រាជធានីភ្នំពេញ ៖ ដោយចំណាយពេលមួយឆ្នាំកន្លងមកនេះ ក្រុមវេជ្ជបណ្ឌិតមន្ទីរពេទ្យព្រះកេតុមាលាបាននាំមកនូវបច្ចេកទេសដែលមានឈ្មោះសាមញ្ញជាខ្មែរថា«ដំណោះស្រាយបញ្ហាស្ទះផ្លូវទឹកប្រមាត់ដោយគ្មានការវះកាត់» ឬពាក្យពេញជាភាសាអង់គ្លេសថា ENDOSCOPIC RETROGRADE CHOLANGIO-PANCREATOGRAPHY (ERCP) មកកាន់កម្ពុជា ដើម្បីព្យាបាលអ្នកជំងឺ ។
ក្រុមវេជ្ជបណ្ឌិតបានឲ្យដឹងថា បច្ចេកទេស ERCP ត្រូវបានអនុវត្តជាទូទៅក្នុងការធ្វើរោគវិនិច្ឆ័យ និងព្យាបាលជំងឺលំពែង និងផ្លូវទឹកប្រម៉ាត់ដោយក្នុងនោះរួមមាន ៖ ជំងឺក្រួសក្នុងផ្លូវទឹកប្រម៉ាត់ រលាកផ្លូវ ទឹកប្រម៉ាត់ ឬផ្លូវទឹកប្រម៉ាត់ត្បៀត ដោយសារដុំសាច់លំពែង ឬពោះវៀនសង្គត់ ។ ពីមុនរាល់ជំងឺដែលបានរៀបរាប់ខាងលើ គឺត្រូវបានព្យាបាលដោយការវះកាត់យកគ្រួស ឬតពោះវៀនជាមួយផ្លូវទឹកប្រម៉ាត់ដែលចំណាយពេលក្នុងការព្យាបាលយូរ និងមានផលប៉ះពាល់ច្រើន ។ ប៉ុន្តែសម្រាប់ការព្យាបាលតាមបច្ចេកទេស ERCP វិញគឺ ៖- គ្មានការវះកាត់ពោះ ៖ អ្នកជំងឺដែលធ្វើការព្យាបាល គឺមិនចាំបាច់ធ្វើការវះកាត់ – គ្មានផលលំបាក់ ឬការឈឺចាប់ខ្លាំងក្រោយពេលព្យាបាល – មិនមានការព្រួយបារម្ភរឿងស្នាមវះ មុខរបួសមិនជា ឬស្អិតពោះវៀនដូចការវះកាត់ពោះឡើយ ហើយការសម្រាកព្យាបាលនៅមន្ទីរពេទ្យមានរយៈពេលខ្លីដែលមិនធ្វើអោយប៉ះពាល់ខ្លាំងដល់ការបំពេញការងារប្រចាំថ្ងៃ ។
ក្រុមវេជ្ជបណ្ឌិតបានបញ្ជាក់ថា ដូចនេះអ្នកជំងឺដែលកំពុងមាន ឬសង្ស័យថា មានបញ្ហាផ្លូវទឹកប្រមាត់ អាចមកធ្វើការពិនិត្យ ពិគ្រោះយោបល់ និងព្យាបាលដោយវេជ្ជបណ្ឌិតជំនាញ បច្ចេកទេស ERCP នៅមន្ទីរពេទ្យព្រះ កេតុមាលាបាន ដោយសុវត្ថិភាព និងទំនុកចិត្តខ្ពស់ ៕
ចែករំលែកព័តមាននេះ