ADផ្ទាំងផ្សព្វផ្សាយពាណិជ្ជកម្ម

មកស្គាល់ពីជីវិតអ្នកកំប្លែងដែលមានជាងគេលើលោក

4 ឆ្នាំ មុន

០៣ ខែ មីនា ឆ្នាំ ២០២០ ម៉ោង ០៨:១០

អ្នកកំប្លែង អេឡេន ឌឺជេននឺរើស (Ellen DeGeneres) ត្រូវបានទទួលស្គាល់ដោយមនុស្សជុំវិញពិភពលោកថាជាអ្នកកំប្លែងដ៏ជោគជ័យ និងគួរឲ្យគោរពកោតសរសើរម្នាក់ ។ ប៉ុន្តែកាលពីអ្នកស្រីបានប្រកាសថាអ្នកស្រីស្រលាញ់ភេទដូចគ្នានៅកំឡុងទសវត្សឆ្នាំ ១៩៩០ មក អ្នកស្រីមិនមានការងារធ្វើច្រើនអស់ប៉ុន្មានឆ្នាំ ហើយអ្នកស្រីក៏ចាប់ផ្តើមអស់លុយសន្សំបន្តិចម្តងៗដែរ ។
ប៉ុន្តែបន្ទាប់ពីបញ្ចូលសម្លេងក្នុងភាពយន្ត Finding Nemo ដ៏ល្បីល្បាញ និងក្លាយជាម្ចាស់កម្មវិធី The Ellen DeGeneres Show កាលពីដើមសតវត្ស ២០០០ ហើយ អ្នកស្រីបានបើកផ្លូវថ្មីមួយសម្រាប់ខ្លួនឯង ។

បច្ចុប្បន្ននេះ អ្នកស្រីមានទ្រព្យសម្បត្តិសរុបប្រមាណ ៣០០លានដុល្លារ ដែលធ្វើឲ្យអ្នកស្រីស្ថិតក្នុងចំណោមស្ត្រីដែលមានទ្រព្យសម្បត្តិច្រើនជាងគេក្នុងសហរដ្ឋអាមេរិក ហើយប្រភពចំណូលធំមួយរបស់អ្នកស្រី គឺការទិញលក់អចលនទ្រព្យជាមួយនឹងភរិយា ។ ប៉ុន្តែទស្សនៈរបស់អ្នកស្រីលើលុយភាគច្រើនត្រូវបានជះឥទ្ធិពលពីកុមារភាព ដែលធ្វើឲ្យអ្នកស្រីមិនដាក់កម្រិតលើខ្លួនឯងច្រើនក្នុងផ្នែកលុយ និងធ្វើឲ្យអ្នកស្រីចាប់អារម្មណ៍ខ្លាំងលើអចលនទ្រព្យ និងអំពើរសប្បុរសធម៌ផ្សេងៗផងដែរ ។

យ៉ាងណាក្តី ប្រមាណពាក់កណ្តាលនៃចំណូលរបស់អ្នកស្រី គឺមានប្រភពមកពីកម្មវិធីទូរទស្សន៍ផ្ទាល់ខ្លួនដែលអ្នកស្រីទទួលបាន ៦០% នៃថ្លៃផ្សព្វផ្សាយផលិតផល ។ ក្រៅពីនេះហើយ អ្នកស្រីក៏រកឈ្មោះថា A Very Good Production ។ លើសពីនេះទៅទៀត អ្នកស្រីរកបានកម្រៃពីការផ្សព្វផ្សាយផលិតផលឲ្យក្រុមហ៊ុនធំៗដូចជា CoverGirl, JCPenney និង American Express ព្រមទាំងសៀវភៅជាច្រើនដែលអ្នកស្រីបានចេញលក់ ។

អ្នកស្រីក៏ចេញមុខមាត់ខ្លាំងដែរក្នុងផ្នែកសម្លៀកបំពាក់ដោយចេញយីហោផ្ទាល់ខ្លួនឯងមួយកាលពីឆ្នាំ ២០១៥ ក្រោមឈ្មោះថា ED by Ellen ។ អ្នកស្រីបានបង្កើតក្រុមហ៊ុន Ellen Digital Ventures ផងដែរដែលផ្តល់សេវាកម្មផ្សេងៗដូចជា Ellentube និង ហ្គេម Heads Up! មុននឹងបង្កើត Ellen Digital Network ជាមួយនឹងក្រុមហ៊ុន Warner Bros ។

នៅឆ្នាំ ២០១៨ អ្នកស្រីបានចុះកុងត្រាថ្មីមួយតម្លៃ ២០លានដុល្លារជាមួយនឹង Netflix សម្រាប់កម្មវិធីរឿងកំប្លែងផ្តាច់មុខមួយ ។ កាលពីឆ្នាំមុន អ្នកស្រីរកចំណូលបានប្រមាណ ៨០.៥លានដុល្លារ ដែលធ្វើឲ្យអ្នកស្រីក្លាយជាអ្នកកំប្លែងដែលរកចំណូលបានច្រើនជាងគេលើលោក ៕ កែសម្រួលដោយ ៖ សុឃាក់