រាជធានីភ្នំពេញ ៖ បុរសម្នាក់ជាមន្ត្រីនគរបាលផ្នែកបច្ចេកទេសវិទ្យាសាស្ត្រក្រសួងមហាផ្ទៃ ព្រមទាំងកូនស្រី ត្រូវបានកម្លាំងនគរបាលប៉ុស្តិ៍ចោមចៅទី៣ចុះអន្តរាគមន៍ឃាត់ខ្លួននាំទៅធ្វើការសាកសួរភ្លាមៗនៅប៉ុស្តិ៍នគរបាល បន្ទាប់ពីមានពាក់ព័ន្ធក្នុងករណីទំនាស់វាយតប់គ្នារវាងសិស្សសាលាដូចគ្នានៅវិទ្យាល័យហ៊ុន សែនជម្ពូវ័ន បណ្ដាលឲ្យសិស្សស្រីចំនួន២នាក់រងរបួសយ៉ាងដំណំ និងត្រូវបានបញ្ជូនទៅកាន់គ្លីនិកឯកជនដើម្បីសង្គ្រោះ ។
ហេតុការណ៍ខាងលើនេះបានកើតឡើងកាលពីវេលាម៉ោង៩ព្រឹកថ្ងៃទី៣ ខែមីនា ឆ្នាំ២០២០ នៅក្នុងវិទ្យាល័យហ៊ុន សែនជម្ពូវ័ន ស្ថិតនៅតាមបណ្ដោយផ្លូវជាតិលេខ៤ ក្នុងសង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
ភាគីក្មេងស្រីរងគ្រោះទាំង២នាក់ខាងលើ ក្នុងនោះម្នាក់ឈ្មោះស្រេង ចន្ទ្រា អាយុ១៧ឆ្នាំ ជាសិស្សរៀនថ្នាក់ទី១២GO នៃវិទ្យាល័យហ៊ុន សែនជម្ពូវ័ន មានទីលំនៅក្នុងភូមិថ្នល់បំបែក សង្កាត់ចោមចៅទី៣ ខណ្ឌពោធិ៍សែនជ័យ និងម្នាក់ទៀតឈ្មោះផា បញ្ញា អាយុ១៧ឆ្នាំ ជាសិស្សថ្នាក់ទី១២A2 រៀននៅវិទ្យាល័យជាមួយគ្នាហើយនាងក៏មានតួនាទីជាអនុប្រធានថ្នាក់ផងដែរ មានទីលំនៅក្នុងភូមិព្រៃទា សង្កាត់ចោមចៅទី៣ ខណ្ឌពោធិ៍សែនជ័យ។
ដោយឡែកភាគីម្ខាងទៀតរួមមានឈ្មោះ ភិជ្ជរ៉ា ផានុត ភេទស្រី អាយុ១៦ឆ្នាំ ជាសិស្សថ្នាក់ទី១០ ត្រូវជាកូន និងឈ្មោះភិជ្ជរ៉ា ប៊ុត្យា ភេទស្រី អាយុ១៧ឆ្នាំជាសិស្សថ្នាក់១១D2នៃវិទ្យាល័យហ៊ុន សែនជម្ពូវ័ន ត្រូវជាកូន រីឯបុរសជាឪពុកឈ្មោះ ឆាយ វណ្ណធឿន អាយុ៤៦ឆ្នាំ ជាមន្ត្រីនគរបាលផ្នែកបច្ចេកទេសវិទ្យាសាស្ត្រក្រសួងមហាផ្ទៃ។ ទាំង៣នាក់ឪពុកនិងកូននេះមានទីលំនៅក្នុងភូមិជ្រៃកោង សង្កាត់ចោមចៅទី៣ ខណ្ឌពោធិ៍សែនជ័យ និងមានស្រុកកំណើតនៅក្នុងឃុំគោកខ្សាច់ ស្រុកគីរីវង្ស ខេត្តតាកែវ។
