ខេត្តកណ្ដាល ៖ ជនសង្ស័យចំនួន៥នាក់ត្រូវបានកម្លាំងនគរបាលផ្នែកព្រហ្មទណ្ឌស្រុកអង្គស្នួលរួមជាមួយនគរបាលប៉ុស្តិ៍សំរោងលើ ធ្វើការចាប់ខ្លួនបាន ចំណែកឯបក្ខពួកម្នាក់ទៀតកំពុងរត់គេចខ្លួន ក្រោយពេលពួកគេជិះរថយន្តមួយគ្រឿងពាក់ស្លាកលេខក្លែងក្លាយ រួមនឹងម៉ូតូមួយគ្រឿងផង ធ្វើសកម្មភាពដេញតាមវាយប្លន់ម៉ូតូ២គ្រឿងផ្សេងទៀតពីយុវជន៣នាក់ ខណៈជនរងគ្រោះកំពុងជិះម៉ូតូចេញពីក្លឹបរាត្រីនាវេលាយប់រំលងអាធ្រាត្រ ប៉ុន្តែមិនបានសម្រេចឡើយ ជាហេតុធ្វើឲ្យក្រុមជនសង្ស័យផ្ទុះកំហឹង ក៏បាននាំគ្នាវាយបំផ្លាញម៉ូតូខាងលើចោល ព្រមទាំងយកដីខ្សាច់ចាក់ចូលក្នុងធុងសាំងម៉ូតូជនរងគ្រោះទៀត បណ្ដាលឲ្យរងការខូចខាតយ៉ាងដំណំ។
ហេតុការណ៍ខសាងលើនេះបានកើតឡើងកាលពីវេលាម៉ោង១និង២០នាទីយប់រំលងអាធ្រាត្រឈានចូលថ្ងៃទី២ មីនា ឆ្នាំ២០២០ នៅតាមផ្លូវ ស្ថិតក្នុងភូមិត្រពាំងថ្ម ឃុំសំរោងលើ ស្រុកអង្គស្នួល ខេត្តកណ្តាល។
តាមនគរបាលបានប្រាប់ឲ្យដឹងថា ជនសង្ស័យខាងលើនោះរួមមាន ១-ឈ្មោះហួត សីហា ភេទប្រុស អាយុ៣៥ឆ្នាំ មុខរបរជាងចាក់សាក់ និងកាត់សក់ មានទីលំនៅក្នុងភូមិថ្នល់ទទឹង ឃុំដំណាក់អំពិល ស្រុកអង្គស្នួល ខេត្តកណ្តាល ជននេះគឺជាមេខ្លោងដែលបានរៀបចំផែនការក្នុងពេលចេញធ្វើសកម្មភាពប្លន់ ហើយក៏ជាអ្នកបញ្ជាឲ្យបក្ខពួកវាយ និងចាក់ដីខ្សាច់ចូលក្នុងធុងសាំងម៉ូតូរបស់ជនរងគ្រោះផងដែរ។
២-ឈ្មោះរុន វិរៈ ភេទប្រុស អាយុ២០ឆ្នាំ មុខរបរជាងកាត់សក់ មានទីលំនៅក្នុងភូមិព្រៃគោ ឃុំលំហាច ស្រុកអង្គស្នួល ខេត្តកណ្តាល ៣-ឈ្មោះខាន់ សំណាង ភេទប្រុស អាយុ១៩ឆ្នាំ មុខរបរជាងផ្សាដែក មានទីលំនៅក្នុងភូមិអង្គស្នួលទី៣ ឃុំពើក ស្រុកអង្គស្នួល ខេត្តកណ្តាល ៤-ឈ្មោះសេង សុបញ្ញា ភេទប្រុស អាយុ២០ឆ្នាំ មុខរបរមិនពិតប្រាកដ មានទីលំនៅក្នុងភូមិវត្តភ្នំ ឃុំភ្នំតូច ស្រុកឧដុង្គ ខេត្តកំពង់ស្ពឺ និង៥-ឈ្មោះលន ឆៃយុត ភេទប្រុស អាយុ២០ឆ្នាំ មុខរបរមិនពិតប្រាកដ មានទីលំនៅក្នុងភូមិអង្គស្នួលទី២ ឃុំពើក ស្រុកអង្គស្នួល ខេត្តកណ្តាល។ ចំណែកម្នាក់ទៀតដែលកំពុងរត់គេចខ្លួនឈ្មោះសាត ប្រុសពៅ ហៅកុង ភេទប្រុសអាយុ១៧ឆ្នាំ មុខរបរបើកបររថយន្ត មានទីលំនៅក្នុងភូមិព្រៃមាន ឃុំព្រៃពួច ស្រុកអង្គស្នួល ខេត្តកណ្តាល។
