ខេត្តកំពង់ស្ពឺ ៖ ជនសង្ស័យម្នាក់បានយកកាំបិតដេញកាប់ទៅលើបុរស២នាក់ បណ្តាលអោយរងរបួសធ្ងន់ បន្ទាប់ពីជនសង្ស័យខឹងជនរងគ្រោះនិយាយលេងថា មិនខំរកសុី គិតតែពីដើរលេង ហើយជនសង្ស័យត្រូវបានសមត្ថកិច្ចឃាត់ខ្លួនបញ្ជូនទៅកាន់ការិយាល័យជំនាញដើម្បីចាត់ការបន្ត ចំណែកជនរងគ្រោះត្រូវបាន
សមត្ថកិច្ចបានបញ្ជូនទៅសង្គ្រោះភ្លាមៗនៅឯមន្ទីរពេទ្យផងដែរ។
ហេតុការណ៍ខាងលើនេះបានកើតឡើងកាលពីរសៀលថ្ងៃទី២ ខែកុម្ភៈ ឆ្នាំ២០២០ នៅចំណុចភូមិច្រាមត្បូងឃុំព្រះនិព្វាន ស្រុកគងពិសី ខេត្តកំពង់ស្ពឺ។
ជនសង្ស័យឈ្មោះធ្លក ចេក ហៅទី ភេទប្រុស អាយុ២៥ឆ្នាំ រស់នៅភូមិឃុំកើតហេតុខាងលើ ។ ចំណែកជនរងគ្រោះទាំង២នាក់ខាងលើ ក្នុងនោះម្នាក់ឈ្មោះ អំ សំអុល ភេទប្រុស អាយុ៤៨ឆ្នាំរ ស់នៅភូមិដុតកំបោ ឃុំព្រះនិព្វាន ស្រុកគងពិសី និងម្នាក់ទៀតឈ្មោះឌឿន ឌីរី ភេទប្រុស អាយុ៤៥ឆ្នាំ រស់នៅភូមិវាលថ្លាន់ សង្កាត់គងនយ ខណ្ឌដង្កោ រាជធានីភ្នំពេញ។
តាមប្រភពពីសមត្ថកិច្ចបានឱ្យដឹងថា មុនពេលកើតហេតុ ជនរងគ្រោះទាំង២នាក់កំពុងជុំគ្នាពិភាក្សារឿងការងាររកស៊ី ស្រាប់តែជនសង្ស័យបានដើរមកដល់ ពេលនោះជនរងគ្រោះឈ្មោះអំ សំអុល ក៏បាននិយាយលេងជាមួយជនសង្ស័យថា មិនគិតខំជួយធ្វើការរកសុីក្រុមគ្រួសារឪពុកម្តាយនោះទេ គិតតែដើរលេង ។គ្រាន់តែជនរងគ្រោះនិយាយចប់ធ្វើអោយជនសង្ស័យមានការខឹងសម្បារ ក៏បានយកកាំបិតផ្គាក់ដេញកាប់ទៅលើជនរងគ្រោះទាំង២នាក់ បណ្ដាលឱ្យរងរបួសធ្ងន់តែម្តង ។
តាមប្រភពដដែលបន្តថា ជនរងគ្រោះឈ្មោះអំ សំអុល ត្រូវជនសង្ស័យកាប់ចំគូទខាងស្ដាំ ក្រោយមកជនសង្ស័យក៏បន្តដេញកាប់ជនរងគ្រោះឈ្មោះឌឿន ឌីរី ទៀត បណ្ដាលឲ្យរងរបួសក្រោមត្រចៀកខាងស្ដាំយ៉ាងដំណំផងដែរ។
ក្រោយពេលកើតហេតុ ក៏មានប្រជាពលរដ្ឋបានរាយការណ៍ទៅសមត្ថកិច្ចឱ្យចុះមកឃាត់ខ្លួនជនសង្ស័យដើម្បីយកទៅចាត់ការតាមនីតិវិធី។
លោកឃឹម សុផាន់ណារ៉ា អធិការនគរបាលស្រុកគងពិសី បានបញ្ជាក់ប្រាប់នៅព្រឹកថ្ងៃទី៣ មីនា ឆ្នាំ២០២០នេះថា ក្រោយឃាត់ខ្លួនជនសង្ស័យម្នាក់ខាងលើ សមត្ថកិចជំនាញកំពុងកសាងសំណុំរឿងដើម្បីចាត់ការតាមនីតិវិធីហើយ ៕ (កែសម្រួលដោយ ៖ ធីតា)
ចែករំលែកព័តមាននេះ