ក្រោយពេលនគរបាលឃាត់ខ្លួន បុរសជាឪពុកនេះបានប្រកែកថា គាត់មិនបានវាយសិស្សស្រីទាំង២នាក់ខាងលើនោះទេ ហើយខណៈពេលកំពុងរញ៉េរញ៉ៃកើតឡើងពុំដឹងថានរណាជាអ្នកវាយឡើយ គាត់គ្រាន់តែជាអ្នកចូលទៅឃាត់ប៉ុណ្ណោះ ហើយគាត់ក៏មិនបានស្គាល់ក្មេងស្រីរងគ្រោះនោះដែរ ព្រោះគាត់មិនបានប៉ះ និងមិនបានវាយឡើយ។
ដោយឡែកសិស្សនៅវិទ្យាល័យខាងលើនោះបានអះអាងថា ពួកគេបានឃើញស្ទើរតែគ្រប់គ្នាពីការប្រើហិង្សាវាយតប់សិស្សស្រីទាំង២នាក់ខាងលើពីសំណាក់មន្ត្រីនគរបាលរូបនោះ ចំណែកខាងក្រុមយុវជនកាយរិទ្ធបានចូលទៅឃាត់ដែរ តែឃាត់មិនឈ្នះឡើយ។
ក្មេងស្រីរងគ្រោះឈ្មោះស្រេង ចន្ទ្រា បាននិយាយថា នាងធ្លាប់មានទំនាស់ជាមួយកូនស្រីរបស់មន្ត្រីនគរបាលខាងលើនាពេលកន្លងមក ខណៈដែលនាងឈ្លោះគ្នាជាមួយអ្នកផ្សេងទេ ស្រាប់តែឈ្មោះភិជ្ជរ៉ា ផានុត ដែលជាកូនស្រីរបស់មន្ត្រីនគរបាលរូបនោះកាន់ជើងចូលមកលូកមាត់ ទើបមានការប្រកែកគ្នា ។
តាមប្រភពដដែលបានបន្តថា លុះដល់ព្រឹកថ្ងៃកើតហេតុ ពេលដែលនាងទៅហូបបាយ បានឃើញឈ្មោះភិជ្ជរ៉ា ផានុត កំពុងស្ថិតនៅទីនោះដែរ និងកំពុងទទួលបាយពីអ្នកលក់ បន្ទាប់មកឈ្មោះភិជ្ជរ៉ា ផានុត ក៏បានដើរមកបំបុកនាងដោយមិនបានសុំផ្លូវនោះទេ ហើយនាងក៏រុញច្រានទៅវិញ ស្រាប់តែឈ្មោះភិជ្ជរ៉ា ផានុត បានយកទឹកស៊ុបកំពុងតែក្ដៅ១កូនចានជិះមកលើរូបនាងបណ្ដាលឲ្យរលាក ទើបមានការវាយតប់គ្នាកើតឡើង ។ ភ្លាមៗនោះខាងក្រុមយុវជនកាយរិទ្ធបាននាំពួកនាងទៅកាន់ការិយាល័យទាំងអស់គ្នា ហើយឈ្មោះភិជ្ជរ៉ា ផានុត ក៏បានខលហៅឪពុកដែលជាមន្ត្រីនគរបាលឱ្យមក ដោយមិនបានសួរនាំអ្វីឡើយ ស្រាប់តែបុរសជាឪពុក រួមទាំងកូនស្រីម្នាក់ទៀតក៏បានព្រួតគ្នាវាយរូបនាងទាំងកម្រោលបណ្ដាលឲ្យរងរបួសក្បាលតែម្ដង។
ចំណែកក្មេងស្រីរងគ្រោះម្នាក់ទៀតឈ្មោះផា បញ្ញា បាននិយាយថា នាងមិនបានដឹងរឿងអ្វីទេ ហើយក៏មិនដែលមានទំនាស់ជាមួយកូនស្រីរបស់មន្ត្រីនគរបាលខាងលើនោះម្ដងណាឡើយ ដោយនៅមុនពេលកើតហេតុ នាងនិងមិត្តរួមថ្នាក់បាននៅអង្គុយធ្វើលំហាត់នៅលើបង់មុខថ្នាក់រៀន លុះក្រោយមកដល់ម៉ោងរោងជាង