តាមប្រភពដដែលបានបន្តថា រីឯជនរងគ្រោះទាំង៣នាក់ខាងលើ រួមមាន ១-ឈ្មោះវ័ន ដេវីត ភេទប្រុស អាយុ១៨ឆ្នាំ មុខរបរកសិករ មានទីលំនៅក្នុងភូមិវត្តភ្នំ ឃុំភ្នំតូច ស្រុកឧដុង្គ ខេត្តកំពង់ស្ពឺ ២-ឈ្មោះងិន ខេមរា ភេទប្រុស អាយុ២២ឆ្នាំ មុខរបរកសិករ មានទីលំនៅក្នុងភូមិគីរីថ្មី ឃុំសំរោងលើ ស្រុកអង្គស្នួល ខេត្តកណ្តាល រងរបួសរលាត់ដៃជើង និង៣-ឈ្មោះឃុន ពិសីភេទប្រុស អាយុ២០ឆ្នាំ មុខរបរកសិករ មានទីលំនៅក្នុងភូមិត្រពាំងត្បែង ឃុំសំរោងលើ ស្រុកអង្គស្នួល ខេត្តកណ្តាល រងរបួសរលាត់ដៃជើង ។
ក្រោយពេលចាប់ខ្លួនជនសង្ស័យទាំង៥នាក់ខាងលើ កម្លាំងនគរបាលដកហូតបានសម្ភារៈមួយចំនួនដូចជា រថយន្តមួយគ្រឿងម៉ាកព្រូស ពណ៌ទឹកមាស ពាក់ស្លាកលេខក្លែងក្លាយ ភ្នំពេញ ២T-៧៤០៦ ដោយក្បាលរថយន្តបិទស្កុតពណ៌ខ្មៅផង រួមជាមួយម៉ូតូមួយគ្រឿងម៉ាកស៊ុយហ្សុ៊យគីនិច ស៊េរីឆ្នាំ២០១៩ ពណ៌ខ្មៅ ពាក់ស្លាកលេខ កណ្តាល ១AS-៤៧៦២ គឺជារបស់ជនសង្ស័យជិះចេញធ្វើសកម្មភាព។
ដោយឡែកម៉ូតូមួយគ្រឿងម៉ាកហុងដាឌ្រីម ធុនសេ១២៥ ស៊េរីឆ្នាំ២០១៦ ពណ៌ខ្មៅ ពាក់ស្លាកលេខ ភ្នំពេញ១FU-២៣០៤ ជារបស់ជនរងគ្រោះឈ្មោះវ័ន្ត ដេវីត និងម៉ូតូមួយគ្រឿងទៀតម៉ាកហុងដាឌ្រីម ធុនសេ១២៥ ស៊េរីឆ្នាំ២០១៧ ពណ៌ ខ្មៅពាក់ស្លាកលេខ ភ្នំពេញ ១GD-៣៣៥៧ ជារបស់ជនរងគ្រោះឈ្មោះងិន ខេមរា។
តាមប្រភពពីនគរបាលបានបញ្ជាក់ថា នៅមុនពេលកើតហេតុ ជនរងគ្រោះបានជិះម៉ូតូចេញពីផឹកសុីរាំលេងនៅក្លឹបយីហោ «រស្មីពេជ្រនិល» ដែលស្ថិតនៅតាមផ្លូវជាតិលេខ៤ ស្ថិតនៅក្នុងសង្កាត់កំបូល ខណ្ឌកំបូល រាជធានីភ្នំពេញ រួចត្រឡប់ទៅផ្ទះវិញ។
តាមប្រភពដដែលបានបន្តថា លុះពេលជនរងគ្រោះធ្វើដំណើរទៅដល់ចំណុចកើតហេតុខាងលើ ស្រាប់តែបានជួបនឹងក្រុមជនសង្ស័យ ក៏ត្រូវជនសង្ស័យធ្វើសកម្មភាពដេញតាមកៀរផ្តួល និងវាយប្លន់យកម៉ូតូ បណ្ដាលឲ្យជនរងគ្រោះដួលម៉ូតូ រងរបួសរលាត់ ដៃជើង ខណៈនោះក្រុមជនសង្ស័យយកម៉ូតូអត់បានទេ ដោយសារតែជនរងគ្រោះនាំគ្នាដកសោររត់ចេញ ជាហេតុធ្វើឲ្យជនសង្ស័យផ្ទុះកំហឹងក៏បានយកដំបងដែកបំពង់ទីបវាយម៉ូតូទាំង២គ្រឿង បណ្តាលឲ្យរងកាេខូចខាតយ៉ាងដំណំ រួចយកដីខ្សាច់ចាក់ចូលក្នុងធុងសាំងម៉ូតូរបស់ជនរងគ្រោះទៀត ដោយធ្វើទៅតាមបញ្ជារបស់មេខ្លោងឈ្មោះហួត សីហា ថែមទៀតផង។
ក្រោយពេលកើតហេតុ ជនរងគ្រោះបានប្ដឹងសុំឲ្យនគរបាលជួយអន្តរាគមន៍ ទើបកម្លាំងនគរបាលផ្នែកព្រហ្មទណ្ឌស្រុកអង្គស្នួលរួមជាមួយនគរបាលប៉ុស្តិ៍សំរោងលើដឹកនាំដោយលោកវរសេនីយ៍ឯក មាន សំណាង អធិការនគរបាលស្រុកអង្គស្នួលចុះធ្វើការស្រាវជ្រាវរហូតចាប់ខ្លួនបានជាបន្តបន្ទាប់៥នាក់ រួចនាំទៅធ្វើការសាកសួរ និងកសាងសំណុំរឿងបញ្ជូនទៅសាលាដំបូងខេត្តកណ្ដាលចាត់ការតាមច្បាប់តែម្ដង ចំណែកម្នាក់ទៀតកំពុងរត់គេចខ្លួននៅឡើយ៕ (កែសម្រួលដោយ ៖ ធីតា)
ចែករំលែកព័តមាននេះ