហេតុការណ៍ខាងលើនេះបានកើតឡើងកាលពីវេលាម៉ោង១និង២០នាទីរំលងអាធាត្រឈានចូលថ្ងៃទី៤ ខែមីនា ឆ្នាំ២០២០ នៅចំណុចហាងមួយកន្លែង តាមបណ្តោយផ្លូវ១៥ កែងផ្លូវ១៣៦ ស្ថិតនៅលើផ្លូវ១៥ ក្នុងសង្កាត់ផ្សារកណ្តាល១ ខណ្ឌដូនពេញ ។
ជនបង្កឈ្មោះបូរ ចំរើន ភេទប្រុស អាយុ៤២ឆ្នាំ មានមុខរបរលក់ដូរ ស្នាក់នៅផ្ទះកើតហេតុខាងលើ ផ្លូវ១៥ សង្កាត់ផ្សារកណ្តាល១ ខណ្ឌដូនពេញ មានប្រពន្ធឈ្មោះ ចាន់តី អាយុ៣២ឆ្នាំ ទើបចូលធ្វើការនៅក្នុងហាងកើតហេតុខាងលើ រស់នៅជាមួយគ្នាជាប្តីប្រពន្ធបាន៦ឆ្នាំមកហើយ តែមិនបានរៀបការ និងមិនទាន់មានកូននៅឡើយទេ ។
តាមប្រភពព័ត៌មានពីស្ត្រីម្នាក់ឈ្មោះវណ្ណៈ ស្រីមុំ អាយុ៣៥ឆ្នាំ ស្នាក់នៅកន្លែងកើតហេតុខាងលើបានអោយដឹងថា មុនពេលកើតហេតុ គឺជនបង្កបានផឹកស៊ីនៅមុខផ្ទះរបស់គាត់ជាមួយមិត្តភក្តិ២ទៅ៣នាក់ ដែលស្ថិតនៅរំលង២ផ្ទះពីហាងកើតហេតុ ខណៈពេលជនបង្កផឹកស៊ីស្រវឹងស្រាប់តែឃើញប្រពន្ធនៅអង្គុយផឹកស៊ីជាមួយជនជាតិបារាំងនៅមុខហាងកើតហេតុខាងលើ ។
តាមប្រភពដដែលបានបន្តថា បន្ទាប់មកជនបង្កបានដើរមកឈ្លោះប្រកែកជាមួយប្រពន្ធ និងម្ចាស់ហាងដោយចោទថា ម្ចាស់ហាងនាំប្រពន្ធរបស់ខ្លួនមកទាក់ទងប្រុសថ្មីជាជនជាតិបរទេស រួចហើយជនបង្កបានបោកកែវចាន និងវាយរបស់របរក្នុងហាងបែកជ្រុះរាយប៉ាយពេញក្នុងហាង ទោះបីជាថៅកែជនជាតិបារាំងឃាត់ក៏មិនព្រមស្តាប់ដែរ ដោយជនបង្កនៅទាញកាំបិតបុ័ងតោមកវាយបំបែកកញ្ចក់ បណ្តាលអោយបែកខ្ទេចអស់ទាំងស្រុង ហើយបោកកៅអី និងស្លាកយីហោ ថែមទាំងទូទឹកកកបែកអស់មួយទូ ព្រមទាំងវាយកម្ទេចម៉ូតូ២គ្រឿង ក្នុងនោះមួយគ្រឿងម៉ាក Zoomer X និងមួយគ្រឿងទៀតស្គូពី ធ្វើឲ្យអ្នកឃើញហេតុការណ៍នាំគ្នាយកដុំថ្មគប់និងសំបកដបទឹកបរិសុទ្ធគប់ទៅលើជនបង្ក ស្រាប់តែជនបង្ករត់ទៅផ្ទះទៅយកកាំភ្លើងមកអាមេធ្វើអោយអ្នកឃើញហេតុការណ៍រត់ជាន់ជើងគ្នា ។
តាមប្រភពដដែលបានឲ្យដឹងទៀតថា ជនបង្កជាមនុស្សដែលប្រច័ណ្ឌប្រពន្ធខ្លាំងណាស់ កន្លងមកតែងតែឈ្លោះប្រកែកគ្នា ដោយសារតែការប្រច័ណ្ឌប្រពន្ធ កន្លងមកថ្មីៗនេះប្តីប្រពន្ធទាំង២នាក់នេះមានទំនាស់ជាមួយគ្នា ហើយប្រពន្ធបានរត់មកធ្វើការនៅហាងខាងលើ លុះពេលប្តីឃើញប្រពន្ធអង្គុយផឹកស៊ីជាមួយជនជាតិបារាំង កើតចិត្តប្រច័ណ្ឌដោយចោទថា ម្ចាស់ហាងនាំប្រពន្ធរបស់គេទាក់ទងប្រុសថ្មី ទើបបង្កជាហិង្សាកើតឡើងតែម្តង ។
ក្រោយពេលកើតហេតុ សមត្ថកិច្ចប៉ុស្តិ៍ផ្សារកណ្តាល១ធ្វើការឃាត់ខ្លួនជនបង្កយកទៅសួរនាំ និងនាំទៅឆែកឆេររកកាំភ្លើងឃើញថាជាកាំភ្លើងជ័រ ដែលជនបង្កអះអាងថាទិញយកមកទុកការពារខ្លួន ។
បន្ទាប់ពីជនបង្កចូលទៅអុកឡុកនៅក្នុងហាងធ្វើឲ្យខូចខាតរបស់របរ និងទ្រព្យសម្បតិ្តអស់មួយចំនួនធំ ម្ចាស់ហាងបានទាមទារសំណងពីជនបង្កចំនួន៦០០០ដុល្លារ ដោយជនបង្កត្រូវបានសមត្ថកិច្ចឃុំខ្លួនជាបណ្តោះអាសន្នរង់ចាំព្រឹកទើបដោះស្រាយគ្នាជាបន្តទៅទៀត ៕ (កែសម្រួលដោយ ៖ ធីតា)
ចែករំលែកព័តមាននេះ