ប្រទេសចិន ៖ តុល្យការនៃការឆ្លងរាលដាលវីរុសCOVID-19គិតមកដល់ថ្ងៃទី២មីនាចំនួនអ្នកបាត់បង់ជីវិតនៅលើពិភពលោកបានឡើងដល់លើសពី៣.០០០នាក់ហើយ ពិសេសនៅអ៊ីតាលីនិងកូរ៉េខាងត្បូង ដែលនៅក្នុងប្រទេសទាំង២នេះចំនួនអ្នកឆ្លងបានកើនកាន់តែខ្ពស់ រួចនៅបារាំងការឆ្លងរាលដាលនៃវីរុសបង្ខំឲ្យបារាំងបិទសារមន្ទីរលូហ្វ្រ។
នៅប្រទេសចិនអាជ្ញាធរសុខាភិបាលប្រទេសនេះ រាយការណ៍នាថ្ងៃទី២មីនា ពីអ្នកបាត់បង់ជីវិតថ្មី៤២នាក់នាំឲ្យចំនួនអ្នកបាត់បង់ជីវិតសរុបក្នុងប្រទេសនេះឡើងដល់២.៩១២នាក់។ គិតមកដល់ចុងថ្ងៃទី១មីនា នៅចិនដីគោកមានអ្នកឆ្លងវីរុសសរុប៨០.០២៦នាក់។
ចំណែកអ្នកជំងឹដែលឆ្លងវីរុសហើយមើលជាសះស្បើយនៅចិន មានដល់សរុប៤៤.៤៦២នាក់។ គ្រាន់តែនាថ្ងៃទី១មីនាមានអ្នកជាចេញពីមន្ទីរពេទ្យ២.៨៣៧នាក់។ ចំនួនអ្នកបាត់បង់ជីវិតលើពិភពលោកមានជាង៣.០០០នាក់។ អ្នកឆ្លងថ្មី២០២នាក់ត្រូវបានរាយការណ៍នាថ្ងៃទី២មីនានៅចិនដីគោក តែនោះជាតួលេខប្រចាំថ្ងៃដ៏ទាបបំផុតចាប់តាំងពីដំណាច់ខែមករាមក។
ក្រៅពីខេត្តហ៊ូប៉ីចំណុចកណ្ដាលនៃការចម្លង សកម្មភាពចាប់ផ្ដើមវិលវិញក្នុងប្រទេស ជាមួយការកកស្ទះចរាចរណ៍ខ្លះនៅក្រុងប៉េកាំងពេលម៉ោងមានមនុស្សច្រើនកុះករ។ ការឆ្លងរាលដាលនៃវីរុសCOVID-19ថ្មី បណ្ដាវិធានការរិតត្បិតខ្លាំងបំផុតនៅចិន ប៉ះពាល់ដល់មនុស្សជាង៥០លាននាក់។
វីរុសនេះបន្តឆ្លងរាលដាលធ្ងន់ធ្ងរ ក្នុងប្រទេសជាច្រើនលើពិភពលោក។ នៅអ៊ីតាលីនាថ្ងៃទី១មីនាជំរឿនឃើញអ្នកឆ្លងថ្មីប្រមាណជា៥០០នាក់ ជាចំនួនហក់ឡើងដ៏ខ្ពស់នាំឲ្យចំនួនអ្នកឆ្លងសរុបក្នុងប្រទេសនេះ ឡើងដល់ជិត១.៧០០នាក់។ ជាមួយអ្នកបាត់បង់ជីវិតថ្មី៥នាក់នាំឲ្យចំនួនអ្នកបាត់បង់ជីវិតសរុបនៅអ៊ីតាលីឡើងដល់៣៤នាក់ ពិសេសក្នុងតំបន់៣នាភាគខាងជើងប្រទេស។
នៅកូរ៉េខាងត្បូង ជាប្រទេសទី២រងការប៉ះពាល់ខ្លាំងបន្ទាប់ពីចិន នាថ្ងៃទី២មីនាជំរឿនឃើញអ្នកឆ្លងថ្មីជាង៥០០នាក់ ហើយមនុស្ស៤នាក់ថ្មីទៀតបានបាត់បង់ជីវិត នាំឲ្យចំនួនអ្នកបាត់បង់ជីវិត ឡើងដល់២២នាក់។ ចំណែកចំនួនអ្នកឆ្លងឡើងដល់ជាង៤.០០០នាក់ ។
បារាំងចំណុចថ្មីនៃការឆ្លងវីរុសនៅអឺរ៉ុប ជំរឿនឃើញអ្នកឆ្លង១៣០នាក់ហើយ២នាក់បាត់បង់ជីវិត។ សារមន្ទីរលូហ្វ្រជាកន្លែងទេសចរណ៍សំខាន់ នៃរដ្ឋធានីបារាំងទទួលអ្នកទស្សនាដល់ទៅ៩,៥លាននាក់ក្នុងឆ្នាំ២០១៩នោះ នៅតែបិទទ្វារ។ ចំណែកពិព័រណ៍សៀវភៅក្រុងប៉ារីសជាឱកាសសំខាន់នៃការជួបជុំគ្នា ហើយត្រូវបើកធ្វើ្វពីថ្ងៃទី២០ដល់២៣មីនាត្រូវលុបចោល។
នៅអាល្លឺម៉ង់កត់សម្គាល់ឃើញអ្នកឆ្លង១២៩នាក់។ អ៊ីរ៉ង់នាថ្ងៃទី១មីនារៀបរាប់ពីមនុស្សបាត់បង់ជីវិតថ្មី១១នាក់ នាំឲ្យចំនួនផ្លូវការនៃអ្នកបាត់បង់ជីវិតដោយសារវីរុសនេះឡើងដល់៥៤នាក់។ នាថ្ងៃទី១ ខែមីនា អាជ្ញាធរសុខាភិបាលអាមេរិកប្រកាសពីមនុស្សទី២បាត់បង់ជីវិតដោយសារវីរុសនេះ នៅរដ្ឋវ៉ាស៊ិនតោន។ មុននេះមានសេចក្ដីរាយការណ៍ពីមនុស្សម្នាក់បាត់បង់ជីវិតរួចហើយ ដោយសារវីរុសCOVID-19 ដែលមានអ្នកឆ្លងដល់ជាង៧០នាក់ហើយនៅសហរដ្ឋអាមេរិក។
ការឆ្លងរាលដាលនៃវីរុសCOVID-19នាំឲ្យមានការភ័យខ្លាចពីការបាក់ស្រុតចុះខ្លាំងនៃសេដ្ឋកិច្ចពិភពលោក។ បណ្ដាទីផ្សារកាលពីសប្ដាហ៍មុនរងការប៉ះពាល់ខ្លាំងបំផុត ពុំធ្លាប់មានចាប់តាំងពីវិបត្តិហិរញ្ញវត្ថុឆ្នាំ២០០៨មក៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