ខេត្តព្រៃវែង ៖ ខណៈពេលអគ្គីភ័យបានឆាបឆេះផ្ទះជាងជួសជុលម៉ូតូមួយកន្លែងនៅក្បែរផ្សារកអណ្តើក បណ្តាលឱ្យក្មេងប្រុសម្នាក់អាយុ៥ឆ្នាំបាត់បង់ជីវិតនៅក្នុងភ្នក់ភ្លើង ដោយសារជួយមិនទាន់ ចំណែកក្មេងស្រីម្នាក់អាយុ២ឆ្នាំ រងរបួសធ្ងន់ កំពុងសង្គ្រោះបន្ទាន់ រីឯស្ត្រីជាម្តាយបានរងរបួសស្រាល។ ហេតុការណ៍ខាងលើនេះបានកើតឡើងធ្វើអោយប្រជាពលរដ្ឋផ្អើលឆោឡោភ័យព្រលឹងចុងសក់គ្រប់ៗគ្នា…
ខេត្តព្រៃវែង ៖ ខណៈពេលអគ្គីភ័យបានឆាបឆេះផ្ទះជាងជួសជុលម៉ូតូមួយកន្លែងនៅក្បែរផ្សារកអណ្តើក បណ្តាលឱ្យក្មេងប្រុសម្នាក់អាយុ៥ឆ្នាំបាត់បង់ជីវិតនៅក្នុងភ្នក់ភ្លើង ដោយសារជួយមិនទាន់ ចំណែកក្មេងស្រីម្នាក់អាយុ២ឆ្នាំ រងរបួសធ្ងន់ កំពុងសង្គ្រោះបន្ទាន់ រីឯស្ត្រីជាម្តាយបានរងរបួសស្រាល។
ហេតុការណ៍ខាងលើនេះបានកើតឡើងធ្វើអោយប្រជាពលរដ្ឋផ្អើលឆោឡោភ័យព្រលឹងចុងសក់គ្រប់ៗគ្នា កាលពីវេលាម៉ោង១២និង៤៥នាទីថ្ងៃត្រង់ថ្ងៃទី២ មីនា នៅចំណុចផ្លូវកែងបំបែកជា៤ ខាងកើតផ្សារកអណ្តើក ស្ថិតក្នុងភូមិចំបក់ ឃុំប្រាសាទ ស្រុកកំពង់ត្របែក ខេត្តព្រៃវែង។
សមត្ថកិច្ចស្រុកកំពង់ត្របែកបានអោយដឹងថា ផ្ទះមួយកន្លែងខាងលើដែលត្រូវអគ្គីភ័យឆាបឆេះជាប្រភេទផ្ទះធ្វើអំពីដែក ប្រក់ដំបូលសង្ក័សី មានទំហំទទឹង៤ម៉ែត្រ និងបណ្តោយ៨ម៉ែត្រ មានម្ចាស់ឈ្មោះ ឈួ ស្រ៊ុន ភេទប្រុស អាយុ៤៧ឆ្នាំ មុខរបរជាជាងជួសជុលម៉ូតូ ចំណែកជនរងគ្រោះទាំង៣នាក់ ក្នុងនោះ១-ឈ្មោះ ឈួ ម៉េងជឺ ភេទប្រុស អាយុ៥ឆ្នាំ ត្រូវជាកូនម្ចាស់ផ្ទះ បានបាត់បង់ជីវិតនៅក្នុងអណ្តាតភ្លើង ២-ឈ្មោះ ឈួ សៀវអេង ភេទស្រី អាយុ២ឆ្នាំ ត្រូវជាកូនម្ចាស់ផ្ទះ រងរបួសធ្ងន់ និង៣-ស្ត្រីជាម្តាយបានរងរបួសស្រាល។
ចំពោះមូលហេតុដែលបណ្តាលអោយកើតមានអគ្គីភ័យខាងលើនេះ គឺដោយសារតែបុរសជាម្ចាស់ផ្ទះបានជួសជុលម៉ូតូនៅខាងមុខផ្ទះ ហើយពេលកំពុងជួសជុលម៉ូតូនោះ បានធ្វើអោយខ្ទាតផ្កាភ្លើងចេញពីម៉ូតូ ទៅប៉ះចំដបសាំងដែលគាត់ដាក់លក់នៅខាងមុខផ្ទះ បណ្តាលអោយដបសាំងនោះផ្ទុះឆេះបែកខ្ទាតសាំងស្រោចចូលទៅក្នុងផ្ទះ បង្កជាអគ្គិភ័យឆាបឆេះផ្ទះទាំងមូលតែម្តង។
