សហព័ន្ធបាល់ទាត់ទ្វីបអុឺរ៉ុបហៅកាត់ UEFA បានបញ្ជាក់ថា ការសម្រេចចិត្តថា តើត្រូវលុបចោលការប្រកួតទាំងអស់ រួមទាំងការប្រកួតវគ្គ Play-Off សម្រាប់ព្រឹត្តិការណ៍ Euro 2020…
សហព័ន្ធបាល់ទាត់ទ្វីបអុឺរ៉ុបហៅកាត់ UEFA បានបញ្ជាក់ថា ការសម្រេចចិត្តថា តើត្រូវលុបចោលការប្រកួតទាំងអស់ រួមទាំងការប្រកួតវគ្គ Play-Off សម្រាប់ព្រឹត្តិការណ៍ Euro 2020 ខាងមុខនេះ ដោយសារការផ្ទុះវីរុស Covid-19 នឹងត្រូវសម្រេចដោយរដ្ឋាភិបាលមូលដ្ឋាន និងអង្គការសុខភាពពិភពលោក (WHO) មិនមែនជាសមត្ថកិច្ចរបស់អ្នករៀបចំការប្រកួតកីឡាបាល់ទាត់នោះទេ។
នាយកប្រតិបត្តិរបស់ UEFA បានជួបប្រជុំគ្នាកាលពីថ្ងៃច័ន្ទ ប៉ុន្តែចំណាយពេលត្រឹមតែប៉ុន្មាននាទីប៉ុណ្ណោះ ដើម្បីពិភាក្សាអំពីការរីករាលដាលនៃវីរុសថ្មីនេះ ដែលបានជម្រុញឱ្យព្រឹត្តិការណ៍កីឡាជាច្រើន ត្រូវបានពន្យារពេល និងលុបចោលនៅជុំវិញពិភពលោក។
អ្នកនាំពាក្យ UEFA លោក Phil Townsend បាននិយាយថា «យើងកំពុងមានទំនាក់ទំនងជាមួយអាជ្ញាធរមូលដ្ឋាន ហើយយើងនឹងដោះស្រាយនូវអ្វីដែលពួកគេប្រាប់យើង។ មិនមានការពិភាក្សាច្រើនពីវាទេ ពីព្រោះវាមិនមានអ្វីច្រើនទេដែលយើងអាចធ្វើបាន … វាស្ថិតនៅក្នុងការសម្រេចចិត្តរបស់អ្នកទាំងនោះ ដែលជាអ្នកជំនាញក្នុងស្ថានភាពនេះ»។
លោកបានបន្ថែមចុងក្រោយថា «យើងក៏មានទំនាក់ទំនងជាប្រចាំជាមួយអង្គការសុខភាពពិភពលោក (WHO) និងអាជ្ញាធរដែលពាក់ព័ន្ធនឹងការប្រកួត ដែលកំពុងត្រូវបានធ្វើឡើង ហើយការងារបន្ទាប់មក យើងនឹងដោះស្រាយវានៅពេលមានបញ្ហាកើតឡើង»។
សូមជម្រាបជូនថា ការប្រកួតវគ្គ Play-Off នឹងត្រូវធ្វើឡើងនៅចុងខែមីនានេះ ដោយមានការប្រកួតចំនួន៨គូ ដើម្បីស្វែងរក៤ក្រុមយកទៅបញ្ចូលជាមួយ ២០ក្រុមដែលមានកៅអីស្រាប់ (បង្គ្រប់២៤ក្រុម) ដើម្បីឡើងទៅតទល់គ្នាក្នុងព្រឹត្តិការណ៍ Euro 2020 ដែលចាប់ផ្តើមថ្ងៃទី១២ មិថុនា ខាងមុខនេះ ៕ (កែសម្រួលដោយ ៖ ធីតា)
ចែករំលែកព័តមាននេះ