រាជធានីភ្នំពេញ ៖ ធនាគារឯកទេស វីង (ខេមបូឌា) លីមីតធីត ដែលជាធនាគារឈានមុខគេក្នុងការផ្តល់សេវាធនាគារចល័តនៅកម្ពុជា និងក្រុមហ៊ុន មេនូឡាយហ្វ៍ (ខេមបូឌា)…
រាជធានីភ្នំពេញ ៖ ធនាគារឯកទេស វីង (ខេមបូឌា) លីមីតធីត ដែលជាធនាគារឈានមុខគេក្នុងការផ្តល់សេវាធនាគារចល័តនៅកម្ពុជា និងក្រុមហ៊ុន មេនូឡាយហ្វ៍ (ខេមបូឌា) ដែលជាក្រុមហ៊ុនធានារ៉ាបរងអាយុជីវិតអន្តរជាតិឈានមុខគេមួយ បានរួមសហការរៀបចំកម្មវិធីពិភាក្សាស្តីពីការពង្រឹងសិទ្ធិស្ត្រី និងវិធីសាស្ត្រឆ្ពោះទៅរកភាពជាអ្នកដឹកនាំក្នុងយុគសម័យឌីជីថល ។
លោក ម៉ានូ រ៉ាចាន់ អគ្គនាយកនៃធនាគារឯកទេស វីង (ខេមបូឌា) លីមីតធីត បានមានប្រសាសន៍ថា៖ «ការពង្រឹងសិទ្ធិអំណាចស្ត្រីក្នុងការចូលរួមក្នុងវិស័យសេដ្ឋកិច្ច គឺជាគន្លឹះដើម្បីបិទគម្លាតយេនឌ័រ ហើយវីង ប្តេជ្ញាឆ្ពោះទៅរកការសម្រេចឲ្យបាននូវគោលដៅនេះ តាមរយៈបណ្តាញផលិតផល និងសេវាកម្មជាដើម ។ វាពិតជាចាំបាច់ក្នុងការវិនិយោគលើការពង្រឹងសិទ្ធិអំណាចស្ត្រីតាមរយៈការផ្តល់ជូនឱកាសបណ្តុះបណ្តាលជំនាញវិជ្ជាជីវៈ សម្រាប់ការច្នៃប្រឌិតបច្ចេកវិទ្យា និងការអភិវឌ្ឍសហគ្រិនភាព ដែលមិនត្រឹមតែផ្តល់អត្ថប្រយោជន៍ដល់ស្ត្រីខ្លួនឯងប៉ុណ្ណោះទេ ប៉ុន្តែថែមទាំងជួយដល់គ្រួសាររបស់ពួកគេផងដែរ» ។
ក្នុងបណ្តាញភ្នាក់ងាររបស់ វីង ៨០ភាគរយ គឺជាស្ត្រីមេផ្ទះដែលពួកគាត់មានឱកាសអាចរកប្រាក់ចំណូលបន្ថែមដើម្បីផ្គត់ផ្គង់គ្រួសារ ហើយសមិទ្ធផលនេះបានរួមចំណែកលើកស្ទួយសេដ្ឋកិច្ចក្នុងប្រទេសផងដែរ ។ វីង បានចូលរួមគាំទ្រ ពួកគេឲ្យក្លាយជាអ្នករកប្រាក់កម្រៃបានដោយឯករាជ្យដើម្បីផ្គត់ផ្គង់គ្រួសាររបស់ពួកគេ ។
«ក្នុងចំណោមបុគ្គលិករបស់យើងទាំង ៤៧៨នាក់នៅក្នុងកម្ពុជា បុគ្គលិកជាង ២០០នាក់ជាស្ត្រី និង១៥នាក់ក្នុងចំណោមពួកគាត់មានមុខងារជាអ្នកដឹកនាំ ។ ពួកគាត់ទាំងអស់រួមចំណែកយ៉ាងសំខាន់ដល់ការរីកចម្រើនរបស់ក្រុមហ៊ុន រួមទាំងជំរុញក្រុមហ៊ុនរបស់យើងឲ្យក្លាយទៅជាអ្នកដឹកនាំផ្នែកឌីជីថលនៅលើទីផ្សារសម្រាប់អតិថិជនផងដែរ ។ ខ្ញុំលើកទឹកចិត្តឱ្យអ្នកទាំងអស់គ្នាចូលរួមជំរុញ និងលើកទឹកចិត្តដល់ស្ត្រីទូទៅទាំងនៅកន្លែងធ្វើការ ក្នុងក្រុមគ្រួសារ សង្គម និងនៅគ្រប់ទីកន្លែង» នេះបើតាមប្រសាសន៍ លោក យូ សាមឺឌី នាយកគ្រប់គ្រងនាយកដ្ឋានធនធានមនុស្សរបស់ក្រុមហ៊ុន មេនូឡាយហ្វ៍ ខេមបូឌា ។
យោងតាមរបាយការណ៍សាជីវកម្មហិរញ្ញវត្ថុអន្តរជាតិបានបង្ហាញថា ៦១% នៃអាជីវកម្មដែលចូលរួមចំណែកក្នុងសេដ្ឋកិច្ចកម្ពុជា ត្រូវបានគ្រប់គ្រងដោយស្ត្រី ដែលតួលេខនេះខ្ពស់ជាងបណ្តាប្រទេសនៅតំបន់អាស៊ាន ។ របាយការណ៍នេះក៏បានបញ្ជាក់ផងដែរថាក្នុងឆ្នាំ ២០១៨ ស្ត្រីចំនួន៩០% បានដឹកនាំដំណើរការសហគ្រាសធុនតូច និងមធ្យម ហើយពួកគេទទួលបានប្រាក់ចំណេញយ៉ាងសមរម្យ ទាំងនេះបានសបញ្ជាក់ឲ្យឃើញពីសារសំខាន់នៃការដោះស្រាយឧបសគ្គទាក់ទងនឹងបញ្ហាយេនឌ័រដែលរារាំងស្ត្រីមិនឱ្យមានឱកាសពេញលេញក្នុងតួនាទីជាអ្នកដឹកនាំ ។
វីង និង មេនូឡាយហ្វ៍ (ខេមបូឌា) យកចិត្តទុកដាក់លើការអភិវឌ្ឍវិស័យហិរញ្ញវត្ថុ និងបានរួមចំណែកធ្វើឱ្យជីវភាពប្រចាំថ្ងៃរបស់ប្រជាជនកម្ពុជាប្រសើរឡើង ។ វីង តែងតែប្រើប្រាស់ផលិតផលប្រកបដោយភាពច្នៃប្រឌិតដើម្បីជំរុញបរិយាប័ន្នហិរញ្ញវត្ថុក្នុងប្រទេសដោយបានរួមបញ្ចូលទាំងអ្នកមិនមានគណនីធនាគារ និងមិនស្ថិតក្នុងបណ្តាញធនាគារ រីឯ ក្រុមហ៊ុន មេនូឡាយហ្វ៍ (ខេមបូឌា) ជាក្រុមហ៊ុនអន្តរជាតិដំបូងបង្អស់ដែលនាំយកផលិតផលធានារ៉ាប់រងអាយុជីវិត និងផែនការការពារហិរញ្ញវត្ថុរយៈពេលវែងមកកាន់ទីផ្សារកម្ពុជាក្នុងឆ្នាំ២០១២ ៕ (អត្ថបទ សហការ)
ចែករំលែកព័តមាននេះ