លោក សួន សំអឿន អធិការនគរបាលស្រុកកំពង់ត្របែក បានអោយដឹងថា ពេលកើតមានអគ្គីភ័យភ្លាម ធ្វើឱ្យប្រជាពលរដ្ឋនៅជុំវិញកន្លែងកើតហេតុនោះ ម្នាក់ៗមានការជ្រួលច្របល់ រត់ចែកជើងគ្នា ចំណែកអ្នកខ្លះទៀតយកទឹកមកជួយពន្លត់ និងបានរាយការណ៍ប្រាប់សមត្ថកិច្ចភ្លាម បន្ទាប់មកលោកក៏បានដឹកនាំកម្លាំង ព្រមទាំងរថយន្តពន្លត់អគ្គីភ័យចុះទៅជួយអន្តរាគមភ្លាមៗផងដែរ ជាមួយគ្នានោះក៏មានការជួយអន្តរាគមន៍ ពីរថយន្តពន្លត់អគ្គីភ័យរបស់ស្រុកបាភ្នំ ស្រុកព្រះស្តេច និងស្រុកស្វាយជ្រំ ខេត្តស្វាយរៀងផងដែរ ទើបទប់ស្កាត់អណ្តាតភ្លើង មិនអោយឆេះរាលដាលឆ្លងទៅផ្ទះអ្នកជិតខាងបានឡើយ។
លោកអធិការបានបញ្ជាក់ថា អគ្គិភ័យនេះបានឆាបឆេះក្នុងរយៈពេលតែប្រមាណជា២០នាទីប៉ុណ្ណោះ ក៏ពន្លត់បានវិញជាស្ថាពរ ប៉ុន្តែទ្រព្យសម្បត្តិក្នុងផ្ទះត្រូវភ្លើងឆេះអស់ទាំងស្រុង រួមទាំងកូនប្រុសម្ចាស់ផ្ទះម្នាក់អាយុ៥ឆ្នាំ ក៏ត្រូវភ្លើងឆេះបណ្តាលឱ្យបាត់បង់ជីវិតផងដែរ។
ដោយឡែក ប្រជាពលរដ្ឋដែលនៅជាប់ផ្ទះកើតហេតុដែលឃើញហេតុការណ៍ផ្ទាល់បានអោយដឹងថា ពេលផ្ទុះដបសាំងបង្កជាអគ្គីភ័យកើតឡើងភ្លាម បុរសជាម្ចាស់ផ្ទះបានស្ទុះរត់ចេញទៅក្រៅ ខណៈដែលស្ត្រីជាប្រពន្ធនិងកូនតូចទាំង២នាក់កំពុងនៅក្នុងផ្ទះ និងត្រូវអណ្តាតភ្លើងឆេះព័ទ្ធជុំជិត ហើយស្ត្រីជាប្រពន្ធស្រវាបានតែកូនស្រីពៅម្នាក់អាយុ២ឆ្នាំ ស្ទុះរត់ចេញមកក្រៅ ដោយឡែកកូនប្រុសច្បងអាយុ៥ឆ្នាំ ជួយមិនទាន់ក៏ត្រូវភ្លើងឆេះបណ្តាលឱ្យបាត់បង់ជីវិតក្នុងផ្ទះតែម្តង។
សមត្ថកិច្ចបានបញ្ជាក់ថា ក្រោយកើតហេតុ បុរសជាប្តីបាននាំប្រពន្ធនិងកូនទៅសង្គ្រោះនៅឯមន្ទីរពេទ្យ ចំណែកសាច់ញាតិបានចូលរើកាយយកសពក្មេងប្រុសយកទៅតម្កល់នៅក្នុងវត្តជិតនោះ ដើម្បីរៀបចំធ្វើបុណ្យតាមប្រពៃណី។ ដោយឡែកទ្រព្យសម្បត្តិដែលខូចខាតទាំងអស់ក្នុងហេតុការណ៍ខាងលើនេះ គេនៅមិនទាន់បានដឹងនៅឡើយទេ ៕ (កែសម្រួលដោយ ៖ ធីតា)
ចែករំលែកព័តមាននេះ