នាងនិងមិត្តភក្ដិប្រុសម្នាក់និងស្រីម្នាក់ទៀតបានទៅស្រោចដំណំតាមការប្រើរបស់អ្នកគ្រូប្រចាំថ្នាក់ ។ បន្ទាប់ពីស្រោចដំណាំរួច នាងក៏បានយកធុងទឹកទៅទុកនៅកន្លែងដើមវិញ តែខណៈពេលកំពុងបើកទ្វារដើម្បីទុកសម្ភារៈ ស្រាប់តែបុរសជាមន្ត្រីនគរបាលខាងលើទៅដល់ ហើយអត់សួរនាំអ្វីទាំងអស់ក៏បានវាយនាងទាំងមិនដឹងរឿង លុះក្រោយពីវាយនាងរួច បែរជានិយាយថា អត់បានវាយ គ្រាន់តែចូលទៅចាប់បំបែកឱ្យចេញពីគ្នាទៅវិញ។
តាមប្រភពពីក្មេងស្រីឈ្មោះភិជ្ជរ៉ា ផានុត បាននិយាយប្រាប់នគរបាលថា នៅមុនពេលកើតហេតុ រូបនាងព្រមទាំងមិត្តភក្តិម្នាក់ទៀតបានទៅទិញគុយទាវហូបនៅក្នុងបរិវេណវិទ្យាល័យនោះដែរ លុះពេលកំពុងកាន់ចានគុយទាវបម្រុងដើរទៅអង្គុយនៅតុ ស្រាប់តែឈ្មោះស្រេង ចន្ទ្រា បានឈរបាំងផ្លូវ ហើយពេលនោះនាងបានសុំផ្លូវដែរ តែឈ្មោះចន្ទ្រា មិនព្រមចេញទេ និងយកដៃច្រត់ចង្កេះស្រែកសម្លុតនាង។
តាមប្រភពដដែលបានបន្តថា បន្ទាប់មក នាងបានដើរអែបទៅខាង ស្រាប់តែឈ្មោះចន្ទ្រា ច្រាននាងបណ្ដាលឲ្យដួល ទើបមានការប្រតាយប្រតប់គ្នា ហើយឈ្មោះចន្ទ្រា និងបក្ខពួកបានព្រួតវាយបោចសក់នាងថែមទៀត ក្រោយមកក្រុមកាយរិទ្ធបាននាំពួកនាងទៅកាន់ទីចាត់ការ ពេលនោះនាងបានខលប្រាប់បងស្រី និងឪពុកឲ្យទៅសាលាដែរ ។
តាមប្រភពដដែលបានបន្តថា លុះពេលមកដល់ បងស្រីរបស់នាងបានដើរសំដៅទៅរកឈ្មោះស្រេង ចន្ទ្រា ដែលជាគូទំនាស់របស់នាង ពេលឃើញបែបនេះ ខាងក្រុមកាយរិទ្ធចំនួន៧ទៅ៨នាក់ស្លៀកពាក់ឯកសណ្ឋានសិស្ស ក៏បានដើរទៅរកបងស្រីនាង ។ ចំណែកឪពុកនាងស្មានថាជាបក្ខពួករបស់ឈ្មោះចន្ទ្រា ក៏ចូលទៅឃាត់ដោយយកដៃវែកៗ បណ្ដាលឲ្យត្រូវក្រុមកាយរិទ្ធបន្តិច ប៉ុន្តែភ្លាមនោះក្រោយពីដឹងថាជាក្រុមកាយរិទ្ធ ទើបឪពុកនាងបានសុំទោសរួចហើយ រីឯឈ្មោះចន្ទ្រា បានរត់ចេញក្រៅទីចាត់ការ លុះបន្តិចក្រោយមកទើបឃើញក្រុមកាយរិទ្ធគ្រាហ៍ឈ្មោះចន្ទ្រា ត្រឡប់មកវិញ និងចោទថាឪពុករបស់នាងវាយទៅវិញ៕ (កែសម្រួលដោយ ៖ ធីតា)
ចែករំលែកព័តមាននេះ